ప్రపంచ ఆదివాసీ దినోత్సవాన్ని పురస్కరించుకుని ఆగస్టు 9, 2025న పాడేరులో జరిగిన రాష్ట్ర స్థాయి వేడుకల్లో ఆంధ్రప్రదేశ్ ముఖ్యమంత్రి నారా చంద్రబాబు నాయుడు ముఖ్య అతిథిగా పాల్గొన్నారు. ఈ కార్యక్రమం “గిరిజనుల హక్కుల పరిరక్షణ – కృత్రిమ మేధస్సు, ఆదివాసీల భవిష్యత్తు” అనే ఇతివృత్తంతో జరిగింది.
ఈ సందర్భంగా ముఖ్యమంత్రి చంద్రబాబు నాయుడు స్థానిక గిరిజన సంప్రదాయ వేడుకల్లో పాలుపంచుకున్నారు. అనంతరం వంజంగిలో వనదేవత మోదకొండమ్మను దర్శించుకున్నారు. గిరిజనుల ఇళ్లకు వెళ్లి వారి కష్టసుఖాలను అడిగి తెలుసుకున్నారు. కాఫీ రైతులు, స్థానిక గిరిజనులతో ముచ్చటించారు.
ఈ పర్యటనలో భాగంగా ముఖ్యమంత్రి పలు అభివృద్ధి కార్యక్రమాలకు శంకుస్థాపనలు మరియు ప్రారంభోత్సవాలు చేశారు. గిరిజన ప్రాంతాల్లో రోడ్లు, వంతెనల నిర్మాణం ద్వారా 2075 గ్రామాలను అనుసంధానించనున్నట్లు ప్రకటించారు. అల్లూరి జిల్లాలో రోడ్ల కారిడార్లు, మల్టీ స్పెషాలిటీ ఆసుపత్రులు, పాడేరులో వైద్య కళాశాల నిర్మాణ పనులను ప్రభుత్వం చేపడుతోందని వెల్లడించారు.
సికిల్ సెల్ ఎనీమియా బాధితులకు ‘మిషన్-2047’ కింద నెలకు రూ. 10,000 ఫించన్ అందజేయనున్నట్లు ప్రకటించారు. జల్ జీవన్ మిషన్ ద్వారా 13,816 ఆవాసాలకు మంచినీటి సరఫరా చేయనున్నట్లు తెలిపారు. అరకు కాఫీ విస్తరణకు రూ. 202 కోట్లు కేటాయించనున్నట్లు పేర్కొన్నారు.
గిరిజన ప్రాంతాలను మైదాన ప్రాంతాలతో సమానంగా అభివృద్ధి చేసి, ఆదివాసీల జీవితాల్లో వెలుగులు నింపడమే తమ ప్రభుత్వ లక్ష్యమని ముఖ్యమంత్రి చంద్రబాబు నాయుడు స్పష్టం చేశారు.
