మార్వెల్ లేటెస్ట్ సూపర్ హీరో మూవీ ‘అవెంజర్స్ ఎండ్‌గేమ్’భారీ ఎత్తున రిలీజ్ కు రంగం సిద్ధమైంది. ఈ నెల 26న దేశంలో మొత్తం 2,500 స్క్రీన్లలో ఈ సినిమా ప్రేక్షకుల ముందుకు రాబోతోంది. రెండు తెలుగు రాష్ట్రాల్లో ఓ హాలీవుడ్‌ సినిమా ఇన్ని స్క్రీన్ల పై విడుదల కావడం ఇదే తొలిసారి కావటం విశేషం. ఇప్పటి వరకు ఏ హాలీవుడ్‌ చిత్రం ఇక్కడ ఇంత భారీగా విడుదల కాలేదు. అలాగే‘బుక్‌మైషో’ యాప్ చరిత్రలోనే అత్యంత వేగంగా టికెట్లు బుక్కైన సినిమా ‘అవెంజర్స్: ఎండ్‌గేమ్’.
ఈ సినిమా ఎప్పుడెప్పుడు థియేటర్‌లో చూస్తామా అని అవెంజర్స్ అభిమానులు ఆత్రుతగా ఎదురుచూస్తున్నారు. ఇలాంటి సమయంలో ‘అవెంజర్స్’కు తమిళ్‌ రాకర్స్ షాక్ ఇచ్చారు. విడుదలకు రెండు రోజుల ముందే మొత్తం సినిమాను ఆన్‌లైన్‌ లో లీక్ చేసేశారు.
‘అవెంజర్స్: ఎండ్‌గేమ్’ ఈనెల 24న జర్మనీ, యూఏఈ, సింగపూర్‌తో పాటు ఇతర దేశాల్లో విడుదలైంది. ఇండియాలో మాత్రం ఈనెల 26న విడుదల చేస్తున్నారు. దీంతో ఇక్కడ విడుదల కావడానికి రెండు రోజుల ముందే మొత్తం సినిమాను తమిళ్‌రాకర్స్ ఆన్‌లైన్‌లో పెట్టేశారు. దీంతో నిర్మాతలు టెన్షన్ పడుతున్నారు. ఆ ప్రభావం బాక్సాఫీసుపై పడుతుందని భయపడుతున్నారు. అయితే, ట్రేడ్ వర్గాలు మాత్రం దీని వల్ల పెద్దగా నష్టపోయేదేమీ లేదని అంటున్నారు. ఇలాంటి సినిమాను థియేటర్‌లో చూస్తేనే ఎంజాయ్ చేస్తామని, మార్వల్స్ అభిమానులెవరూ ఈ సినిమాను పైరసీ కాపీ రూపంలో చూడాలనుకోరని చెప్తున్నారు.