అప్పుడప్పుడు రాత్రి నిశ్శబ్దాన్ని చీల్చుతూ కుక్కల అరుపులు వినిపిస్తే చాలామంది గుండె గుబులు పెరుగుతుంది. ఏదో అపశకునం జరగబోతోందా అనే అనుమానం కూడా కలుగుతుంది. ముఖ్యంగా గ్రామీణ ప్రాంతాల్లో అయితే ఈ ఏడుపు వెనుక యముడు సంచరిస్తున్నాడనే భయం ప్రజల్లో గాఢంగా ఉంది. కానీ ఈ నమ్మకాలకు శాస్త్రీయ ఆధారం ఏదీ లేదు. నిజానికి కుక్కలు ఏడవడం వెనుక సహజమైన, సాధారణ కారణాలే దాగి ఉన్నాయి.
నిజానికి కుక్కలకు అద్భుతమైన ఇంద్రియ శక్తులు ఉంటాయి. మనుషులకు కనిపించని చిన్న చిన్న మార్పులనూ అవి గుర్తిస్తాయి. చీకటి రాత్రి వేళ గాలి దిశ, వాసన, శబ్దం వంటి విషయాలపై అవి మరింత అప్రమత్తంగా ఉంటాయి. ఈ సమయంలో ఏదైనా కొత్త వాసన లేదా అనుకోని శబ్దం వినిపిస్తే భయంతో అరవడం సహజం.
కొన్ని సందర్భాల్లో యజమాని దగ్గరలో లేకపోతే ఒంటరితనం కూడా కుక్కలకు భయాన్ని కలిగిస్తుంది. ఆ ఒంటరితనాన్ని దాటిపోవడానికే అవి అరుస్తాయని నిపుణులు చెబుతున్నారు. అలాగే ఆకలి వేసినా, బయటికి వెళ్లాలని అనిపించినా యజమాని దృష్టిని ఆకర్షించడానికి కూడా కుక్కలు ఏడుస్తాయి. వాటి ప్రవర్తనలో ఇది సహజమైన భాగమే.
నిపుణుల అభిప్రాయం ప్రకారం వయసు పెరిగే కొద్దీ కుక్కల దృష్టి, వినికిడి బలహీనమవుతాయి. ఈ కారణంగా అవి గందరగోళానికి గురై తరచూ భయంతో అరవడం జరుగుతుంది. అలాగే పరిసరాల్లో మార్పులు కొత్త ఇల్లు, కొత్త వాసన, పరిచయం లేని శబ్దం ఇవి అన్నీ కుక్కల్లో ఆందోళన కలిగించి ఏడవడానికి దారితీస్తాయని చెబుతున్నారు.
వెటర్నరీ వైద్యులు చెబుతున్నట్లు, కుక్కల ఏడుపు అనేది సహజ ప్రతిస్పందన మాత్రమే. ఇందులో అతీత శక్తులు, మరణం లేదా అశుభం వంటి విషయాలు లేవు. మనుషులు అర్థం చేసుకోలేని వాటిని భయంతో ముడిపెట్టడం వల్లే ఈ అపోహలు పుట్టుకొచ్చాయని చెబుతుంటారు. కుక్కలు అత్యంత తెలివైన జంతువులు. వాటి ప్రవర్తనలోని కారణాలను అర్థం చేసుకుంటే మనకు అనవసరమైన భయాలు దూరమవుతాయి. కాబట్టి రాత్రి కుక్కలు ఏడిస్తే భయపడాల్సిన అవసరం లేదు. బదులుగా, వాటి అవసరాలను గమనించి, సహజ కారణాలను అర్థం చేసుకోవడం మంచిది. అప్పుడు మాత్రమే ఈ మూఢనమ్మకాలను దూరం చేసుకోవచ్చు.