హైదరాబాద్ నగరంలో మెట్రో రైళ్లలో నిషేధిత బెట్టింగ్ యాప్‌ల ప్రకటనల వ్యవహారం ఇప్పుడు హైకోర్టు వరకు చేరింది. ఈ మేరకు న్యాయవాది నాగూర్‌బాబు ప్రజా ప్రయోజన వ్యాజ్యాన్ని దాఖలు చేయడం కలకలం రేపుతోంది. ప్రభుత్వ నిషేధం ఉన్నప్పటికీ, మెట్రోలో అలాంటి ప్రకటనలు వస్తుండటం విచారకరమని ఆయన కోర్టు దృష్టికి తీసుకువచ్చారు.
వాస్తవానికి, బహిరంగ ప్రదేశాల్లో బెట్టింగ్ యాప్‌ల ప్రచారం నిషిద్ధం. అయితే, హైదరాబాద్ మెట్రో రైళ్లలో మాత్రం ఈ ప్రకటనలు నడుస్తున్నాయని పిటిషనర్ ఆరోపించారు. ఇప్పటికే ఈ యాప్‌లపై ఈడీ దర్యాప్తు చేస్తున్న నేపథ్యంలో, ఇటువంటి ప్రకటనలకు అనుమతి ఎలా ఇస్తున్నారని ప్రశ్నించారు.
హైదరాబాద్ మెట్రో రైలు సంస్థ తరఫు న్యాయవాది స్పందిస్తూ, 2022 తర్వాత తమ ప్లాట్‌ఫాంలలో ఎటువంటి నిషేధిత యాప్ ప్రకటనలు ప్రదర్శించలేదని కోర్టుకు తెలిపారు. ఈ ఆరోపణలకు సంబంధించిన సమగ్ర వివరాలు ఇవ్వడానికి కొంత సమయం కావాలన్న అభ్యర్థనను కోర్టు ఎదుట ఉంచారు.
ఇరు పక్షాల వాదనలు విన్న హైకోర్టు, మెట్రో సంస్థ అభ్యర్థనను అంగీకరించింది. కౌంటర్ అఫిడవిట్ దాఖలుకు సమయం ఇచ్చింది. తదుపరి విచారణను ఏప్రిల్ 29కి వాయిదా వేసింది. ఈ పిల్‌తో హైదరాబాద్ మెట్రో ప్రకటనల వ్యవహారం మరింత నెపథ్యానికి రానుంది. అసలైన నిజాలు ఏప్రిల్ 29న వెలుగులోకి వచ్చే అవకాశం ఉంది. ప్రకటనలపై ఉన్న అనుమానాలు పోవాలంటే న్యాయస్థానం దిశానిర్దేశం కీలకం కానుంది.
