ప్రస్తుత రోజుల్లో ప్రతి వ్యక్తి ఏదో ఒక సమస్యతో సతమతమవుతూనే ఉన్నాడు. కుటుంబం, ఆర్థికం, మానసికం ఇలా మూల చుట్టూ తిరిగినా విసుగు వెంటాడుతూనే ఉంది. అనిశ్చితి, భయం, ఒత్తిడి… ఇవన్నీ మనసులో గూడు కట్టేశాయి. ఇలాంటి ఆందోళనల జీవితంలో ఒక్కసారైనా ‘‘ఓం’’ అనే పవిత్ర శబ్దం వినిపిస్తే చాలు.. లోపలే ఓ రకమైన సాంత్వన, తీరని ధైర్యంతో పులకరిస్తుంది. వేదాల నుంచీ యోగా దాకా, సాధారణ ధ్యానం నుంచి ఆధునిక మానసిక వైద్యం వరకు… ‘‘ఓం’’ శబ్దానికి సమానమైన శాంతి మరెక్కడా దొరకదు అంటారు సాధకులు. ఇది కేవలం ఒక పదం కాదు.. మనిషి లోతైన అంతరంగానికి వెన్నుతక్కువు పలికే శబ్దం.
ప్రచీన ఋషులు చెబుతున్న దాని ప్రకారం.. సృష్టి ప్రారంభం ఓ శబ్దంతోనే మొదలైందంటుంటారు. ఆ శబ్దం అన్ని ప్రకంపనలకు మూలం, అన్ని మార్గాలకు దిక్సూచి. శరీరం, మనస్సు, ఆత్మను ఒకే తాటిపై ఉంచే శక్తి ఈ మూడు అక్షరాల్లో ఉంది. ‘‘అ’’ అంటే మన మేలుకునే స్థితి.. ‘‘ఉ’’ అంటే కలల లోకానికి చెందిన స్థితి, ‘‘మ’’ అంటే లోతైన నిద్ర. ఇవన్నీ కలిసే మన జీవన సారాంశం.
విసుగు, ఒత్తిడి, అనారోగ్యంతో రోజులు గడుస్తున్నవారికి ‘‘ఓం’’ జపం సులభమైన చిట్కా. రోజూ కూర్చుని కనీసం 15 నిమిషాలు దీర్ఘ శ్వాసలతో ‘‘ఓం’’ను మెల్లగా ఉచ్చరిస్తే చాలు.. మానసిక స్థితి స్థిరమవుతుంది, ఆందోళన తగ్గుతుంది. ఏకాగ్రత పెరుగుతుంది. విద్యార్థులు ఎక్కువసేపు పాఠాలు చదవగలిగే స్థైర్యం వస్తుంది. పెద్దవారికి జ్ఞాపకశక్తి మెరుగవుతుంది.
‘‘ఓం’’ జపం సమయంలో లోతైన శ్వాసల వల్ల రక్తప్రసరణ బాగుంటుంది. హృదయం ఆరోగ్యంగా ఉంటుంది. రక్తపోటు నియంత్రణలో ఉంటుంది. రోగ నిరోధక శక్తి మెరుగవుతుంది. ముఖానికి సహజ కాంతి వస్తుంది. నిద్ర బాగా రాకపోతే పడుకునే ముందు ‘‘ఓం’’ జపం చేయమని యోగా గురువులు సూచిస్తారు. శరీరం సడలిపోతుంది. గాఢ నిద్ర దొరుకుతుంది.
ఇంతటి గొప్ప మంత్రాన్ని ఉపయోగించడం పెద్ద కష్టమేమీ కాదు. ఉదయం ఖాళీ కడుపుతో లేదా రాత్రి పడుకునే ముందు, ప్రశాంత వాతావరణంలో కళ్లుమూసుకుని ఒక్కసారైనా ప్రయత్నించండి. మొదట్లో ఏకాగ్రత రాకపోయినా, కొద్ది రోజుల్లోనే మనసు సాంత్వనతో నిండిపోతుంది. కనీసం రోజూ 21 సార్లు ‘‘ఓం’’ జపిస్తే చాలు అంటారు పండితులు. ఆ శబ్దం ప్రతి కణాన్ని ఊరలేస్తుంది. శరీరానికి కొత్త శక్తిని నింపుతుంది.
అందుకే నేటి నుంచి ఒక్కసారి ప్రయత్నించండి. ఉదయం ప్రారంభం ‘‘ఓం’’తో చేస్తే, ఆ రోజు అంతా మనసు కూడా ప్రశాంతంగా ఉంటుంది. ఒత్తిడి తగ్గుతుంది.. సమస్యలు దాటిపోతాయి. ఒక్క ఓం శబ్దం… ఆందోళనలను దూరం చేస్తుంది.