ఇండియన్ ప్రీమియర్ లీగ్‌లో ఈ సీజన్ అత్యంత ఆశ్చర్యకర ఘట్టంగా బీహార్ కుర్రాడు వైభవ్ సూర్యవంశీ అరంగేట్రం నిలిచింది. వయసు కేవలం 14 ఏళ్లు. చదువు ఎనిమిదో తరగతి. కానీ మెదడు మాత్రం మామూలు ఆటగాళ్ల కన్నా పదునైనది. రాజస్థాన్ రాయల్స్ తరపున లక్నో సూపర్ జెయింట్స్‌పై మ్యాచ్‌లో ఇంపాక్ట్ ప్లేయర్‌గా వచ్చి… మొదటి బంతికే సిక్స్ కొట్టి అందరి దృష్టిని ఆకర్షించాడు.
వైభవ్ ఆటకు సోషల్ మీడియాలో ప్రశంసలు వెల్లువెత్తాయి. గూగుల్ సీఈఓ సుందర్ పిచాయ్ కూడా వెనుకపడలేదు. “ఈ చిన్నోడిని చూడడానికి ప్రత్యేకంగా నిద్రలేచాను. అరంగేట్రం అద్భుతంగా ఉంది” అంటూ ట్వీట్ చేశారు. 20 బంతుల్లో 34 పరుగులు చేసిన వైభవ్, అందులో 3 ఫోర్లు, 2 సిక్స్‌లతో స్టైల్‌గా నిలిచాడు. కవర్స్ మీదుగా కొట్టిన తొలి సిక్స్‌కు స్పెషల్ క్లాప్ పడింది.
అయితే వైభవ్ ఇన్నింగ్స్ వెనకటి మాటే అయినా, మ్యాచ్ ఫలితం మాత్రం రాజస్థాన్‌కు అనుకూలంగా రాలేదు. 181 పరుగుల లక్ష్యంతో బరిలోకి దిగిన రాజస్థాన్… చివరి ఓవర్లలో వెనకబడింది. ఆఖరి ఓవర్‌లో అవసరం 9 పరుగులు కాగా… లక్నో బౌలర్ అవేశ్ ఖాన్ అద్భుతంగా బౌలింగ్ చేశాడు. కేవలం 6 పరుగులే ఇచ్చి, హెట్‌మయర్ వికెట్ తీసి జట్టుకు గెలుపు అందించాడు.
రాజస్థాన్ జట్టులో యశస్వి జైస్వాల్ 74, రియాన్ పరాగ్ 39 పరుగులు చేశారు, చివరి ఓవర్లలో స్కోరింగ్ లోపం రాజస్థాన్‌ను ఢీకొట్టింది. ఈ ఓటమితో ఆ జట్టు పాయింట్ల పట్టికలో 8వ స్థానానికి పడిపోయింది. కేవలం 14 ఏళ్ల వయసులో IPL అరంగేట్రం చేయడం మాత్రమే కాదు, దానికి తగ్గ ఆటతీరు కనబరిచిన వైభవ్ ప్రస్తుతం దేశవ్యాప్తంగా చర్చనీయాంశంగా మారాడు. మేనేజ్‌మెంట్ నుంచి అభిమానులు వరకూ అంతా అతడిపై ముచ్చటిస్తున్నారు.
