ఇందులో డిస్కషన్కి తావేముంది.? జనసేన పార్టీ అంటే పవన్ కళ్యాణ్. పవన్ కళ్యాణ్ అంటే జనసేన పార్టీ. జనసేన పార్టీలో వన్ అండ్ ఓన్లీ పవన్ కళ్యాణ్. అభిమానులు కొంత ఆర్థిక సాయం చేస్తున్నప్పటికీ, జనసేన పార్టీ ఆర్థిక భారమంతా పవన్ కళ్యాణ్దే. ఆర్థిక భారమొక్కటే కాదు, రాజకీయ భారం కూడా ఆయనొక్కడిదే.
పవన్ కళ్యాణే జనసేన పార్టీకి బలం. అదే సమయంలో ఆయనే ఆ పార్టీకి బలహీనత. పార్టీకి ఆర్థిక పుష్టి కలిగించాలంటే, పవన్ కళ్యాణ్ సినిమాలు చేయాలి. కానీ, రాజకీయంగా జనసేన పార్టీని బలోపేతం చేయాలంటే.. రాజకీయంగా పవన్ కళ్యాణ్ యాక్టివ్గా వుండాలి. పదునైన రాజకీయ వ్యూహాలతో రాజకీయ ప్రత్యర్థుల్ని ముప్పు తిప్పలు పెట్టేలా వ్యవహరించాలి.
కానీ, జనసేన పుట్టింది మొదలు ఇప్పటిదాకా జనసేన అధినేత పదునైన రాజకీయ వ్యూహం రచించిందే లేదు. వైసీపీ ఆరోపిస్తోందని కాదుగానీ, చంద్రబాబు చాటు రాజకీయం పవన్ కళ్యాణ్ ఇంకెన్నాళ్ళు చేస్తారు.? తెలుగుదేశం పార్టీ కూడా, ‘మేం మీకు సీట్లు బిచ్చం వేస్తాం..’ అనే స్థాయికి జనసేనపై విసుర్లు విసురుతోంది.
‘టీడీపీకి అమ్ముడుపోయిన జనసేన’ అన్న విమర్శల్ని ఘాటుగా తిప్పి కొట్టడంలో పవన్ కళ్యాణ్ వ్యూహాత్మక వైఫల్యం స్పష్టంగా కనిపిస్తోంది. అధికారం కోసం తొందర లేదన్నప్పుడు.. అత్యంత వ్యూహాత్మకంగా పార్టీని బలోపేతం చేసుకోవాలి. ఈ క్రమంలో ఫక్తు రాజకీయ పార్టీల్ని దూరం పెట్టాల్సి వుంటుంది.
లేదూ, రాజకీయ పార్టీ చేయాల్సింది రాజకీయమేననుకుంటే, అదైనా నిఖార్సుగా చేయాలి. కానీ, ఇక్కడా అర్థం పర్థం లేని రాజకీయం చేస్తున్నారు జనసేనాని. జనసేన పార్టీకి కరడుగట్టిన జనసైనికుల బలం వుంది. దాన్ని సమర్థవంతంగా ఉపయోగించుకోలేకపోవడం నాయకత్వ వైఫల్యమే.