ప్రస్తుతం దేశ రాజకీయాల్లో రాఘవ్ చడ్ఢా అనే పేరు హాట్ టాపిక్ గా మారిన సంగతి తెలిసిందే. సాధారణంగా ఓ పార్టీ నుంచి ఎంపీలు మరోపార్టీలోకి వెళ్లడం సహజమే.. ఆప్ కి అది మరింత గట్టిగా తగిలింది అదీ కొన్ని సందర్భాల్లో సహజమే. అయితే… ఓ ఎంపీ పార్టీ మారిన విషయం ఈ స్థాయిలో వైరల్ అవ్వడం మాత్రం ఇటీవల కాలంలో తొలిసారని అంటున్నారు పరిశీలకులు. ఆ ఎంపీనే… రాఘవ్ చడ్ఢా కాగా… ఆయన ఆప్ నుంచి బీజేపీకి వెళ్లడం సోషల్ మీడియా జనాలకు, జెన్ జెడ్ తో పాటు పలువురుకి ఏమాత్రం నచ్చడం లేదని తెలుస్తోంది.
అవును… ఆప్ రాజ్యసభ ఎంపీ, సోషల్ మీడియాలో, యువతలో మంచి ఫాలోయింగ్ ఉన్న ఎంపీ, పైగా ఇటీవల పార్లమెంట్ సాక్షిగా పలు కీలక విషయాలపై ఎన్డీయే ప్రభుత్వాన్ని కడిగి పారేసినట్లు మాట్లాడటంతో మరింతగా ప్రజల్లో ఫాలోయింగ్ సంపాదించుకున్న ఎంపీ.. తాజాగా పార్టీ మారారు. అయితే.. భారతదేశ రాజకీయాల్లో రకరకాల కారణాలతో కండువాలు మార్చేవారికి కొదవేమీ లేనప్పటికీ.. చడ్ఢా విషయంలో మాత్రం జనాలు అలా అనుకోవడం లేదు! ఆయన చేసిన పనిని చాలా చెడ్డ పనిగా చూస్తున్నారు!
ఎందుకంటే… రాఘవ్ చడ్ఢాను ఒక సాధారణ రాజకీయ నాయకుడి కంటే ఒక ‘ఐకాన్’ లాగా చూసిన వారే ఎక్కువ. ఆయన గ్లామరస్ లుక్, మాట్లాడే తీరు యువతను బాగా ఆకట్టుకునేవి. ఆయనలో ఒక కొత్త తరహా రాజకీయాన్ని యువత చూశారు. కొత్త తరానికి ఈయన కీలక నేతగా మారే అవకాశాలు పుష్కలమని నమ్మారు. అయితే… ఆయన సడన్ గా పార్టీ మారారు.. అది కూడా.. తన, తన పార్టీ సిద్ధాంతాలకు పూర్తిగా వ్యతిరేకమైన బీజేపీలోకి వెళ్లారు!
దీన్నే యువత జీర్ణించుకోలేకపోతున్నారు! ఆమ్ ఆద్మీ పార్టీ యువ కిశోరంగా, విద్యావంతుడైన నాయకుడిగా భావించి అతన్ని విపరీతంగా ఫాలో అయిన నెటిజన్లు లైట్ తీసుకుంటున్నారు. అతనిలో ఒక కొత్త తరహా రాజకీయాన్ని చూసిన యువత, ఆయన కూడా గోడ మీద పిల్లి తరహా రాజకీయాల బాట పట్టడం జీర్ణించుకోలేకపోతునారని అంటున్నారు. ఈ సందర్భంగా వారి నిరసనను సోషల్ మీడియాలో పోస్టులు, ఆయనను అన్ ఫాలో చేయడాలతో తెలియజేస్తున్నారు.
వాస్తవానికి ఇన్ స్టాలో రాఘవ్ చడ్ఢాకు దాదాపు 14.6 మిలియన్ల మంది ఫాలోవర్లు ఉండేవారు. కానీ… ఎప్పుడైతే ఆయన బీజేపీలో చేరారో.. అప్పటి నుంచి ఆయన గ్రాఫ్ దిగిపోవడం మొదలైంది. ఫలితంగా ఆ సంఖ్య ఒక్క రోజులోనే 13.7 మిలియన్లకు పడిపోయింది. అంటే… 24 గంటల వ్యవధిలోనే దాదాపు 10 లక్షల మంది ఆయనను అన్ ఫాలో చేశారన్నమాట. దీంతో.. ఆయన నిర్ణయంపై యువతలో ఉన్న అసంతృప్తికి ఇది నిదర్శనం అని అంటున్నారు పరిశీలకులు.
అక్కడితో ఆగ్రహం తగ్గినట్లు లేదు.. ఈ సమయంలో… “అన్ ఫాలో రాఘవ్ చద్దా”, “హీరో టు జీరో” లాంటి హ్యాష్ ట్యాగ్ లు ట్రెండ్ అవుతున్నాయి. ఇదే సమయంలో… అవినీతి రహిత రాజకీయాలు చేస్తారని, సామాన్యుల గొంతుకగా ఉంటారని నమ్మిన యువత.. చడ్ఢా నిర్ణయాన్ని ఒక రాజకీయ అవకాశవాదంగా అభివర్ణిస్తున్నారు. “పంజాబ్ దా గద్దర్” అంటూ ఘాటైన కామెంట్లతో సోషల్ మీడియాలో హోరెత్తిస్తున్నారు!
కాగా… మాజీ ముఖ్యమంత్రి అరవింద్ కేజ్రీవాల్ నేతృత్వంలోని ఆమ్ ఆద్మీ పార్టీకి భారీ షాక్ తగిలిన సంగతి తెలిసిందే. ఆ పార్టీకి రాజ్యసభలో ఉన్న 10 మంది ఎంపీల్లో ఏడుగురు తిరుగుబాటు బావుటా ఎగుర వేశారు.. ఆప్ ను వీడి బీజేపీలో విలీనమవుతున్నట్లు ప్రకటించారు.
ఇక్కడ మరో కీలక విషయం ఏమిటంటే.. కేజ్రీవాల్ కు అత్యంత సన్నిహితుడిగా పేరున్న రాజ్యసభ ఎంపీ రాఘవ్ చడ్ఢా ఈ చీలికకు నేతృత్వం వహించారు. తనతో పాటు మరో ఆరుగురు ఆప్ రాజ్యసభ ఎంపీలు బీజేపీలో విలీనం కానున్నట్లు విలేకరుల సమావేశంలో రాఘవ్ ప్రకటించారు.
ఈ సందర్భంగా స్పందించిన చడ్ఢా… ఏ ఉద్దేశాలతో ఆప్ ఏర్పడిందో వాటికి దూరంగా జరిగిందని.. కొన్నేళ్లుగా దేశం కోసం కాకుండా వ్యక్తిగత ప్రయోజనాల కోసం పనిచేస్తోందని.. తాను వారి నేరాల్లో భాగం కావాలని అనుకోవడం లేదని.. సరైన పార్టీలో ఉన్న భావన నాలో లేదని.. అందుకే ఆప్ నకు దూరమై, ప్రజలకు దగ్గరవుతున్నానని ప్రకటించారు. ఈ సందర్భంగా కాషాయ పార్టీలోకి వెళ్లారు!
ఈ పరిణామాలపై… ఢిల్లీ మాజీ ముఖ్యమంత్రి, ఆప్ జాతీయ కన్వీనర్ అరవింద్ కేజ్రీవాల్ స్పందించారు. బీజేపీ తన చర్యలతో మరోసారి పంజాబీలను గట్టి దెబ్బ కొట్టిందని తెలిపారు. ఇదే సమయంలో… వీరందరికీ పార్టీ, పంజాబ్ ప్రజలు దిగువస్థాయి నుంచి ఉన్నత స్థానాలకు చేరుకొనే అవకాశం కల్పించారని… అయితే, చడ్ఢాతో పాటు ఈ ఏడుగురూ రాష్ట్ర ప్రజలను వెన్నుపోటు పొడిచారని ఆప్ ఎంపీ సంజయ్ సింగ్ ఆగ్రహం వ్యక్తం చేశారు.
ఏది ఏమైనా… రాఘవ్ చడ్ఢా, ఆప్ ను వదిలిపెట్టడం ఒకెత్తు అయితే, అందుకు పూర్తి భిన్నంగా చెప్పే బీజేపీలోకి చేరడం, పైగా దానిపై స్పందించిన ఆయన… తాను ఆప్ నకు దూరమై, ప్రజలకు దగ్గరవుతున్నాను అని ప్రకటించడం ఇప్పుడు తీవ్ర చర్చనీయాంశంగా మారుతోంది.