నెలల తరబడి సాగిన రక్తపాతం, మరణాలు, వేలాది కుటుంబాల నిరాశ్రయ జీవితం.. గాజా ప్రాంతం చివరకు ఓ కీలక మలుపు దిశగా అడుగేస్తోంది. ఇజ్రాయెల్ – హమాస్ మధ్య కాల్పుల విరమణ ఒప్పందం శుక్రవారం మధ్యాహ్నం అధికారికంగా అమల్లోకి వచ్చింది. స్థానిక కాలమానం ప్రకారం మధ్యాహ్నం 12 గంటలకు ఇరువైపులా కాల్పులు పూర్తిగా ఆగిపోయాయి. ముందస్తుగా అంగీకరించిన ప్రణాళిక మేరకు ఇజ్రాయెల్ దళాలు గాజాలోని పలు ప్రాంతాల నుంచి వెనక్కి తరలడం ప్రారంభించాయి.
ఈ ఒప్పందానికి అమెరికా అధ్యక్షుడు Donald Trump మధ్యవర్తిత్వం వహించారు. బందీల విడుదల, పాలస్తీనా ఖైదీల మార్పిడి, సరిహద్దు భద్రత వంటి పలు అంశాలపై విస్తృతంగా చర్చలు జరిపి రెండు పక్షాలు తాత్కాలిక విరమణకు ఒప్పుకున్నాయి. Israel Defense Forces (IDF) సామాజిక మాధ్యమాల్లో విడుదల చేసిన ప్రకటనలో 12:00 గంటలకు కాల్పుల విరమణ ఒప్పందం అమల్లోకి వచ్చింది. ఈ ఒప్పందం ప్రకారం తమ దళాలు కొత్త మోహరింపు రేఖల వెంట స్థానాలు దక్కించుకుంటున్నాయి. ఏ విధమైన తక్షణ ముప్పు తలెత్తినా ఎదుర్కొనేందుకు పూర్తి అప్రమత్తంగా ఉంటాం అని పేర్కొన్నారు.
ఈ చారిత్రాత్మక విరమణతో గాజా ప్రాంతంలో కొంత శాంతి వాతావరణం నెలకొనే అవకాశం కనిపిస్తోంది. అయితే, ఈ విరమణ శాశ్వతమవుతుందా? లేక తాత్కాలిక విరామం మాత్రమేనా అన్న అనుమానాలు ఇంకా కొనసాగుతూనే ఉన్నాయి. గాజా పాలన, హమాస్ నిరాయుధీకరణ, సరిహద్దు నియంత్రణ వంటి అంశాలు ఇంకా స్పష్టత రావాల్సి ఉంది.
ఇజ్రాయెల్ ప్రధానమంత్రి Benjamin Netanyahu ఈ సందర్భంలో దేశ ప్రజలను ఉద్దేశించి ప్రసంగించారు. రెండు సంవత్సరాల క్రితం జాతీయ విషాద దినంగా నిలిచిన Simchat Torah పండుగ ఈసారి బందీలు తిరిగి రావడంతో జాతీయ ఆనంద దినంగా మారుతుందని ఆయన ఆశాభావం వ్యక్తం చేశారు. “ఇది ఒక చారిత్రాత్మక క్షణం. దేవుని సహాయంతో మన సోదరులు, సోదరీమణులు తిరిగి వస్తారు. దేశమంతా ఈ ఆనందాన్ని పంచుకుంటుంది” అని అన్నారు.
అయితే హమాస్ ఒప్పంద నిబంధనలకు కట్టుబడి లేకపోతే యుద్ధం తిరిగి ప్రారంభమవుతుందని నెతన్యాహు కఠిన హెచ్చరిక జారీ చేశారు. హమాస్ నిరాయుధీకరణ తప్పనిసరి. ఇది సులభంగా జరిగితే బాగుంటుంది. కాకపోతే కఠినమైన మార్గంలో జరగడం తప్పదు అని ఆయన స్పష్టం చేశారు. ఆయన వ్యాఖ్యలతో ఈ విరమణపై ఒక అనిశ్చితి నెలకొంది.