మన సంస్కృతిలో నుదిటిపై బొట్టు పెట్టుకోవడం ఒక అందం, ఆచారం మాత్రమేనని చాలామంది భావిస్తారు. గుడికి వెళ్ళినా, పండుగ సందర్భం వచ్చినా లేదా ప్రతిరోజూ ఇంట్లో పూజ చేసినా స్త్రీలు, పురుషులు ఇద్దరూ బొట్టు పెట్టుకుంటారు. కానీ ఈ చిన్న చిహ్నం వెనుక దాగి ఉన్న శాస్త్రీయ కారణాలు వింటే మాత్రం మీరు ఆశ్చర్యపోవాల్సిందే.
మన శరీరంలో అత్యంత శక్తివంతమైన కేంద్రం కనుబొమ్మల మధ్యలోని అజ్ఞ చక్రం. దీనిని “తృతీయ నేత్రం” అని కూడా అంటారు. ఈ ప్రాంతంలో బొట్టు పెట్టడం వలన మానసిక స్పష్టత పెరిగి, అంతర్దృష్టి బలపడుతుందని నమ్ముతారు. శాస్త్రవేత్తలు కూడా ఈ ప్రదేశం నరాలు ఎక్కువగా కలిసే ప్రాంతమని చెబుతున్నారు. ఇక్కడ తేలికపాటి ఒత్తిడి కలిగితే రక్త ప్రసరణ మెరుగై తలనొప్పి, సైనస్ వంటి సమస్యలు తగ్గుతాయని వైద్యులు సూచిస్తున్నారు.
అదే సమయంలో, నుదిటిపై పెట్టే కుంకుమ లేదా చందనం బొట్టు సూర్యరశ్మిని ఆకర్షించే గుణం కలిగి ఉంటుంది. దీంతో శరీరానికి విటమిన్ డి లభించడంలో ఇది సహాయపడుతుందని నిపుణులు చెబుతున్నారు. విటమిన్ డి లోపం లేకపోవడం వలన ఎముకలు దృఢంగా ఉండటమే కాకుండా, రోగనిరోధక శక్తి కూడా బలపడుతుంది. ఇక ప్రాచీన ఆయుర్వేదం ప్రకారం, ఈ బొట్టు శరీరంలోని శక్తి ప్రవాహాన్ని సమతుల్యం చేస్తుంది. దాంతో ఒత్తిడి తగ్గి, ఏకాగ్రత పెరుగుతుంది. ప్రత్యేకంగా విద్యార్థులు లేదా ఎక్కువగా మానసిక ఒత్తిడిలో ఉండే వారు బొట్టు పెట్టుకోవడం ద్వారా ఏకాగ్రతను పెంచుకోవచ్చని సూచిస్తున్నారు. అదేవిధంగా జ్ఞాపకశక్తిని పదును పెట్టడంలో కూడా ఇది ఉపయోగపడుతుంది.
మన పెద్దలు చెప్పిన విధంగా బొట్టు పెట్టు కుంటే.. దృష్టి దోషం దూరమవుతుంది అన్న మాటకీ శాస్త్రీయ ఆధారం ఉంది. గుండ్రటి బొట్టు ఒక సైకలాజికల్ బ్యారియర్లా పనిచేస్తుందని, ఇతరుల దృష్టి ప్రభావం మనసుపై పడకుండా కాపాడుతుందని మనో వైద్యులు చెబుతున్నారు. ముఖ్యంగా స్త్రీలకు, కనుబొమ్మల మధ్యలో బొట్టు పెడితే రక్త ప్రసరణ చురుగ్గా జరిగి, హార్మోన్ల సమతుల్యతకు ఇది మేలు చేస్తుందని కొన్ని పరిశోధనలు సూచిస్తున్నాయి. పురుషులకూ ఇదే లాభాలు వర్తిస్తాయి. ఇంతవరకు అందం కోసం పెట్టుకున్న బొట్టు.. ఇప్పుడు చూస్తే ఇది ఆరోగ్యానికి ఓ సహజ వైద్యంలా పనిచేస్తోందని అర్థమవుతుంది. అందుకే మన పెద్దలు కేవలం ఆచారం కోసం కాకుండా, శాస్త్రబద్ధమైన కారణాల కోసం కూడా బొట్టు పెట్టుకోవాలని సూచించారు.