ఆంధ్ర ప్రదేశ్: ప్రతిపక్ష నేత చంద్రబాబు గురువారం మీడియా సమావేశంలో మాట్లాడుతూ అధికార ప్రభుత్వం మీద తీవ్ర విమర్శలు చేశారు. తన వయసు,ఆరోగ్యం గురించీ ఆలోచించకుండా నిగ్రహం కోల్పోయి ఆవేశంలో గట్టి గట్టిగా అరిచేశారు. చంద్ర బాబు మాట్లాడుతూ… మా ఇళ్ల పైకి రాత్రిళ్లు వందలాది పోలీసులను పంపి, గోడలు దూకించి అరెస్ట్ లు చేయిస్తారా ? ముందస్తు నోటీసులు కూడా ఇవ్వరా ? మేం సంఘ విద్రోహ శక్తులమా ? మీకు ఆ మాత్రం ఇంగిత జ్ఞానం కూడా లేదా ? మేం ఎవరినైనా చంపేశామా ? దేవినేని ఉమా మహేశ్వర రావును అనేక పోలీస్ స్టేషన్లకు మార్చిమార్చి తిప్పారు. ఆయన ఏం చేశారో ఇంతవరకు చెప్పలేదు.
ఒక బూతుల మంత్రి, రౌడీ మంత్రి ఏం మాట్లాడారో చూశాం. ఇంటికొచ్చి కొడతానని దేవినేని ఉమామహేశ్వరరావుని అంటాడా, నాపై కూడా దుర్భాషలు మాట్లాడాడు. ఏంటి నీ అహంభావం… ఒళ్లు దగ్గరపెట్టుకుని మాట్లాడాలి. ఇన్నాళ్లూ ప్రజా సేవలో ఉండి మీ దగ్గర దెబ్బలు తినడానికి మేం ఇక్కడ ఉన్నామా…? ప్రజలకు సేవ చేయడానికి మేం ఉన్నాము, మీ దగ్గర దెబ్బలు తినడానికి కాదు అంటూ కొడాలి నానికి గట్టిగా కౌంటర్ ఇచ్చారు.
అనంతపురంలో వైసీపీ ఎమ్మెల్యే పెద్దారెడ్డి టీడీపీ మాజీ ఎమ్మెల్యే జేసీ ప్రభాకర్ రెడ్డి ఇంటిపైకి వెళతాడా ? పోలీసులు తలుపులు తీసి అతని దౌర్జన్యాలకు సహకరిస్తారా ? సిగ్గులేదా మీకు ? ఇది డెకాయిట్ విధానం కాదా ? వైసీపీ ఎమ్మెల్యే ప్రసన్నకుమార్ రెడ్డి ఎస్పీని ఇష్టారాజ్యంగా మాట్లాడితే, ఆయనపై ఎలాంటి కేసు పెట్టరా ? తన ఇంట్లో తలుపులు తీసిన పోలీసులను ప్రశ్నించాడని, జేసీ ప్రభాకర్ రెడ్డిపై కేసులు పెట్టారు, మరి జిల్లా ఎస్పీని నిందించిన ప్రసన్నకుమార్ రెడ్డిపై ఎందుకు కేసు పెట్టలేదో డీజీపీ సమాధానం చెప్పాలన్నారు.
దేవాలయాలపై అనేక దాడులు జరిగాయి. దాడులు చేసిన వారిపై కేసులు పెట్టకుండా, వారిని పట్టుకోవడం చేతకాక, లాలూచీపడి, చివరకు ప్రశ్నించిన మా పై కేసులు పెడతారా ? ఎవరిని బెదిరిస్తారు ? మీరేమైనా మోనార్క్ అనుకుంటున్నారా ? అందరినీ సమానంగా చూడాలి. పాస్టర్ ప్రవీణ్ చక్రవర్తి ఎంత వల్గర్ గా మాట్లాడారో మనం చూశాం. ఇతను ఇప్పుడెక్కడ ఉన్నాడు ? డీజీపీ ఇంట్లో ఉన్నాడా, లేక జగన్ రెడ్డి ఇంట్లో ఉన్నాడా? ఎందుకీ రాయల్ ట్రీట్ మెంట్ ? పాస్టర్ ప్రవీణ్ చక్రవర్తి వెనుక ఉన్నదెవరు ? కడపలో బ్యాంక్ అకౌంట్ అతనికి ఎందుకు ఉంది ? రహస్యంగా ఆయనను ఎందుకు విచారిస్తున్నారో సమాధానం చెప్పాలి. వీడియోలు, రికార్డులు లేవా సాక్ష్యంగా ? ఒక మతంపై కక్షగట్టినట్లు మీరు బిహేవ్ చేస్తుంటే, మేము అడగటం తప్పా అంటూ ప్రభుత్వాన్ని చంద్రబాబు ప్రశ్నలతో ఏకిపారేశారు.