ఆంధ్రప్రదేశ్ ప్రజలకు పారదర్శకమైన, ఆధునిక సేవలు అందించేందుకు రాష్ట్ర ప్రభుత్వం మరో పెద్ద అడుగు వేసింది. ఈ నెల 25 నుంచి తొమ్మిది జిల్లాల్లో స్మార్ట్ రేషన్ కార్డుల పంపిణీ ప్రారంభం కానుందని రాష్ట్ర ఆహార, పౌరసరఫరాల శాఖ మంత్రి నాదెండ్ల మనోహర్ ప్రకటించారు. ఈ తొలి విడతలో శ్రీకాకుళం, విజయనగరం, విశాఖపట్నం, ఈస్ట్ గోదావరి, వెస్ట్ గోదావరి, ఎన్టీఆర్, కృష్ణా, నెల్లూరు, తిరుపతి జిల్లాల లబ్ధిదారులకు ఈ స్మార్ట్ కార్డులు ఇవ్వబడతాయి.
మంత్రి మాట్లాడుతూ ఈ కొత్త కార్డులు పూర్తిగా ఆధార్ లింక్ తో అనుసంధానమై ఉంటాయని.. తద్వారా ఎలాంటి బోగస్ కార్డులు, మధ్య వర్తుల అవకతవకలు నివారించవచ్చని తెలిపారు. కార్డు వివరాలు QR కోడ్, ఎలక్ట్రానిక్ చిప్ ద్వారా డిజిటల్గా ధృవీకరించబడతాయి. లబ్ధిదారులు ఇకముందు రాష్ట్రంలో ఎక్కడ ఉన్నా e-PoS యంత్రాలు ఉన్న ఏ ఫేర్ ప్రైస్ షాప్లోనైనా తన రేషన్ పొందగలరని ఆయన వివరించారు. ప్రతి లావాదేవీపై తక్షణమే SMS అలర్టులు పంపబడతాయని, ఫిర్యాదుల పరిష్కారం కోసం ప్రత్యేక హెల్ప్లైన్ ఏర్పాటు చేస్తామని చెప్పారు.
ప్రభుత్వం ఈ కార్య క్రమాన్ని అత్యంత ప్రతిష్ఠాత్మకంగా తీసుకుంటోందని మంత్రి స్పష్టం చేస్తూ, వచ్చే మూడు నెలల్లో మిగిలిన జిల్లాల్లో కూడా కార్డుల పంపిణీ విస్తరించనుందని తెలిపారు. దీంతో మొత్తం రాష్ట్రానికి సమానంగా రేషన్ సదుపాయాన్ని పారదర్శకంగా అందించే అవకాశం ఉందన్నారు. ప్రజలు కూడా ఈ కొత్త విధానంపై సంతృప్తి వ్యక్తం చేస్తున్నారు.
ఎక్కడ ఉన్నా రేషన్ పొందగలమనే సౌలభ్యం ఎంతో ఉపశమనం కలిగిస్తోందని, ఇకపై కార్డు సమస్యలు లేదా అవకతవకలు తలెత్తకుండా నేరుగా సేవలు అందుతాయని వారు అభిప్రాయపడ్డారు. ముఖ్యంగా నగరాలు, పట్టణాల్లో పని కోసం వెళ్లే గ్రామీణ ప్రజలకు ఈ సదుపాయం మరింత ఉపయోగకరంగా ఉంటుందని ఫీడ్బ్యాక్ లభిస్తోంది. భవిష్యత్తులో రేషన్ సరఫరా వ్యవస్థ మొత్తం డిజిటల్ ఆధారంగానే నడపాలని ప్రభుత్వం సంకల్పించిందని, ఈ స్మార్ట్ కార్డుల పంపిణీ ఆ దిశగా కీలకమైన ప్రారంభమని విశ్లేషకులు అభిప్రాయపడుతున్నారు.