జమ్మూకశ్మీర్‌లోని పహల్గామ్‌లో ఇటీవల జరిగిన ఘోర ఉగ్రదాడి కేసును నేషనల్ ఇన్వెస్టిగేషన్ ఏజెన్సీ (ఎన్ఐఏ) అధికారికంగా స్వీకరించింది. ఈ దాడిలో ఒక నేపాల్ పౌరుడితో సహా మొత్తం 26 మంది అమాయక ప్రజలు ప్రాణాలు కోల్పోయిన విషయం తెలిసిందే. కేంద్ర హోం మంత్రిత్వ శాఖ ఆదేశాలతో ఈ కేసు ఎన్ఐఏకు బదిలీ చేసినట్టు అధికారిక ప్రకటన వెలువడింది.
ఇప్పటి వరకు ఈ దాడిపై జమ్మూకశ్మీర్ పోలీసులు దర్యాప్తు కొనసాగించారు. కానీ ఘటన తీవ్రతను దృష్టిలో ఉంచుకొని కేంద్రం నేరుగా ఎన్ఐఏ చేతికి కేసు అప్పగించింది. ఏప్రిల్ 23నుంచి ఎన్ఐఏ బృందాలు పహల్గామ్ ఘటనా స్థలంలో మోహరించి, ఐజీ, డీఐజీ, ఎస్పీ స్థాయి అధికారుల పర్యవేక్షణలో దర్యాప్తును వేగంగా సాగిస్తున్నారు.
సుందరమైన బైసరన్ లోయలో జరిగిన ఈ దాడిని ప్రత్యక్షంగా చూసిన సాక్షులను అధికారులు క్షుణ్ణంగా విచారిస్తున్నారు. ప్రత్యక్ష సాక్షుల ప్రకారం, ఉగ్రవాదులు మతాన్ని నిర్ధారించుకున్న తర్వాతే కాల్పులు జరిపారని తేలింది. మృతుల్లో అధిక సంఖ్యలో హిందూ పురుషులు ఉన్నారు. ఉగ్రవాదుల చలనం ఎలా జరిగింది, దాడి అనంతరం ఎటు వెళ్లారు అనే అంశాలపై ఎన్ఐఏ బృందాలు నిశితంగా దర్యాప్తు చేస్తున్నారు.
ఫోరెన్సిక్ నిపుణుల సహాయంతో ఘటనా స్థలంలో లభించిన ఆధారాలను సేకరిస్తున్నారు. దాడి వెనుక ఉన్న ముళ్లను ఛేదించేందుకు ఎన్ఐఏ సమగ్ర దర్యాప్తు చేపట్టింది. ఇక ఉగ్రవాదులను పట్టుకునేందుకు భద్రతా బలగాలు కశ్మీర్ లోయలో విస్తృత గాలింపు చర్యలు చేపట్టాయి. అనుమానితులను అదుపులోకి తీసుకొని విచారిస్తున్నాయి. అలాగే, గతంలో గుర్తించిన పది మంది ఉగ్రవాదుల ఇళ్లను కూల్చివేసి చర్యలు తీసుకుంటున్నాయి. ఈ దర్యాప్తు ఎంత త్వరగా ముగుస్తుందో అని దేశం ఆసక్తిగా ఎదురు చూస్తోంది.
