తెలుగుదేశం పార్టీ చరిత్రలో మహానాడు అత్యంత ప్రాధాన్యమైన సమావేశం. ప్రతి ఏడాది క్రమం తప్పకుండా నిర్వహించబడే ఈ మహాసభలు, పార్టీ భవిష్యత్తును తీర్చిదిద్దే వేదికగా నిలుస్తాయి. అయితే, ఈసారి మహానాడుకు ఒక ప్రత్యేకత ఉంది. ఆంధ్రప్రదేశ్ రాజకీయ సమీకరణాలను పూర్తిగా మార్చేలా టీడీపీ, వైసీపీ అధినేత జగన్ సొంత నియోజకవర్గమైన పులివెందులలోనే మహానాడు నిర్వహించాలని యోచిస్తోంది. ఇది కేవలం పార్టీ కార్యకర్తలకు మార్గదర్శకంగా కాకుండా, ప్రత్యర్థి పార్టీకి ఓ రాజకీయ సవాల్‌గా మారనుంది.
45 ఏళ్ల టీడీపీ చరిత్రలో తొలిసారిగా కడపలో మహానాడు నిర్వహించడం విశేషం. ఇది పార్టీ సత్తా చాటడమే కాదు, రాబోయే ఎన్నికల వ్యూహాలకు కూడా కీలక మలుపు అవ్వనుంది. రాజకీయంగా కడప, ముఖ్యంగా పులివెందుల, వైసీపీ ఆధిపత్యం కొనసాగుతున్న ప్రాంతం. అలాంటి ప్రాంతంలో టీడీపీ భారీ స్థాయిలో సమావేశం ఏర్పాటు చేయడమంటే, వచ్చే ఎన్నికల్లో తాము అక్కడ బలంగా పోటీ చేసే సంకేతంగా విశ్లేషకులు భావిస్తున్నారు.
ఈ మహానాడు వేదికగా టీడీపీ భవిష్యత్తుకు సంబంధించిన కీలక నిర్ణయాలు తీసుకునే అవకాశం ఉందని పార్టీ వర్గాలు చెబుతున్నాయి. ముఖ్యంగా, నారా లోకేష్‌ను మరింత ప్రభావశీలమైన పదవిలోకి తీసుకురావడం ఖాయమనిపిస్తోంది. ఇప్పటికే పార్టీ జాతీయ ప్రధాన కార్యదర్శిగా కీలక బాధ్యతలు నిర్వర్తిస్తున్న లోకేష్‌కు, కార్యనిర్వాహక అధ్యక్షుడిగా పదవి ఇవ్వొచ్చని ఊహాగానాలు ఊపందుకున్నాయి. గతంలోనూ ఇదే విషయం చర్చకు వచ్చినప్పటికీ, ఈసారి మాత్రం చంద్రబాబు ఈ నిర్ణయాన్ని ఖరారు చేసే సూచనలు కనిపిస్తున్నాయి.
ఇక, టీడీపీలో యువతకు ప్రాధాన్యం పెంచే అంశం కూడా ఈ మహానాడు వేదికగా చర్చకు రానుంది. ఇటీవల నారా లోకేష్ పార్టీని రీ-స్ట్రక్చర్ చేసే ప్రణాళికలో భాగంగా, 33% పదవులను యువతకు కేటాయిస్తామని ప్రకటించిన విషయం తెలిసిందే. ఈ దఫా మహానాడులో దీనిపై స్పష్టత ఇచ్చే అవకాశముంది. పార్టీ భవిష్యత్తు దృష్టిలో పెట్టుకుని, 2047 నాటికి టీడీపీ అధికారంలో ఉండేందుకు పాటించాల్సిన వ్యూహాలను చంద్రబాబు ఈ సమావేశంలో వివరించనున్నట్లు సమాచారం.