వైఎస్ కుటుంబంలో కొంతకాలంగా కొనసాగుతున్న ఆస్తుల వివాదం ఇప్పుడు మరో మలుపు తీసుకుంది. ముఖ్యంగా, వైఎస్ విజయమ్మ తాజాగా ట్రైబ్యునల్లో వేసిన అఫిడవిట్, ఈ వివాదానికి కొత్త రూట్ ఇవ్వనుందని రాజకీయ విశ్లేషకులు భావిస్తున్నారు. ఆమె తన హక్కులపై క్లారిటీ ఇస్తూ, సదరు ఆస్తులతో జగన్కు ఎలాంటి సంబంధం లేదని తేల్చిచెప్పడం ఇప్పుడు చర్చనీయాంశంగా మారింది. గతంలో ఈ ఆస్తుల వల్ల తన బెయిల్ రద్దయ్యే ప్రమాదం ఉందంటూ జగన్ కోర్టుకు వెళ్లిన సంగతి తెలిసిందే. ఇప్పుడు విజయమ్మ ఇచ్చిన అఫిడవిట్, ఆ అంశంపై ప్రభావం చూపుతుందా? లేదా? అనే అనుమానాలు వ్యక్తమవుతున్నాయి.
ఇప్పటికే గత ఆరు నెలలుగా సరస్వతి పవర్ కార్పొరేషన్ వాటాల అంశం వివాదాస్పదంగా మారిన విషయం తెలిసిందే. 2012లో జగన్ అక్రమాస్తుల కేసులో ఈ ఆస్తులను ఈడీ, సీబీఐ స్వాధీనంలోకి తీసుకోవడంతో, వాటిపై కొనసాగుతున్న వివాదం మరింత ముదిరింది. అయితే, జగన్ తరఫున వాదనలు వినిపించిన లాయర్లు, ఈ ఆస్తుల నిర్వహణ తమకు కూడా హక్కుగా వస్తుందని కోర్టులో వాదించారు. కానీ, విజయమ్మ తాజాగా వేసిన అఫిడవిట్, ఈ వాదనకు ఎదురుదెబ్బనిచ్చేలా ఉంది. ఆమె ప్రకారం, ఈ ఆస్తులపై తనకు పూర్తి అధికారం ఉండగా, జగన్ లేదా భారతి పేర్లకు సంబంధం లేదని స్పష్టం చేశారు.
అంతేకాదు, ఈ వివాదంలో షర్మిలను అనవసరంగా లాగుతున్నారని కూడా విజయమ్మ కోర్టుకు తెలిపారు. సరస్వతి పవర్ వాటాల బదలాయింపును తమ కుటుంబ గొడవగా మార్చే ప్రయత్నం జరుగుతోందని, దీనికి షర్మిలకు ఎలాంటి సంబంధం లేదని ఆమె స్పష్టం చేశారు. ఈ వివాదంలో తన కుమార్తెను అనవసరంగా ముడిపెట్టడం తగదని, ఇది పూర్తిగా తప్పుడు ఆరోపణలని విజయమ్మ అఫిడవిట్లో పేర్కొన్నారు. ఇది కేవలం వ్యక్తిగత ఆస్తుల వివాదమేనని, కుటుంబ రాజకీయాలు దీనికి జోడించరాదని ఆమె అభిప్రాయపడ్డారు.
ఇప్పుడు ఈ కేసులో ట్రైబ్యునల్ ఏ విధంగా స్పందిస్తుందనే అంశం ఆసక్తిగా మారింది. ఒకవేళ కోర్టు విజయమ్మ వాదనను అంగీకరిస్తే, జగన్కు ఆర్థికంగా కొంత నష్టం జరిగే అవకాశం ఉంది. అదే సమయంలో, తన కుటుంబాన్ని రాజకీయంగా వాడుకున్నారనే ఆరోపణలు కూడా తలెత్తవచ్చు. మొత్తానికి, వైఎస్ కుటుంబ ఆస్తుల వివాదం ఊహించని మలుపులు తిరుగుతుండగా, రాజకీయంగా దాని ప్రభావం ఎక్కడి వరకు కొనసాగుతుందో వేచిచూడాల్సిన అవసరం ఉంది.
