Sridevi Drama Company: తెలుగు బుల్లితెరపై ప్రసారమవుతున్న ప్రోగ్రామ్స్ సంఖ్య రోజురోజుకూ పెరుగుతూనే ఉంది. ప్రతీ ఛానెల్ తమ రేటింగ్ను పెంచుకోవాలనే ఉద్దేశంతో రకరకాల కంటెంట్లతో వివిధ రకాల షోలు చేస్తూ ప్రేక్షకులను అలరిస్తున్నారు. అందులో ఒకటి శ్రీదేవీ డ్రామా కంపెనీ. ప్రతీ వారం సరికొత్త కంటెంట్తో ప్రేక్షకులను నవ్విస్తూ, ప్రత్యేక ఆదరాభిమానాలను కూడగట్టుకుంటోంది.
అయితే ప్రేక్షకులను ఈ స్థాయిలో అలరించడానికి కంటెస్టంట్లు చేసే కష్టం అంతా కాదు. వారే కాదు షో అంత అందంగా, ఎంటర్టైనింగ్గా రావడానికి తెర వెనకాల ఎంతో శ్రమ ఉందనడంలో ఏ మాత్రం సందేహం లేదు. అయితే అంతటి కృషి చేయాలంటే మాత్రం ముందు కావాల్సింది బడ్జెట్. వారం వారం ప్రత్యేక అతిథులతో , కమెడియన్స్తో సరికొత్తగా ఎంటర్టైన్ చేసేందుకు మల్లెమాల ఈ షోకు ఎంత ఖర్చు చేస్తుంది అన్న విషయాలను పరిశీలిస్తే, అందరూ అనుకునే దాని ప్రకారం చూస్తే ఇంత మందితో ప్రోగ్రామ్ అంటే పెద్ద ఎత్తున ఖర్చు పెట్టాలి కాబట్టి, శ్రీదేవీ డ్రామా కంపెనీకి వెచ్చించే బడ్జెట్ చాలా ఎక్కువే అనుకుంటారు చాలా మంది. కానీ అలాంటిదేమీ లేదని మల్లెమాల ద్వారా తెలుస్తోంది.
శ్రీదేవీ డ్రామా కంపెనీలో పాల్గొనే ప్రతీ కమెడియన్కి, కంటెస్టంట్కీ పేమెంట్ ఉంటుందనుకోవడం నిజంగా అబద్దమే. కొందరు కేవలం టీవీ కనిపించాలన్న ఉద్దేశం, ఉత్సాహంతోనే వస్తారని టాక్. ఇంద్రజ, ఆది, సుధీర్ లాంటి ఒక పదిహేను మందికి తప్పించి, మిగతా అందరికీ పారితోషికాలు ఇవ్వడమనేదే ఉండదని సమాచారం. అంతే కాకుండా ఈ షో ఒక ఎపిసోడ్ పూర్తి కావడానికి దాదాపు 30 లక్షలు ఖర్చవుతుందట. ఒక్కోసారి భారీగా ప్లాన్ చేసినపుడు మాత్రం 50లక్షల వరకూ వెచ్చిస్తారని సమాచారం. ఇక శ్రీదేవీ డ్రామా కంపెనీకి యూట్యూబ్లోనూ మిలియన్లలో వ్యూస్ ఉండడం చెప్పుకోదగిన అంశం. కేవలం యూట్యూబ్ ద్వారా రెవెన్యూతోనే ప్రొడక్షన్ కాస్ట్ అంతా వెళ్లిపోతుందని పలువురు భావిస్తున్నారు. కానీ ఈ విషయంపై మల్లెమాల మాత్రం ఎలాంటి ప్రకటన చేయలేదు.