వైఎస్సార్ కాంగ్రెస్ పార్టీకి చెందిన కీలక నేత, మాజీ మంత్రి కాకాణి గోవర్ధన్ రెడ్డికి ఆంధ్రప్రదేశ్ హైకోర్టు నుంచి బుధవారం తీవ్ర ఎదురుదెబ్బ తగిలింది. నెల్లూరు జిల్లా పొదలకూరు అక్రమ మైనింగ్ కేసులో ముందస్తు బెయిల్ కోసం ఆయన దాఖలు చేసిన పిటిషన్‌ను హైకోర్టు కొట్టివేసింది. దీంతో ఇప్పటి వరకూ నోటీసులకే స్పందించని కాకాణిని అరెస్ట్ చేసేందుకు పోలీసులు సిద్ధమవుతున్నారు.
ఈ కేసులో కాకాణి పేరుతో పాటు ఆయన అల్లుడు సహా మరో ముగ్గురు కీలక అనుచరులపై పోలీసులు కేసులు నమోదు చేశారు. ఇప్పటికే ముగ్గురికి కోర్టు బెయిల్ మంజూరు చేయగా, కాకాణి మాత్రం విచారణకు హాజరుకాకుండా పట్టణం తలదాచుకుంటూ తిరుగుతున్నట్టు సమాచారం. అంతేకాకుండా పోలీసులు పంపిన నోటీసులను కూడా స్వీకరించకుండా ముందస్తు బెయిల్‌పై ఆశలు పెట్టుకున్నారు.
కోర్టు నుంచి నెగటివ్ సిగ్నల్ రావడంతో కాకాణికి పెద్ద షాక్ తగిలినట్టైంది. మరోవైపు పోలీసులు ఈ కేసును తీవ్రంగా తీసుకుంటూ, ఆయన అరెస్టు చేసేందుకు వ్యూహాత్మకంగా అడుగులు వేస్తున్నారు. ఇప్పటికే ప్రత్యేక బృందాలు ఏర్పాటు చేసి ఆయన్ను అరెస్ట్ చేసేందుకు గాలింపు చర్యలు ప్రారంభించినట్టు సమాచారం. ఆయన అల్లుడు విషయమై కూడా ఇదే దిశగా విచారణ కొనసాగుతోంది.
ప్రమాదాన్ని ముందుగానే అంచనా వేసిన కాకాణి, ఈ కేసును పూర్తిగా కొట్టివేయాలంటూ మరో పిటిషన్ దాఖలు చేయగా, దానిపై విచారణను హైకోర్టు రెండు వారాలకు వాయిదా వేసింది. ఇక అప్పటి వరకు ఏం జరుగుతుందో అనేది ఆసక్తికరంగా మారింది. అలాగే, వైఎస్సార్ కాంగ్రెస్ పార్టీ తరఫున కాకాణికి న్యాయ సహాయం అందించేందుకు సన్నాహాలు జరుగుతున్నట్టు వర్గాలు చెబుతున్నాయి. ఈ పరిణామాల నేపథ్యంలో, కోర్టు స్పష్టంగా అరెస్టు నుంచి రక్షణ ఇవ్వలేమని చెప్పడంతో… కాకాణి అరెస్ట్ ఇప్పుడు తథ్యమనే అభిప్రాయాలు వ్యక్తమవుతున్నాయి. మైనింగ్ కేసు నేరుగా వైసీపీ సీనియర్ నేతను తాకుతుండటంతో… ఇది రాజకీయంగా కూడా తీవ్ర ప్రభావం చూపే అవకాశం కనిపిస్తోంది. ఇక వచ్చే రోజుల్లో ఈ కేసు మలుపు ఎలా తిరుగుతుందనేది గమనించాల్సిందే.