చూడబోతే అలాగే ఉంది వ్యవహారం. తనకు డబ్బులు అవసరం లేదని ఏడాదికి రూ. 100 కోట్లు వచ్చే సినిమా ఫీల్డును వదులుకుని రాజకీయాల్లోకి వచ్చానని పవన్ కల్యాణ్ చెప్పుకునేదంతా అబద్దమేనని తేలిపోయింది. జనసేన అధినేత ప్రస్తుతం అమెరికా టూర్ లో ఉన్నారు. పర్యటనలో భాగంగా నేరుగా విరాళాలు సేకరిస్తూ పవన్ మద్దతుదారులు దొరికిపోవటం పెద్ద వివాదాస్పదమైంది. అమెరికా జనాలను ఏదో ఉద్దరించేద్దామని పవన్ అక్కడకు వెళ్ళాడని పార్టీ వాళ్ళు ఊదరగొట్టారు. అమెరికా పర్యటనలో పవన్ కూడా అదే చెప్పాడు. కానీ పవన్ చెప్పిందంతా అబద్ధమని తేలిపోయింది. కేవలం విరాళాల కోసమే పవన్ అమెరికా పర్యటనకు వెళ్ళినట్లు తేలిపోయింది.
అమెరికా నుండి పవన్ ఈనెలాఖరుకు క్రిస్మస్ వేడుకల్లో పాల్గొనేందుకు ఆస్ట్రేలియా వెళుతున్నట్లు సమాచారం. బహుశా ఆస్ట్రేలియా పర్యటన కూడా విరాళాల సేకరణకే అయ్యుంటుంది. జనసేన విరాళ గోల ఈనాటిది కాదు. పవన్ కల్యాణ్ తరపున ఓ ఆడిటర్ భారీ ఎత్తున విరాళాలు సేకరిస్తున్నారనే ఆరోపణలు ఈనాటివి కావు. ఆమధ్య హైదరాబాద్ లోని ఓ హోటల్లో కూడా కొంతమంది ముఖ్యులతో పెట్టిన క్లోసుడు డోర్ మీటింగ్ కూడా బాగా వివాదాస్పమైంది. అదే తరహాలో ఇపుడు అమెరికా పర్యటనపై కూడా గోల మొదలైంది.
నిజానికి ఏ పార్టీ నడవాలన్నా విరాళాలు తప్పనిసరి. విరాళాల సేకరణ తప్పు కూడా కాదు. కానీ తాను డబ్బుల కోసం రాజకీయాల్లోకి రాలేదని, తాను విరాళాలను తీసుకోనని చెప్పిన పవన్ ఇపుడదే చేస్తుండటంతో గందరగోళం మొదలైంది. అమెరికాలోని డల్లాస్ లో ఆత్మీయుల సమావేశంలో పాల్గొని వెళ్ళిపోయారు. ఆ తర్వాతే విరాళాల గోల మొదలైంది. విరాళాలను డబ్బుల రూపంలో తీసుకోమని, చెక్కులు లేదా ఆన్ లైన్ పే మెంటు ద్వారా మాత్రమే తీసుకుంటామని వేదిక మీదున్న వారు చెప్పటంలో అర్ధమేంటి ?
విరాళాలు ఇవ్వదలుచుకున్న వారంతా పవన్ తో పాటు వచ్చిన ఆడిటర్ ను కలవాలని పిలుపు కూడా ఇచ్చారు. విరాళాల వ్యవహారాలు మొత్తం ఆడిటరే చూసుకుంటున్నట్లు కూడా వేదిక మీదున్న వారు చెప్పటం దేనికి నిదర్శనం. డబ్బు రూపంలో విరాళాలు తీసుకోవటం తప్పని నీతులు కూడా చెప్పారు. అంతేకాకుండా విరాళాల గురించి మాట్లాడటాన్ని ఎవరో రికార్డు చేస్తున్నట్లు గ్రహించగానే వెంటనే విరాళాల అంశాన్ని అక్కడితో ముగించేయటం గమనార్హం. జరిగినదంతా పవన్ ఆమోదం లేకుండానే జరుగుంటుందా ?