బ్యూటీ కియారా అధ్వానీ గురించి ఎవరైనా మంచి విషయాలు చెప్పినప్పుడు, ప్రోత్సాహకరమైన మెసేజ్లు పెట్టినప్పుడు థ్రిల్లై పోతానంటోంది. అవి తన ఎనర్జీని రెట్టింపు చేస్తాయియట. అయితే తరచుగా చివరి నిమిషంలో నిర్ణయాల్ని మార్చుకుంటానంటోంది. అదే తన బలహీనత అని తన స్నేహితులంతా అంటుంటారుట. ఆ ఒక్క విషయంలో తనను తాను మార్చుకోవాలని చాలా రోజులుగా అనుకుంటున్నా అని చెబుతోంది.
‘ సినిమాల ఒత్తిడి నుంచి దూరం అవ్వడానికి పెయింటింగులు వేస్తుంటాను. ట్రావెలింగ్కు ప్రాధాన్యతనిస్తాను. సముద్రతీరాలు మనసుకు స్వాంతన చేకూర్చుతాయి. ఏ మాత్రం విరామం దొరికినా మాల్దీవులకు వెళ్లి స్కూబా డైవింగ్ చేస్తుంటాను.
అహంకార మనస్తత్వమున్న వ్యకులకు దూరం ఉండటానికి ప్రయత్నిస్తా. మనసులో ఏదీ దాచుకోకుండా సూటిగా మాట్లాడే వాళ్లు, నిజాయితీగా ఉండేవాళ్లు, ఇతరుల పట్ల దయగా ఉండేవాళ్లు, స్వయంకృషితో పైకి వచ్చిన వాళ్లు అంటే ఇష్టం. నన్ను నవ్వించే వ్యక్తులు, నేను చెప్పే జోకులకు నవ్వే వ్యక్తులు అంటే కూడా ఇష్టం. ఎదుటివారి వ్యక్తిత్వాన్ని గౌరవిస్తూ, తప్పొప్పుల్ని సమంగా స్వీకరించే గుణం ఉన్న వ్యక్తి జీవితభాగస్వామిగా రావాలని కోరుకుంటున్నా. నా జీవితంలోకి వచ్చే వ్యక్తి నిజాయితీ కలిగి ఉంటూ.. ఎప్పుడూ సరదాగా నవ్విస్తూ ఉండాలి.
అలాంటి లక్షణాలున్న వ్యక్తి కోసమే ఎదురుచూస్తున్నా. అయితే నా మనసుకు నచ్చిన వాడు, నా మనసు దోచిన వాడు ఒకడున్నాడు. అతడైతే వెంటనే ఓకే చెప్పేస్తా’ అని మనసు విప్పింది. ఇంతకీ కియారా మనసు దోచిన వాడెవడో చెప్పనే లేదు.