CPI Narayana: నందమూరి బాలకృష్ణ నటించిన ప్రతిష్టాత్మక చిత్రం ‘అఖండ-2’ విడుదలైన రోజే పైరసీ బారిన పడటంపై సీపీఐ జాతీయ కార్యదర్శి నారాయణ సంచలన వ్యాఖ్యలు చేశారు. ఈ వ్యవహారంలో అసలు నిందితుడు ఐబొమ్మ రవి పోలీసు కస్టడీలో ఉండగానే సినిమా బయటకు ఎలా వచ్చిందని ఆయన ప్రభుత్వాన్ని సూటిగా ప్రశ్నించారు.
వ్యవస్థలో లోపాలే అసలు కారణం ఈ సందర్భంగా మీడియాతో మాట్లాడిన నారాయణ.. ఐబొమ్మ రవిని ఉరితీయాలని కొందరు చేస్తున్న డిమాండ్లపై స్పందించారు. ఒక వ్యక్తిని శిక్షించినంత మాత్రాన పైరసీ ఆగదని, అసలు లోపం వ్యవస్థలోనే ఉందని ఆయన అభిప్రాయపడ్డారు. నిందితుడు పోలీసుల అదుపులో ఉన్నా సినిమా లీక్ అయ్యిందంటే, దీని వెనుక ఉన్న అసలు కారణాలను అన్వేషించాల్సిన అవసరం ఉందన్నారు.
థియేటర్ల దోపిడీపై ఆగ్రహం మల్టీప్లెక్స్లు, సినిమా థియేటర్ల యాజమాన్యాల తీరుపై నారాయణ తీవ్ర స్థాయిలో విరుచుకుపడ్డారు. టికెట్ ధరలను ఇష్టానుసారం పెంచేసి, స్నాక్స్ పేరుతో సామాన్యుల జేబులు గుల్ల చేస్తున్నారని మండిపడ్డారు. కేవలం లాభాపేక్షతో ధరలు పెంచడం వల్లే సామాన్య ప్రేక్షకుడు థియేటర్లకు దూరమవుతున్నాడని విశ్లేషించారు.
ప్రభుత్వ జోక్యం అవసరం థియేటర్ల దోపిడీని అరికట్టేందుకు ప్రభుత్వాలు తక్షణమే జోక్యం చేసుకోవాలని నారాయణ డిమాండ్ చేశారు. అధిక ధరల భారం మోయలేకే జనం పైరసీ వంటి ప్రత్యామ్నాయ మార్గాలను వెతుక్కుంటున్నారని తెలిపారు. సామాన్యుడికి అందుబాటులో ఉండేలా టికెట్ ధరలను నియంత్రిస్తేనే సినిమా పరిశ్రమ మనుగడ సాగిస్తుందని ఆయన స్పష్టం చేశారు.
