2019లో భారత్-పాకిస్థాన్ మధ్య తీవ్ర ఉద్రిక్తతలకు చోటుచేసుకున్నాయి. అప్పుడు భారత వైమానిక దళానికి చెందిన వింగ్ కమాండర్ అభినందన్ వర్థమాన్‌ను పాకిస్థాన్ సైన్యం బంధించిన ఘటన దేశవ్యాప్తంగా కలకలం రేపిన సంగతి తెలిసిందే. ఆ ఘటనలో ప్రధాన పాత్ర పోషించిన పాక్ ఆర్మీ అధికారి తాజాగా మృతిచెందినట్టు సమాచారం అందుతోంది. అభినందన్‌ను అదుపులోకి తీసుకున్నప్పుడు అతనితో ఉన్న అధికారులలో ఒకడైన మేజర్ మోయిజ్ అబ్బాస్ షా, ఉగ్రదాడిలో ప్రాణాలు కోల్పోయాడు.
అంతర్జాతీయ మీడియా కథనాల ప్రకారం, మోయిజ్ అబ్బాస్ షా ఖైబర్ పఖ్తుంఖ్వా ప్రావిన్స్‌లోని దక్షిణ వజీరిస్తాన్ జిల్లాలో తెహ్రీక్-ఇ-తాలిబాన్ పాకిస్థాన్ (TTP) ఉగ్రవాదులు జరిపిన ఎదురుకాల్పుల్లో మరణించాడు. ఎలైట్ స్పెషల్ సర్వీస్ గ్రూప్ (SSG)లో పనిచేస్తున్న మోయిజ్, ఓ ఉగ్రవాద వ్యతిరేక ఆపరేషన్‌ నడుపుతున్న సమయంలో తాలిబాన్ దాడిలో గాయపడి అక్కడికక్కడే మరణించినట్టు పాక్ ఆర్మీ తెలిపింది. ఈ ఘటన జూన్ 24న జరగగా, దాని సమాచారం 25న వెలుగులోకి వచ్చింది.
2019 ఫిబ్రవరిలో జరిగిన పుల్వామా ఉగ్రదాడికి ప్రతీకారంగా భారత వైమానిక దళం బాలాకోట్‌లో ఉగ్రశిబిరాలపై వైమానిక దాడులు జరిపింది. దానికే ప్రతిగా ఫిబ్రవరి 27న పాకిస్థాన్ వైమానిక దళం ఎఫ్-16 విమానాలతో భారత వాయుసీమలోకి ప్రవేశించే ప్రయత్నం చేసింది. ఆ సమయంలో అభినందన్ వర్థమాన్ మిగ్-21 విమానంతో పాక్ ఎఫ్-16ను వెంటాడి కూల్చివేశాడు. అయితే ఆ సమయంలో ఆయన విమానం కూడా కూలిపోవడంతో ఆయన పాకిస్థాన్ భూభాగంలో పడిపోయారు. వెంటనే పాక్ ఆర్మీ ఆయనను అదుపులోకి తీసుకుని విచారణకు గురిచేసింది. అప్పట్లో అభినందన్‌పై చిత్రహింసలు జరిగినట్టు ఆరోపణలు వెలువడ్డాయి. అంతర్జాతీయ ఒత్తిడి నేపథ్యంలో, పాక్ ప్రభుత్వం ఆయన్ను వాఘా సరిహద్దు ద్వారా భారత్‌కు అప్పగించింది.
ఈ సంఘటన తర్వాత అభినందన్‌కి ‘వీర్ చక్ర’ పురస్కారం లభించగా, ప్రస్తుతం ఆయన గ్రూప్ కెప్టెన్ హోదాలో భారత వైమానిక దళంలో సేవలందిస్తున్నారు. దేశమంతా ఆయన ధైర్యాన్ని స్మరించుకుంటూ గర్వపడిన సందర్భం అది. ఇలాంటి క్రమంలో అప్పట్లో ఆయనను అదుపులోకి తీసుకున్న పాక్ ఆఫీసర్ మృతిచెందడం గమనార్హం. ఉగ్రవాదులను అణచేందుకు పాక్ సైన్యం చేస్తున్న ప్రయత్నాల్లో తమ అధికారి ఉగ్రవాదుల చేతిలోనే ప్రాణాలు కోల్పోవడం తమ దేశానికి మరో దెబ్బగా మారిందని పాక్ మీడియా పేర్కొంది. ఈ ఘటన ఒక వైపు ఉగ్రవాద సమస్య ఎంతగా పాకిస్థాన్‌లో వేరేలాడుతోందో చూపిస్తుండగా, మరోవైపు 2019లోని ఉద్వేగభరిత క్షణాలను మళ్లీ గుర్తుకు తెచ్చింది.