15 నెలల అమెరికా ప్రవాసం తర్వాత ఎస్‌ఐబీ మాజీ చీఫ్ ప్రభాకర్ రావు హైదరాబాద్‌కు తిరిగొచ్చారు. ఫోన్ ట్యాపింగ్ కేసులో కీలక నిందితుడిగా ఉన్న ఆయన చివరకు తిరిగి రావాల్సిన పరిస్థితి ఏర్పడటం, ఇప్పుడు జరిగిన పరిణామాలపై తీవ్ర రాజకీయ ఊహాగానాలకు దారి తీస్తోంది. అమెరికాలో రాజకీయం శరణార్థం కోరినా, అక్కడి కోర్టు తిరస్కరించడంతో ఇక ఆయనకు తిరిగి రావడం తప్పలేదు.
బీఆర్ఎస్ అధికారంలో ఉన్న సమయంలో… ప్రతిపక్ష పార్టీల నేతలతో పాటు వారి కుట్రలపై ముందుగానే గ్రహణం పొందే లక్ష్యంతోనే ఫోన్ ట్యాపింగ్ వ్యవహారం కొనసాగిందన్న ఆరోపణలు ఉన్నాయి. ఈ గేమ్‌ ప్లాన్ వెనుక ప్రభాకర్ కీలకంగా వ్యవహరించారని సమాచారం. ఆయనపై నేరుగా ఆరోపణలు ఉన్నప్పటికీ, ఇన్నాళ్లూ విచారణకు దూరంగా ఉండటమే కాదు… సుప్రీంకోర్టు ఎదుట కూడా తప్పుదారి పట్టించే ప్రయత్నం చేశారు. చివరికి కోర్టు తేల్చిచెప్పడంతోనే ఆయన తిరిగి రావాల్సి వచ్చింది.
ఇప్పుడు సిట్ విచారణకు ప్రభాకర్ రావు హాజరవుతుండటంతో… రాజకీయంగా ఆసక్తికర పరిస్థితి నెలకొంది. ఆయన ఏ మేరకు నిజాలను బయటపెడతారో అనే దానిపైనే బీఆర్ఎస్ భవితవ్యమే ఆధారపడి ఉందన్నంతగా ఈ వ్యవహారం తీవ్రమైంది. నిజంగానే ఆయన తన పై ఉన్న ఒత్తిళ్లకు లోనవకుండా నిజాలన్నింటినీ వెల్లడిస్తే, మాజీ ప్రభుత్వానికి తలనొప్పులు తప్పవు. పైగా మీడియా అధినేత శ్రవణ్ రావు కూడా ఇప్పటికే విచారణ ఎదుర్కొంటున్న నేపథ్యం మరింత ఉద్విగ్నత కలిగిస్తోంది.
ఇదే సమయంలో బీఆర్ఎస్ వర్గాలు మాత్రం ఈ వ్యవహారాన్ని తక్కువగా పట్టించుకునే ప్రయత్నం చేస్తున్నాయి. కానీ ప్రభాకర్ విచారణలో ఎలాంటి అంశాలు వెలుగులోకి వస్తాయన్న దానిపైనే ఫోకస్ పెట్టాయి. ఒకవేళ ఆయనే బయటకు వస్తే… బీఆర్ఎస్ రాజకీయంగా ఎదుర్కొనే పరిస్థితులు మరింత క్లిష్టంగా మారవచ్చు.