ఆంధ్రప్రదేశ్లో పేద వర్గాల సంక్షేమానికి మరో కొత్త పథకం త్వరలో అమల్లోకి రానుంది. పేద బ్రాహ్మణ కుటుంబాలు ఎదుర్కొనే ఆర్థిక ఇబ్బందులకు తాత్కాలిక ఉపశమనం కల్పించాలన్న లక్ష్యంతో రాష్ట్ర ప్రభుత్వం ‘గరుడ’ పథకాన్ని ప్రారంభించేందుకు ఏర్పాట్లు చేస్తోంది. కుటుంబ పెద్ద మరణించిన సందర్భంలో ఆ కుటుంబానికి ఆర్థిక సహాయం అందించేలా ఈ పథకాన్ని రూపొందించారు.
గరుడ పథకం కింద పేద బ్రాహ్మణులు మృతి చెందితే, వారి కుటుంబ సభ్యులకు రూ.10 వేల చొప్పున ఆర్థిక సాయం అందించనున్నారు. అనుకోని సమయంలో ఎదురయ్యే ఖర్చులకు ఈ సాయం కొంతైనా దోహదపడుతుందని ప్రభుత్వం భావిస్తోంది. త్వరలోనే ఈ పథకాన్ని అధికారికంగా ప్రారంభించనున్నట్లు సంకేతాలు అందుతున్నాయి.
ఈ పథకం అమలుకు సంబంధించిన కార్యాచరణ ఇప్పటికే ప్రారంభమైందని రాష్ట్ర మంత్రి ఎస్.సవిత వెల్లడించారు. అమరావతి సచివాలయంలో బ్రాహ్మణ కార్పొరేషన్ చైర్మన్ కె.బుచ్చిరాం ప్రసాద్తో ఆమె కీలక సమావేశం నిర్వహించారు. ఈ భేటీలో గరుడ పథకానికి సంబంధించిన విధివిధానాలు, అర్హతలు, అమలు విధానంపై విస్తృతంగా చర్చించారు.
బ్రాహ్మణుల సంక్షేమం పట్ల కూటమి ప్రభుత్వం ప్రత్యేక శ్రద్ధ చూపుతోందని మంత్రి స్పష్టం చేశారు. సామాజికంగా, ఆర్థికంగా వెనుకబడిన బ్రాహ్మణ కుటుంబాలకు ప్రభుత్వ సహాయం అందించడమే లక్ష్యంగా ఈ పథకాన్ని రూపొందిస్తున్నట్లు తెలిపారు. గరుడ పథకం ద్వారా బాధిత కుటుంబాలకు తక్షణ సహాయం అందేలా చర్యలు తీసుకుంటామని హామీ ఇచ్చారు.
ప్రస్తుతం పథకానికి సంబంధించిన మార్గదర్శకాలు ఖరారు చేసే పనిలో అధికారులు నిమగ్నమయ్యారు. అర్హులైన కుటుంబాలు సులభంగా లబ్ధి పొందేలా సరళమైన విధానాన్ని రూపొందించాలని ప్రభుత్వం భావిస్తోంది. గరుడ పథకం అమల్లోకి వస్తే పేద బ్రాహ్మణ కుటుంబాలకు ఇది ఒక పెద్ద భరోసాగా మారనుంది.