అమరావతిని వేగంగా అభివృద్ధి చేయాలనే లక్ష్యంతో ముందుకు సాగుతున్న చంద్రబాబు ప్రభుత్వం, రాజధాని నిర్మాణ పనులను మళ్లీ పట్టాలెక్కించేందుకు అన్ని ప్రయత్నాలు చేస్తోంది. గత ఐదేళ్లుగా వర్షాలకు, నిర్లక్ష్యానికి నాసిరకంగా మారిన నిర్మాణాలను తేలికపాటి శుభ్రపరిచిన తర్వాత, నిర్మాణ పనులను టెండర్ల దశకు తీసుకురావాలని నిర్ణయించింది. ఫిబ్రవరిలో టెండర్ల ప్రక్రియ పూర్తి కావాల్సి ఉండగా, ఇంతలోనే రాష్ట్రంలో ఎమ్మెల్సీ ఎన్నికల కోడ్ అడ్డుపడింది.
కృష్ణ-గుంటూరు పట్టభద్రుల ఎమ్మెల్సీ ఎన్నికల కోడ్ అమల్లో ఉండటంతో, టెండర్ల ప్రక్రియపై అనిశ్చితి నెలకొంది. అయితే, ఈ ఆలస్యాన్ని తట్టుకోలేని రాష్ట్ర ప్రభుత్వం కేంద్ర ఎన్నికల సంఘానికి లేఖ రాసి అనుమతి కోరింది. వెంటనే స్పందించిన కేంద్ర ఎన్నికల సంఘం, అమరావతి అభివృద్ధి పనులను అడ్డుకోవాల్సిన అవసరం లేదని స్పష్టం చేసింది. టెండర్ల ప్రక్రియ కొనసాగించవచ్చని గ్రీన్ సిగ్నల్ ఇచ్చింది.
అయితే, టెండర్ల ప్రక్రియను ముందుకు తీసుకువెళ్లినా, వాటి ఖరారు మాత్రం ఎన్నికల ప్రక్రియ ముగిసిన తర్వాత చేయాలని స్పష్టం చేసింది. మార్చి 3తో ఎమ్మెల్సీ ఎన్నికల కోడ్ ముగిసే వరకు కొన్ని కీలక పనులను ప్రస్తుతానికి నిలిపివేయాల్సిన పరిస్థితి ఏర్పడింది. ఇది చంద్రబాబు ప్రభుత్వానికి ఊరట కలిగించిన అంశమే. గత ఐదేళ్లలో అమరావతి అభివృద్ధిని పూర్తిగా అడ్డుకునే విధంగా సాగిన నిర్ణయాలను వెనక్కి తిప్పుతూ, మళ్లీ రాజధాని నిర్మాణాన్ని శరవేగంగా మొదలుపెట్టేందుకు సర్కార్ సిద్ధమవుతోంది. ఎన్నికల కోడ్ ముగిసిన వెంటనే టెండర్ల ప్రక్రియ పూర్తి చేసి, నిర్మాణ పనులను వేగంగా ముందుకు తీసుకెళ్లేలా ప్రభుత్వం కార్యాచరణ సిద్ధం చేస్తోంది.
