ఆంధ్రప్రదేశ్ మున్సిపల్ శాఖ మంత్రి పొంగూరు నారాయణ తనపై చేసిన వ్యాఖ్యలు రాష్ట్ర రాజకీయాల్లో దుమారం రేపాయి. తాజాగా నెల్లూరు సిటీ నేతలతో నిర్వహించిన టెలీకాన్ఫరెన్స్లో మంత్రి నారాయణ మాట్లాడిన ఆడియో లీక్ కావడంతో ఈ వివాదం మొదలైంది. ఈ ఆడియోలో మాజీ ఎమ్మెల్యే, పిఠాపురం టీడీపీ నేత ఎస్వీఎస్ఎన్ వర్మను పూర్తిగా ‘జీరో’ చేసినట్లుగా మంత్రి నారాయణ చేసిన వ్యాఖ్యలు తీవ్ర చర్చనీయాంశమయ్యాయి. దీనిపై వర్మ ఇవాళ స్పందించారు.
మంత్రి నారాయణ వ్యాఖ్యలు: లీకైన ఆడియోలో మంత్రి నారాయణ మాట్లాడుతూ, కేవలం పవన్ కళ్యాణ్ కోసమే వర్మను ‘జీరో’ చేశామని పేర్కొన్నారు. “పవన్ కళ్యాణ్కు, వర్మకు రోజూ ఏదో ఓ గొడవ జరుగుతూనే ఉంది. తనను జీరో చేశారని వర్మ గత నాలుగు నెలలుగా చెప్పుకుంటున్నారు. పిఠాపురంలో వర్మ ఏమీ మాట్లాడకుండా సైలెంట్గా ఉండాలని చంద్రబాబు స్వయంగా వార్నింగ్ ఇచ్చారు” అని నారాయణ తెలిపారు. అంతేకాకుండా, జనసేన వాళ్లు పిలిస్తేనే వర్మ వెళ్లి మాట్లాడాలని, లేకుంటే సైలెంట్ గా ఉండాలని ముఖ్యమంత్రి నుంచి ఆదేశాలు ఉన్నాయన్నారు. పార్టీ అంతర్గత విషయాలపై ఏమీ మాట్లాడొద్దని, ఎవరైనా ‘గీత దాటితే’ వ్యవహారం వేరేలా ఉంటుందని మంత్రి నారాయణ హెచ్చరించారు.
వర్మ ఘాటు స్పందన: మంత్రి నారాయణ కామెంట్స్ పై స్పందించిన ఎస్వీఎస్ఎన్ వర్మ.. తాను టీడీపీకి ఎప్పుడూ ‘ఫైర్ బ్రాండ్’నే అన్నారు. “ఎవడో కర్మ అంటే నాకేంటి, ఎవడో గడ్డిపరక వర్మ అంటే నాకేంటి. వర్మ అంటే ఏమిటో పిఠాపురం ప్రజానీకానికి తెలుసు” అని ఘాటుగా బదులిచ్చారు. టీడీపీలో తనది 23 సంవత్సరాల ప్రయాణమని గుర్తుచేసిన వర్మ.. కూటమి బలోపేతం కోసం తాను ఎప్పుడూ మౌనంగానే ఉంటానన్నారు. ఎవరు ఎన్ని విమర్శలు చేసినా సమాధానం చెప్పనని స్పష్టం చేశారు. తనకు చంద్రబాబుపై, లోకేష్ పై ఎంత ప్రేమ ఉందో వాళ్ళకి తెలుసన్నారు. “ఎవరో ఏదో అన్నారని తాను లక్ష్మణ రేఖ దాటను” అని వర్మ వ్యాఖ్యానించారు.
వైసీపీ నేత అంబటి రాంబాబు స్పందన: ఈ వివాదంపై వైసీపీ నేత అంబటి రాంబాబు కూడా స్పందించారు. పవన్ కళ్యాణ్ సొంతంగా గెలవలేదని, బలమైన ఓటు బలం ఉన్న వర్మ త్యాగం వల్ల పిఠాపురంలో గెలవగలిగారన్నారు. పవన్ గెలుపుకు పూర్తి క్రెడిట్ వర్మకు ఇవ్వాలని, వర్మ సహకారం లేకపోతే పవన్ గెలవడం కష్టమయ్యేదన్నారు.
మంత్రి నారాయణ వ్యాఖ్యలు, వర్మ స్పందన కూటమి రాజకీయాల్లో అంతర్గత విభేదాలకు అద్దం పడుతున్నాయి. ఈ రచ్చ రానున్న రోజుల్లో ఎలాంటి పరిణామాలకు దారితీస్తుందో చూడాలి.
