ఏపీ రాజకీయాల్లో తాజా పరిణామాలు ఆసక్తికరంగా మారాయి. వైసీపీ కీలక నేత బొత్స సత్యనారాయణ తన రాజకీయ భవిష్యత్తుపై కొత్త వ్యూహాలను రచిస్తున్నారా అనే ప్రశ్నలు రాజకీయ వర్గాల్లో చర్చనీయాంశంగా మారాయి. ఎన్నికల్లో ఓటమి తర్వాత పార్టీ బలహీనపడిన సమయంలో కూడా బొత్స తన విధానాన్ని మార్చుకోకుండా, విపక్ష నేతగా శాసన మండలిలో దూకుడుగా వ్యవహరిస్తున్నారు. అయితే, సభలో అధికార పార్టీపై దాడి చేసే ఆయన, సభ వెలుపల జనసేన అధినేత, డిప్యూటీ సీఎం పవన్ కల్యాణ్‌తో సాన్నిహిత్యం పెంచుకుంటున్నట్లు కనిపిస్తోంది.
బడ్జెట్ సమావేశాల్లో బొత్స వైసీపీ తరఫున గట్టి పోరాటం చేస్తున్నా, జనసేన నేతలతో ఆయన వ్యవహరిస్తున్న తీరుపై వైసీపీ వర్గాల్లో అనేక అనుమానాలు వ్యక్తమవుతున్నాయి. ఇటీవల అసెంబ్లీ ఆవరణలో పవన్‌ను ప్రత్యేకంగా పలకరించి, ఆయన ఆరోగ్యం గురించి ఆరా తీయడం కూడా దీనికి కారణం. గతంలో కూడా ఇదే తరహాలో బొత్స, పెద్దిరెడ్డి రామచంద్రారెడ్డితో కలిసి ఉండగానే పవన్‌ను ప్రత్యేకంగా కలిసి మాట్లాడటం గుర్తు చేసుకోవచ్చు. దీనివల్ల బొత్స వైఖరిపై వైసీపీ నేతల్లో కొంత అసహనం కూడా పెరిగినట్లు సమాచారం.
ఇప్పటికే వైసీపీ అధినేత జగన్ అధికారం కోల్పోయిన తర్వాత పార్టీ భవిష్యత్తుపై అనేక నేతలు అనుమానంగా ఉన్నారు. ముఖ్యంగా ఉత్తరాంధ్ర ప్రాంతంలో బలమైన నేతగా ఉన్న బొత్స, తన రాజకీయ భవిష్యత్తును కాపాడుకోవాలనే క్రమంలో కొత్త మార్గాలను అన్వేషిస్తున్నారా అనే ప్రశ్నలు తలెత్తుతున్నాయి. బీజేపీ-జనసేన-టీడీపీ కూటమి అధికారం చేపట్టిన నేపథ్యంలో, బొత్స వంటి సీనియర్ నేతలకు స్థానికంగా వచ్చే అవకాశాలను దృష్టిలో పెట్టుకుని, ఆయన భవిష్యత్తును ప్లాన్ చేస్తున్నట్లు విశ్లేషకులు అభిప్రాయపడుతున్నారు. బొత్స రాజకీయ భవిష్యత్తు ఏ దిశగా మారుతుందో స్పష్టత రావాలంటే ఇంకా కొంత సమయం పట్టొచ్చు.