జనసేన అధినేత పవన్ కల్యాణ్ బహిరంగ సభల్లోనో, ప్రెస్ మీట్లలోనో మైకందుకుంటే.. ఆ సభ పూర్తవ్వగానే గొంతు సవరించుకుని తిట్ల పురాణం అందుకోవడంలో వైసీపీలో కొంతమంది నేతలు ఫేమస్. వారిలో పేర్ని నాని, అంబటి రాంబాబు, ఆర్కే రోజా ముందువరుసలో ఉంటారు! ఈ క్రమంలో అనారోగ్య కారణాలతో ఆర్కే రోజా రెస్ట్ లో ఉండగా.. పేర్ని వితౌంట్ గేప్ వాయించేస్తుంటే.. తాజాగా అంబటి మరోసారి మొదలుపెట్టారు.. సున్నితంగా ఒక సెటైర్ వేశారు!
గతకొన్నిరోజులుగా ఏపీ రాజకీయాల్లో “చెప్పు” కూడా ఒక టాపిక్ అయిపోయింది. అయితే దీనికి ఆజ్యం పోసింది మాత్రం జనసేన అధినేత పవన్ కల్యాణ్ అనేది తెలిసిన విషయమే. మంగళగిరి పార్టీ ఆఫీసులో మైకందుకున్న పవన్… కేడర్ లో ఉత్సాహం కోసమో, ఫ్రస్ట్రేషన్ లో భాగమో, అలవాటైన సినిమా షూటింగుల ప్రభావమో తెలియదు కానీ… ఉన్నపలంగా కాలికేసుకున్న చెప్పును చేతిలోకి తీసుకున్నారు.
తనను దత్తపుత్రుడు అని, మూడు పెళ్లిల్లు చేసుకున్నారని ఎవరైనా ఇకమీదట అంటే చెప్పుతో కొడతా.. చెప్పు తీసుకుని కొడతా అని అన్నారు. అయితే ఈ విషయంపై వైసీపీ నాయకులు స్పందిస్తూ… తమకూ చెప్పులున్నాయని అన్నారు. అనంతరం ఆ వ్యవహారం సద్దుమణిగిపోయినట్లే కనిపించింది. అయితే మరోసారి పవన్ వారాహియాత్రలో భాగంగా “చెప్పు” టాపిక్ తెచ్చారు. తాను చెప్పుతో కొడితే మక్కెలిరుగుతాయి అన్న స్థాయిలో ఫైరయ్యారు.
దీంతో ఈ వ్యవహారం ఇలా వదిలేస్తే కుదరని అనుకున్నారో.. లేక, పవన్ కు ఈసారి ప్రాక్టికల్ గా చూపించాలని భావించారో తెలియదు కానీ… తన రెండు చెప్పులూ చూపించారు పేర్ని నాని. ఇదిగో పవన్ రెండు చెప్పులు చూపిస్తున్నాను.. మక్కెలిరుగుతాయి నీకు అంటూ రిటార్ట్ ఇచ్చేశారు. దీంతో ఏపీలో ఒకసారిగా ఈ “చెప్పు” వ్యవహారం మరోసారి హాట్ టాపిక్ గా మారింది.
అయితే ఇంకా తెగేదాకా లాగితే తనకే సమస్య అనుకున్నారో ఏమో కానీ… తాజాగా పిఠాపురం సభలో ఈ విషయంపై సరదాగా స్పందిస్తున్నట్లుగా స్పందించారు పవన్. “చెప్పు” విషయంలో ఇంకా సీరియస్ వ్యాఖ్యలు చేస్తే ఇబ్బందని గ్రహించారో ఏమోకానీ… మొన్న గుడికి వెళ్తే తన రెండు చెప్పులూ పోయాయి.. ఎవరికైనా దొరికితే తిరిగి తీసుకొచ్చి ఇచ్చెయ్యండంటూ కామెంట్ చేశారు.
అయితే ఈ వ్యాఖ్యలపై తాజాగా అంబటి తనదైన శైలిలో స్పందించారు. “చెప్పులు పోయాయంట.. నాలుగు రోజులు వెతుక్కుని తిరిగి షూటింగ్ కి పోతాడులే… పట్టించుకోకండి” అంటూ స్మూత్ సెటైర్ వేశారు! దీంతో పవన్ విషయంలో పేర్ని తగ్గినా.. అంబటి మాత్రం తగ్గేలా లేరంటూ కామెంట్లు పెడుతున్నారు నెటిజన్లు. మరి ఈ విషయంపై మరోసారి జనసేన అధినేత స్పందిస్తారా.. లేక, చూసీ చూడనట్లు “తనకొచ్చినపని” చేస్తారా అన్నది వేచి చూడాలి!