విహారయాత్రల్లో హోటల్ గదులు బుక్ చేసుకోవడం ప్రస్తుత రోజుల్లో సాధారణమైపోయింది. బడ్జెట్ హోటల్ నుంచి ఫైవ్ స్టార్ వరకు.. ప్రతి ఒక్కరికీ ఇష్టమైన రీతిలో ఆప్షన్స్ ఉన్నాయి. గదిలో అడుగు పెట్టగానే కళ్లకు కనిపించే టవెల్స్, షాంపూలు, సబ్బులు, టీ కిట్‌ ఇలా అన్నీ చూసి ఇవి ఉచితమే కదా అని చాలా మంది ఫీలవుతుంటారు. నిజానికి కొన్ని నిజంగానే ఉచితమే, కానీ కొన్ని మాత్రం హోటల్ సొత్తే.
అందులో టవెల్, షాంపూ సాచెట్, సబ్బు, బాడీవాష్, బ్రష్, షవర్ క్యాప్, డిస్పోజబుల్ చెప్పులు, లాండ్రీ బ్యాగ్‌లను మీరు వినియోగించడానికి మాత్రమే ఉంచుతారు. వీటిని ఒక్కసారే వాడతారు కాబట్టి తర్వాత మిగిలినవన్నీ తీసుకెళ్లినా హోటల్‌కు సమస్య ఏమీ ఉండదు. ఇవి ‘కాంప్లిమెంటరీ’గా ఇచ్చే సౌకర్యాలు. అలాగే టీ, కాఫీ పౌడర్ పాకెట్లు, షుగర్ సాషేలు, కప్పులు కూడా గదిలోనే ఉంటాయి. వీటిని కూడా మీరు అక్కడే వాడేయవచ్చు. ఎక్కువ మంది ఈ కాంప్లిమెంటరీ ఐటెమ్స్‌నే తీసుకెళ్తారు. ఇందులో తప్పేమీ లేదు.
కానీ కొందరు బెడ్‌షీట్‌లు, దిండు కవర్లు, హ్యాంగర్లు, హెయిర్ డ్రయర్లు, కెట్‌ల్స్‌ వంటి వస్తువులకూ తమదేనని పొరబడతారు. ఇవి హోటల్‌కి చెందినవే, కస్టమర్‌కు కాదు. ఎక్కడైనా వీటిని తీసుకెళ్తే ఆ హోటల్ మేనేజ్‌మెంట్ ఆ వస్తువుల ఖరీదును చార్జ్ చేయడానికి వెనుకాడదు. కొన్ని సందర్భాల్లో సీసీటీవీ ఫుటేజ్ ఆధారంగా కూడా చార్జ్‌లు వసూలు చేస్తారు. ఇంకా కొందరు ఫ్రిడ్జ్‌లో ఉండే సాఫ్ట్ డ్రింక్స్‌, ఆల్కహాల్, ప్రీమియం చాక్లెట్స్‌, స్నాక్స్ ఉచితం అనుకుంటారు. ఇవి ఉచితం కాదు. మీ బిల్లుకు అదనంగా చార్జ్ అవుతాయి.
ఎప్పుడూ గుర్తుంచుకోవాల్సింది ఏంటంటే, మీరు చెల్లించే డబ్బు గది అద్దెకు, కొన్ని ప్రాథమిక సౌకర్యాలకు మాత్రమే. టవెల్, సబ్బు వంటివి డిస్పోజబుల్ కావడం వల్ల అవి తీసుకెళ్లొచ్చు. కానీ ఫర్నిచర్, ఎలక్ట్రానిక్స్, డెకరేషన్ వస్తువులు తీసుకెళ్లడం నేరం. మరి ట్రిప్ ముగిసే ముందు, చెక్‌ అవుట్ చేసేటప్పుడు మీ లగేజీని ఒక్కసారి చూడండి. పొరపాటు జరిగి ఏ వస్తువు లోపల పడిపోయిందో చెక్‌ చేసుకోండి. హోటల్ రూల్స్‌ను ముందే తెలుసుకొని, వాటిని పాటించడం మంచి కస్టమర్‌గానే కాదు, ఒక మంచి పౌరుడిగా చూపించే గుణం కూడా అవుతుంది. అందువల్ల, సరదాగా బస చేసి, సరదాగా తిరిగి ఇంటికి వస్తూ.. అవసరమైనవి మాత్రమే జాగ్రత్తగా తీసుకెళ్లడం మేలు.