మనిషి నిద్రలో చూసే కలలు యాదృచ్ఛికంగా వచ్చిన చిత్రాల్లా అనిపించినా.. వాటి వెనుక రహస్య సంకేతాలు ఉంటాయని స్వప్న శాస్త్రం చెబుతోంది. ప్రతీ కల మన భవిష్యత్తు గురించి ఏదో ఒక సంకేతం ఇస్తుందని పెద్దలు నమ్ముతారు. అందులోనూ కలలో నెమలి కనిపిస్తే అది ప్రత్యేకంగా శుభప్రదంగా భావించబడుతుంది. కానీ నెమలి ఎలా కనిపించింది, ఏ రంగులో కనిపించింది, ఏ స్థితిలో కనిపించింది అన్నదానిపైనే దాని అర్థం ఆధారపడి ఉంటుందని పండితులు చెబుతున్నారు.
హిందూ సంప్రదాయంలో నెమలికి ప్రత్యేక స్థానముంది. ఇది శ్రీకృష్ణుడి ఇష్టమైన పక్షి మాత్రమే కాదు, కార్తికేయ స్వామి వాహనం, సరస్వతి దేవి వాహనం కూడా. అందుకే నెమలి దర్శనం శుభ సూచికంగా పరిగణించబడుతుంది. కానీ స్వప్న శాస్త్రం ప్రకారం కలలో నెమలిని చూడటం ఎప్పుడూ శుభమే అనుకోవడం పొరపాటు. కొన్ని సందర్భాల్లో అది రానున్న అపశకునాలకు సంకేతం కావచ్చని చెబుతోంది.
కలలో నృత్యం చేస్తున్న నెమలి కనబడితే అది అత్యంత శుభప్రదం. సంపద, ఆనందం, శ్రేయస్సు రాబోతున్నాయని అర్థం. ఆర్థిక లాభాలు, గౌరవం త్వరలో మీకు లభించనున్నాయని ఇది సూచన. ఇక కలలో నెమలిని పట్టుకోవడం కనిపిస్తే, అది విజయం సాధనకు సంకేతం. మీరు చేసిన కష్టానికి తగిన ఫలితం దక్కబోతోందని ఈ కల సూచిస్తుంది. ఇది శ్రమ, పట్టుదల ఫలితం సానుకూలంగా ఉంటుందని తెలియజేస్తుంది.
తెల్ల నెమలి కలలో కనబడితే అది లక్ష్మీ కటాక్షానికి సంకేతం. అనుకోని ధనలాభాలు జరగవచ్చని, కుటుంబంలో సంతోషకర వాతావరణం నెలకొంటుందని శాస్త్రం చెబుతోంది. నీలి నెమలి దర్శనం కూడా అత్యంత శుభప్రదం. ఇది శ్రీకృష్ణుని కృపను సూచిస్తుంది. ఈ కల మీరు జీవితంలో ప్రతి రంగంలో విజయం సాధిస్తారని తెలిపుతుంది.
అదే సమయంలో నెమలి నేలపై కూర్చోవడం, పోరాడటం లేదా చనిపోయి కనిపించడం అనేది అశుభ సూచికంగా పరిగణించబడుతుంది. ఇది రానున్న ఇబ్బందులు లేదా ఆందోళనల గురించి హెచ్చరిక అని భావిస్తారు. అలాగే నెమళ్ల మంద ఒకేసారి కలలో కనబడితే, అది పెద్ద అదృష్టానికి సంకేతం. మీ జీవితంలో ఆకస్మిక మార్పులు జరిగి, మీరు ఎంతో సంతోషం, గౌరవం పొందబోతున్నారని స్వప్న శాస్త్రం చెబుతోంది. ప్రాచీన గ్రంథాలు చెబుతున్నట్టే, కలలు మన భవిష్యత్తుకు అద్దం పడతాయి. వాటిని నిర్లక్ష్యం చేయకుండా అర్థం చేసుకోవడం మనకెంతో ఉపయోగకరం. నెమలి కలలో దర్శనమివ్వడం వెనుక ఉన్న శుభ–అశుభ సంకేతాలు మీ జీవనంలో పెద్ద మార్పులకు దారి తీసే అవకాశం ఉందని పండితులు చెబుతున్నారు.