మెగాస్టార్ చిరంజీవికి తన అభిమానులకు అవినాభావ సంబంధం ఉంటుంది. మెగా ఫ్యాన్స్ అనే పదంలోనే ఓ వైబ్రేషన్ ఉంటుంది. తాజాగా చిరంజీవి ఓ అభిమాని ఇచ్చిన బహుమతికి, చూపించిన ప్రేమకు చిరంజీవి ఫిదా అయ్యాడు. నేడు వరల్డ్ టూరిజం డే సందర్భంగా చిరంజీవి కేంద్ర మంత్రిగా ఉన్న నాటి సంగతులను గుర్తు చేస్తూ ఓ వీడియో రూపంలో అన్నింటిని ఓ దగ్గరికీ చేర్చాడు. ఇక అది సోషల్ మీడియాలో తిరిగి తిరిగి చిరు కంటపడింది.
పర్యాటక మంత్రిగా ఉన్న సమయంలో చిరంజీవి చేసిన అభివృద్ది, భారతదేశానికి, రెండు తెలుగు రాష్ట్రాలకు చిరు చేసిన అభివృద్ది కార్యక్రమాలు, తెచ్చిన పెట్టుబడులు ఇలా నాటి విషయాలు, పేపర్స్ కట్టింగ్స్ ఇలా అన్నింటిని ఓ వద్దకు చేర్చి ఎడిట్ చేసిన విధానానికి చిరంజీవి ముగ్దుడయ్యాడు. మన దేశ ఖ్యాతి, పర్యాటక ప్రదేశాల గురించి చిరు విదేశాల్లో చెప్పిన సంగతులను కూడా అందులో పొందుపరిచాడు.
సదరు అభిమాని కష్టాన్ని గుర్తించిన చిరు ఎమోషనల్ అయ్యాడు. ఇది ఓ అభిమాని చేశాడని తెలుసుకున్నాను. ఎంతో గౌరవంగా ఫీలవుతున్నాను అంటూ చేతులెత్తి దండంపెట్టేశాడు. మన అద్భుతమైన భారతదేశానికి చేసిన సేవ, నాకు సంతృప్తిని ఇచ్చిన ఎన్నో విషయాలను గుర్తు చేశాడు. కొద్ది కాలం పాటే పనిచేసినా కూడా.. అంతులేని సంతోషం, అనంతమైన ప్రశంసలు వచ్చాయి. మన దేశ ఖ్యాతిని నలుమూలలా పంచే అదృష్టం వచ్చింది. నా వంతుగా నేను కష్టపడ్డాను.. మంచి చేశాను.. కాలంతో పాటు నిలిచిపోయే జ్ఞాపకాలెన్నో ఉన్నాయంటూ ఎమోషనల్ అయ్యాడు.