Trouble For Pawan Kalyan : ఓ వైపు సినిమాలు, ఇంకో వైపు రాజకీయాలు.. రెండు పడవల మీద ప్రయాణం అంత తేలిక కాదు గనుకనే, మెగాస్టార్ చిరంజీవి ప్రజారాజ్యం పార్టీ స్థాపించాక సినిమాలకు దూరమయ్యారు.. రాజకీయాల్లో వున్నన్నాళ్ళూ సినిమాలవైపు కన్నెత్తి చూడలేదు. కానీ, తన తమ్ముడు పవన్ కళ్యాణ్ రెండు పడవల మీద ప్రయాణం సజావుగా చేయగలడన్న ఆశాభావం జనసేనాని గతంలో వ్యక్తం చేశారు.
ఇంతకీ, జనసేనాని రెండు పడవల మీద ప్రయాణం ఎలా సాగుతోంది.? అసలు సినిమాల్ని పూర్తిగా వదిలేస్తానని 2019 ఎన్నికల సమయంలో చెప్పిన పవన్, ఆ తర్వాత మాట మార్చి, తిరిగి సినిమాలకు కమిట్ అయ్యారు. సరే, ‘ఆర్థిక అవసరాల రీత్యా’ సినిమాల్లో కొనసాగాలన్న పవన్ ఆలోచనని తప్పు పట్టలేమనుకోండి.. అది వేరే సంగతి.
కానీ, రాజకీయాలకే పవన్ న్యాయం చేయలేకపోతున్నారు. తనను నమ్ముకున్న జనసైనికులకీ, జనసేన నేతలకీ పవన్ ఏమాత్రం న్యాయం చేయలేకపోతున్న పరిస్థితులు ఎందుకు వస్తున్నాయి.? ప్రజా పోరాటాల విషయంలోనూ జనసేనాని ఆశించినంత సమర్థవంతంగా ముందడుగు వేయలేకపోతున్నారు.
ఇంకో రెండేళ్ళలో ఎన్నికలొచ్చేస్తాయ్.. జమిలి ఎన్నికలంటే, అది ఇంకాస్త ముందే కావొచ్చు. మరి, జనసేన ఎంతవరకు రాజకీయంగా సన్నద్ధంగా వుంది.? అంటే, ఈ ప్రశ్నకు జనసైనికుల వద్ద బదులే లేదు. పోనీ, సినిమాల విషయంలో అయినా, జనసేనాని ‘వేగం’ ప్రదర్శిస్తున్నారా.? అంటే, దానికి ‘కరోనా’ అడ్డుపుల్లగా మారిందాయె.
ఎలా చూసినా, రెండు పడవల ప్రయాణం చాలా కష్టంగానే సాగుతోంది జనసేన అధినేతకి. రాజకీయ వివాదాల కారణంగా, తన సినిమాలూ ఇబ్బందుల్ని ఎదుర్కొంటున్న దరిమిలా, ఈ డబుల్ ట్రబుల్ని అధిగమించడమెలాగో జనసేనానికి అర్థం కావడంలేదు. వచ్చే ఎన్నికల నాటికి కింగ్ మేకర్ కాదు.. కింగ్ అవుతాననే భావనలో పవన్ వున్నారు. కానీ, 2019 ఎన్నికల రిజల్ట్ రిపీటవుతుందేమోనని జనసేన శ్రేణులు ఆందోళన చెందుతున్నాయి.