ఏళ్ళు గడుస్తున్నాయ్గానీ జనసేన పార్టీ పరిస్థితి ఎక్కడ వేసిన గొంగళి అక్కడే అన్నట్లుగా తయారైంది. అంతకు మించి, జనసేన గురించి ఏం మాట్లాడుకోవడానికి లేదా.? ఏమో, ప్రస్తుతానికైతే అంతేనేమో.! ఇప్పుడున్న రాజకీయాల్లో కార్యకర్తలు పార్టీ కోసం నిస్వార్ధంగా ఖర్చు చేయడం అనేది జనసేన పార్టీలోనే కనిపిస్తోంది. అధినేత సైతం, పార్టీ కోసం కష్టపడుతున్నమాట వాస్తవం. నాయకులు కూడా, పార్టీ కోసం కమిటెడ్గానే పనిచేస్తున్నారు. అన్నీ వున్నా అల్లుడి నోట్లో శని.. అన్నట్టు తయారైంది జనసేన పరిస్థితి.
ఎందుకిలా.? ఎందుకంటే, నిలకడలేమి.! ఔను, సినిమాల్ని పూర్తిగా వదిలేస్తానని గతంలో చెప్పింది జనసేన అధినేతే. మళ్ళీ ఆయనే జనసేన కోసమే సినిమాలు చేస్తానన్నారు. పవన్ కళ్యాణ్కి ఎవరో కౌంటర్ ఎటాక్ ఇవ్వాల్సిన పనిలేదు. ఆయన వ్యాఖ్యలకు ఆయనే కౌంటర్ ఎటాక్ ఇచ్చేసుకుంటుంటారు. అదే అసలు సమస్య.
పాచిపోయిన లడ్డూలన్నారు.. మళ్ళీ బీజేపీతోనే కలిశారు. చంద్రబాబుతో మాత్రం బంధాన్ని తెంచుకోవడానికి మొహమాటపడుతున్నారు. ఇంకో ఆవిర్భావ దినోత్సవం వచ్చేస్తోంది. హంగామా షురూ అయ్యింది. ‘అధికారంలోకి వచ్చేది మేమే’ అంటున్నారు జనసైనికులు. అధినేత పవన్ కళ్యాణ్ మాత్రం, టీడీపీతో అంటకాగే దిశగా అడుగులేస్తున్నారు. ‘మేం, టీడీపీతో కలిసి వెళ్ళబోం’ అని కార్యకర్తలు గట్టిగా చెప్పలేని పరిస్థితి.
2019 తర్వాత జనసేన ఏంటి.? అన్నది అందరికీ తెలుసు. 2024 తర్వాత కూడా అంతేనా.?