BRS: బీఆర్ఎస్ పార్టీ ఏర్పాటు అయ్యి రెండున్నర దశాబ్దాలు కావచ్చున్న వేళ, మళ్లీ పూర్వ వైభవాన్ని సంపాదించుకోవాలన్న లక్ష్యంతో ఎల్కతుర్తిలో భారీ బహిరంగ సభను ప్లాన్ చేసింది. ఏప్రిల్ 27న జరిగే ఈ సభ ద్వారా ప్రజల్లో మళ్లీ నమ్మకాన్ని కలిగించాలని గులాబీ పార్టీ యత్నిస్తోంది. అయితే, సభకు సంబంధించి ఏర్పాట్లు ఎంత అద్భుతంగా జరుగుతున్నాయో, అంతే సందేహాలూ గుసగుసలూ కూడా వినిపిస్తున్నాయి.
తొలుత హైదరాబాద్‌లో సభ ఏర్పాటు చేయాలనుకున్నా, అనుమతుల చికాకుల కారణంగా చోటు మారుతూ వరంగల్‌గా ఫిక్స్ చేశారు. దీనికి కారణం ఉత్తర తెలంగాణలో పార్టీకి ఉన్న బలం, అలాగే అక్కడి నుంచి ఖమ్మం, నల్గొండ వరకు ప్రభావం చూపాలన్న ఆశ. కానీ సభకు సహకరించాల్సిన స్థానిక నేతల నుంచి ఆశించిన స్థాయిలో స్పందన లేకపోవడంపై పార్టీ హైకమాండ్ ఆందోళన చెందుతోంది.
ఇటీవల వరుస ఓటముల తర్వాత పార్టీ ఆత్మవిశ్వాసం కోల్పోయినట్టే కనిపిస్తోంది. గత పదేళ్లలో అధికారం దగ్గర ఉన్న నేతలే ఇప్పుడు దూరంగా వ్యవహరించడమే కాక, సభ ఖర్చుల విషయమై చేతులు ఎత్తేస్తున్నారు. “ఇప్పుడు గుర్తొచ్చామా?” అంటూ పలువురు అసంతృప్తి వ్యక్తం చేస్తున్నట్టు తెలుస్తోంది. దీంతో పార్టీ హైకమాండ్ నేతలకు ప్రత్యేకంగా మద్దతు కోరుతోంది.
ఇక ఈ సభను పూర్తిగా కాంగ్రెస్ ప్రభుత్వంపై విమర్శలకే వినియోగించాలన్న యోచన పార్టీ పెద్దల్లో ఉంది. బీజేపీని టార్గెట్ చేయడం వల్ల లేనిపోని వివాదాలు తలెత్తుతాయన్న అభిప్రాయంతో, ఫోకస్ పూర్తిగా రేవంత్ పాలనపైనే ఉండాలన్నదే పార్టీ ఆలోచన. కొందరు నేతలకు ఇప్పటికే ఈ విషయంలో క్లారిటీ ఇచ్చినట్టు సమాచారం.
బీఆర్ఎస్‌కి ఇప్పుడు నమ్మకంతో పాటు, నడిచే శక్తి అవసరం. ఈ సభతో కారు పార్టీ తిరిగి గాడిలో పడుతుందా లేక అంతర్గత అసంతృప్తులు మరింత బహిరంగమవుతాయా అన్నది వేచి చూడాల్సిన అంశం. రానున్న ఆరు రోజులు బీఆర్ఎస్‌కు పరీక్షల సమానంగా మారబోతున్నాయి.
