Pawan Kalyan : అభిమానుల్లో కొందరు దురభిమానులుంటారు. రాజకీయ పార్టీల్లో సహజంగానే ఇలాంటి పరిస్థితులు కనిపిస్తుంటాయి. సినీ హీరోల సంగతి సరే సరి. హీరోయిన్లకీ దురభిమానులతో తిప్పలు తప్పవు. హీరోయిన్ల పరిస్థితి వేరు. రాజకీయ నాయకుల సంగతి వేరు. పవన్ కళ్యాణ్ లాంటి సినీ, రాజకీయ నాయకుడి విషయంలో పరిస్థితులు ఇంకాస్త భిన్నంగా వుంటాయ్.
గతంలో మెగాస్టార్ చిరంజీవి కూడా కొన్ని ఇబ్బందికర పరిస్థితులు ఎదుర్కొన్నారు అభిమానులు, అప్పటి ప్రజారాజ్యం పార్టీ కార్యకర్తల అత్యుత్సాహం కారణంగా. ఇప్పుడు పవన్ కళ్యాణ్ పరిస్థితి అంతకన్నా దారుణంగా తయారైంది.
పవన్ కళ్యాణ్ అనగానే ఎర్ర టవల్ కామన్ అయిపోయింది. ఆ టవల్తో అభిమానులు చేసే పబ్లిసిటీ స్టంట్లు అన్నీ ఇన్నీ కావు. అదొక డ్రెస్ కోడ్లో భాగమైపోయింది పవన్ అభిమానులు, జనసేన కార్యకర్తలకి. అయితే, ఆ టవల్ని నీళ్ళతో తడిపి, పవన్ కళ్యాణ్ మీద విసిరేస్తున్నారు. ఒక్కోసారి అది పవన్ కళ్యాణ్కి గట్టిగానే తగిలేస్తోంది.
ఇంకోపక్క, పవన్ కళ్యాణ్ జనంలోకి వెళితే.. అభిమానుల్ని కంట్రోల్ చెయ్యడం పోలీస్ సెక్యూరిటీకీ, అలాగే పర్సనల్ సెక్యూరిటీకీ చాలా చాలా కష్టంగా మారుతోంది. నిన్న నర్సాపురం పర్యటనలో భాగంగా పవన్ కళ్యాణ్ తృటిలో పెను ప్రమాదం తప్పించుకున్నారు. ఆ ప్రమాదానికి కారణం కూడా ఓ అభిమాని.
అభిమానమా.? దురభిమానమా.? కారణం ఏదైనాగానీ, పవన్ కళ్యాణ్ చేతి స్పర్శ అందుకోవడం కోసమో, మీడియాలో హైలైట్ అవ్వాలనో.. కొందరు ఆయన మీదకు దూసుకెళుతుంటారు. అలా దూసుకొచ్చిన ఓ వ్యక్తి పవన్ కళ్యాణ్ని కింద పడేశాడు. అప్పటికి పవన్ కారు మీద నిల్చుని వున్నారు. పవన్ గనుక కారు మీద నుంచి కింద పడిపోయి వుంటే.? పెను ప్రమాదమే సంభవించేది.
ఇలాంటి అభిమానుల విషయంలో పవన్, ఆయన సెక్యూరిటీ సిబ్బంది ఒకింత అప్రమత్తంగా వుండకపోతే, ముందు ముందు ఇంకా కష్టమైపోతుంది.