నాటు నాటు పాట ప్రపంచవ్యాప్తంగా ఎంత వైరల్ అయిందో, అందులో రామ్ చరణ్-ఎన్టీఆర్‌ల స్టెప్స్ ఎంత పాపులర్ అయ్యాయో ప్రత్యేకంగా చెప్పాల్సిన అవసరం లేదు. అయితే తాజాగా ఎన్టీఆర్ చేసిన కామెంట్ మాత్రం ఈ హిట్ సాంగ్‌కు మరో లెవెల్ హైప్ తీసుకొచ్చింది. రాయల్ ఆల్బర్ట్ హాల్‌ వేదికగా జరిగిన RRR లైవ్ మ్యూజిక్ కాన్సర్ట్ సందర్భంగా ఎన్టీఆర్ చేసిన మాటలు అభిమానులను మాస్ మూడ్‌లోకి తీసుకెళ్లాయి.
తాను రామ్ చరణ్‌తో కలిసి నాటు నాటు డ్యాన్స్ చేసిన అనుభవాన్ని జీవితాంతం మర్చిపోలేనని తారక్ చెప్పాడు. అదే సమయంలో చిరంజీవి, బాలకృష్ణల గురించి చేసిన వ్యాఖ్యలు ఇప్పుడు ఫ్యాన్ బేస్‌లను ఫుల్ జోష్‌లోకి తీసుకొచ్చాయి. చిరు డాన్స్‌కు మాస్టర్, బాలయ్య ఎనర్జీకి కింగ్ అని చెప్పిన తారక్… ఈ ఇద్దరూ కలసి నాటు నాటు పాటకు స్టెప్స్ వేస్తే, అది సిల్వర్ స్క్రీన్ పైనా కాదు, ఒక బాహుబలి లెవెల్ మోమెంట్ అవుతుందని అన్నాడు.
తారక్ మాటలతో ఆ హాల్‌లో చిరు, బాలయ్య పేర్లు మారుమోగిపోయాయి. “జై బాలయ్య… జై చిరు…” అంటూ అభిమానులు పెద్దగా సంబరపడిపోయారు. ఇదంతా సోషల్ మీడియాలో ట్రెండ్ అవుతుండటంతో, చిరు-బాలయ్య ఫ్యాన్స్ కూడా అదే డ్రీమ్‌ను రిపీట్ చేస్తూ పోస్టులు పెడుతున్నారు. కొందరు ఫ్యాన్స్ అయితే, ఓ వేదికపై చిరంజీవి, బాలకృష్ణ కలిసి స్టెప్పేస్తే సినిమా రిలీజ్ స్థాయిలో ఫెస్టివల్ జరుపుకుంటామని అంటున్నారు.
