TDP Leader Somireddy – YS Jagan: వైఎస్ కుటుంబంలో ముదిరిన ఆస్తుల తగాదాపై టీడీపీ సీనియర్ నేత సోమిరెడ్డి చంద్రమోహన్ రెడ్డి తీవ్రస్థాయిలో ధ్వజమెత్తారు. వైఎస్ జగన్ మోహన్ రెడ్డి తన స్వార్థం కోసం కన్నతల్లిని, చెల్లిని కూడా లెక్కచేయకుండా కుటుంబాన్ని రోడ్డుపైకి ఈడ్చారని ఆయన మండిపడ్డారు. శనివారం ఆయన మీడియాతో మాట్లాడుతూ వైఎస్ కుటుంబ గొడవలు, జగన్ తీరుపై ఘాటు విమర్శలు చేశారు.
తల్లి అఫిడవిట్టే జగన్ తీరుకు నిదర్శనం, కన్నతల్లి విజయమ్మే స్వయంగా అఫిడవిట్ విడుదల చేసి ఆవేదన వ్యక్తం చేయడం చూస్తుంటే పరిస్థితి ఎంత దారుణంగా ఉందో అర్థమవుతుందని సోమిరెడ్డి అన్నారు. “ఒక తల్లి తన కుమారుడికి వ్యతిరేకంగా కోర్టులో అఫిడవిట్ వేయాల్సి రావడం అత్యంత బాధాకరం. తన రాజకీయ, ఆర్థిక స్వార్థం కోసం జగన్ కుటుంబాన్ని ఏ స్థాయికి దిగజార్చారో దీనిని బట్టే తెలుస్తోంది” అని ఆయన విమర్శించారు.
అక్రమ ఆస్తులు.. సొంత మీడియాలో విషప్రచారం రాజశేఖర్ రెడ్డి ముఖ్యమంత్రిగా ఉన్న సమయంలో అధికారాన్ని అడ్డుపెట్టుకుని జగన్ వేల కోట్లు గడించారని సోమిరెడ్డి ఆరోపించారు. తండ్రి అధికారాన్ని వాడుకుని సంపాదించిన ఆస్తుల్లో తల్లికి, చెల్లి షర్మిలకు వాటా ఇవ్వకుండా జగన్ అన్యాయం చేస్తున్నారని ఆగ్రహం వ్యక్తం చేశారు. సొంత తల్లికి వ్యతిరేకంగా తన మీడియా సంస్థల్లోనే కథనాలు రాయించడం జగన్ దిగజారుడు తనానికి పరాకాష్ట అని ఆయన దుయ్యబట్టారు. ఆస్తుల కోసం తల్లిని కోర్టుల చుట్టూ తిప్పడం వైఎస్సార్ ఆశయాలకే విరుద్ధమని సోమిరెడ్డి పేర్కొన్నారు.
లోకేశ్ను చూసి నేర్చుకో.. ఇదే సందర్భంలో నారా లోకేశ్ ప్రవర్తనను, జగన్ తీరుతో సోమిరెడ్డి పోల్చారు. “ఒకవైపు జగన్ ఆస్తుల కోసం ఇంట్లో చిచ్చులు పెడుతుంటే, మరోవైపు నారా లోకేశ్ తన తండ్రి చంద్రబాబుపై అక్రమ కేసులు పెట్టినప్పుడు సింహంలా పోరాడారు. తండ్రి గౌరవం కోసం నిరంతరం శ్రమించి, మళ్ళీ ఆయన్ను ముఖ్యమంత్రి పీఠంపై కూర్చోబెట్టే వరకు విశ్రమించలేదు” అని కొనియాడారు.
కుటుంబ విలువలకు ప్రాధాన్యత ఇచ్చే లోకేశ్కు, ఆస్తుల కోసం కుటుంబాన్ని వేధించే జగన్కు నక్కకు లోకానికి ఉన్నంత తేడా ఉందని సోమిరెడ్డి విశ్లేషించారు. వైఎస్సార్ పేరు చెప్పుకుని రాజకీయం చేసే జగన్, ఆయన కుటుంబాన్ని గౌరవించడంలో మాత్రం పూర్తిగా విఫలమయ్యారని ఆయన ఎద్దేవా చేశారు.
