Hero sreekanth: ఈ మధ్య కాలంలో టాలీవుడ్లో ఏదో ఒక అంశంపై చర్చ కొనసాగుతూనే ఉంది. మొన్నటి వరకూ మా అసోసియేషన్ ఎన్నికలు, అ తర్వాత సినిమా టికెట్ రేట్ల అంశం.. ఇలా ఏదో ఒక విషయంపై అలజడి సాగుతూనే వస్తోంది. ఎంతో ఉత్కంఠగా, ఎన్నో గొడవలు, మనస్పర్థల మధ్య జరిగిన మా ఎన్నికలు ఈ సారి చాలా సంచలనంగా మారాయి. ఆ తర్వాత సినిమా టికెట్ రేట్లపైనా అంతే స్థాయిలో రచ్చ మొదలైంది. ఈ విషయంపై ఇప్పటికే ఎంతో మంది తమ అభిప్రాయాలను వ్యక్తం చేస్తూ వస్తున్నారు. మరికొంత మంది వివాదాస్పద వ్యాఖ్యలు చేస్తూ వార్తల్లోకెక్కారు.
ఇకపోతే ప్రస్తుతం ఇండస్ట్రీ పెద్ద ఎవరనేది కూడా హాట్టాపిక్గా మారింది. మూవీ అర్టిస్ట్ అసోసియేషన్ ఎన్నికల సమయంలో దీనిపై పెద్ద ఎత్తున చర్చ జరగినా… ఆ తర్వాత సద్దుమనిగింది. అదే సమయంలో మెగాస్టార్ చిరంజీవి తాను ఇండస్ట్రీ పెద్దగా ఉండనని, కానీ పరిశ్రమలోని కార్మికులకు, వ్యక్తులకు అవసరమైన సమయంలో తాను ముందుంటానని అన్న విషయం తెలిసిందే. ఇక తాజాగా ఇదే అంశంపై హీరో శ్రీకాంత్ ఆసక్తికర వ్యాఖ్యలు చేశారు.
తనకు తెలిసినంత వరకు ఇండస్ట్రీ పెద్ద ఎవరూ అని తనని అడిగితే మాత్రం కచ్చితంగా మెగాస్టార్ చిరంజీవి గారే చెప్తానని శ్రీకాంత్ స్పష్టం చేశారు. ఎందుకుంటే ‘చాలా కాలంగా చిరంజీవి ఎంతో మందికి సాయం చేస్తున్నారన్న ఆయన, పరిశ్రమలో ఎవరికి ఎలాంటి సమస్యలు ఉన్నా ముందుగా కలిసేది చిరంజీవినే అని ఆయన తెలిపారు. అందుకే చిరంజీవి ఇండస్ట్రీ పెద్ద అంటే తప్పేం లేదని ఆయన చెప్పుకొచ్చారు. అంతే కాకుండా ఈ మధ్య టికెట్ రేట్ల అంశంపై చర్చించేందుకు ఏపీ ప్రభుత్వం ఆయన్నే ముందుగా ఆహ్వానించింది అని ఆయన గుర్తు చేశారు. దీన్ని బట్టే తెలుస్తుంది చిరంజీవికి ఇండస్ట్రీలో ఎలాంటి స్థానం ఉంది అనేది అని శ్రీకాంత్ వివరించారు.