చిన్న వయస్సులోనే జుట్టు తెల్లబడిపోయిందంటే చాలామందికి ఆశ్చర్యం కలుగుతుంది. మూడు పదుల వయస్సు దాటక ముందే జుట్టు తెల్లగా మారిపోవడంపై ఇదెలా సాధ్యం..? అనే ప్రశ్నలు రావడం సహజం. అసలు దీనికి శాస్త్రీయంగా ఏ కారణాలు ఉన్నాయో ఇప్పుడు తెలుసుకుందాం.
జుట్టు నల్లగా కనిపించడానికి “మెలనిన్” అనే పదార్థం కీలకం. ఇది వెంట్రుకలలో ఉండే సహజ వర్ణద్రవ్యంగా, జుట్టుకి రంగును కల్పిస్తుంది. కొన్ని పరిస్థితుల్లో మెలనిన్ ఉత్పత్తి తగ్గిపోతే, జుట్టు క్రమంగా రంగును కోల్పోయి తెల్లగా కనిపిస్తుంది. వయసుతో సంబంధం లేకుండా ఈ పరిణామం చిన్న వయస్సులోనే ప్రారంభమవుతుంటుంది. అసలు తెల్లజుట్టు అనేది రంగు మారడమే కాదు వెంట్రుకల్లో మెలనిన్ లేకపోవడం వల్ల వెలుతురు ఎలా పడుతుందో బట్టి అవి తెల్లగా కనిపిస్తాయి.
మెలనిన్ తగ్గడానికి గల ప్రధాన కారణం జెనెటిక్స్. తల్లిదండ్రులు లేదా పూర్వీకులలో చిన్న వయస్సులో తెల్లజుట్టు ఉంటే, వారసత్వంగా అది తరం తరంగా వెళుతుంది. రెండవ కారణం టెన్షన్, ఒత్తిడి, నిద్రలేమి, అసమతుల్య ఆహారం వంటి జీవనశైలి సమస్యలు. అలాగే ఆటో ఇమ్యూన్ రుగ్మతలు, థైరాయిడ్ సమస్యలు కూడా జుట్టు రంగులో మార్పుకు దారితీస్తాయి.
ముఖ్యంగా విటమిన్ B12 లోపం కూడా ప్రభావితం చేస్తుంది. ఇది ఎర్ర రక్త కణాల ఉత్పత్తిలో కీలకంగా ఉండి, జుట్టుకు పోషణ చేరే మార్గాన్ని నిర్దేశిస్తుంది. ఈ విటమిన్ తక్కువగా ఉన్నప్పుడు జుట్టు ఆరోగ్యం దెబ్బతింటుంది. అలాగే పొగతాగడమే గాక, దుమ్ము ధూళి, కాలుష్యం వంటి కారణాల వల్ల కూడా జుట్టు ఫలితం మారుతుంది.
పరిష్కారం ఏమిటి..? జన్యుపరమైన కారణాలను నియంత్రించలేము. కానీ జీవనశైలి, ఆహారపు అలవాట్లు మార్చుకుంటే ప్రభావాన్ని తగ్గించవచ్చు. మెలనిన్ ఉత్పత్తిని ప్రోత్సహించే ఆహార పదార్థాలు క్యారెట్, నల్లనువ్వులు, ఉసిరి, ఆకుకూరలు, వాల్‌నట్స్, సాల్మన్ చేపలు, పుట్టగొడుగులు వంటివి ఆహారంలో చేర్చాలి. అలాగే నువ్వుల నూనె, మెంతుల పొడి కలిపి తలకు మసాజ్ చేయడం వంటి ఇంటి చిట్కాలు ప్రయోజనం ఇస్తాయి. చివరగా, తెల్లజుట్టు అనేది అనారోగ్యం కాదు కానీ శరీరం ఇచ్చే ఒక సంకేతం. ఈ సంకేతాన్ని నిర్లక్ష్యం చేయకుండా, మన ఆరోగ్యాన్ని బలోపేతం చేసుకోవాలని నిపుణులు సూచిస్తున్నారు.