ఉదాత్తమైన పాత్రలో చిరంజీవిని చూపించేందుకు దర్శకుడు కొరటాల శివ తెరకెక్కిస్తోన్న సోషల్ మెసేజ్ స్టోరీ ‘ఆచార్య’. అధికారికంగా టైటిల్ ప్రకటించలేదుకానీ -కథనంగా పుట్టుకొచ్చిన టైటిల్ ప్రస్తుతం చలామణీ అయిపోతుంది. దేవుడి భూముల కబ్జా బాగోతాన్ని నిగ్గదీసే కథానాయకుడిగా చిరు పోషిస్తోన్న పాత్ర పేరు ‘గోవిందాచార్య’ కావడంతో పుట్టుకొచ్చిన టైటిల్ బలంగానే జనంలోకి వెళ్లిపోయింది.
ఇదిలావుంటే ఇందులో నిర్మాత రామచరణ్ ఓ స్పెషల్ రోల్ చేస్తున్నట్టు చాలాకాలంగా వినిపిస్తోన్న మాటే. చిరు యవ్వన దశ పాత్రను పోషించే అవకాశముందంటూ ఇప్పటివరకూ ప్రచారం సాగినా తాజాగా చిరుతో చరణ్కు కాంబినేషన్స్ సీన్స్ సైతం ఉన్నాయన్నది తాజాగా వినిపిస్తోన్న మాట. ‘సిద్ధు’ పాత్రలో కనిపించే అవకాశం ఉందంటూ ప్రచారం జరుగుతున్నా చిరు పాత్రతో ఈ పాత్రకున్న సంబంధమేంటన్న దానిపై సస్పెన్స్ కొనసాగుతోంది. చరణ్ పోషించే పాత్ర కేవలం పది పదిహేను నిమిషాల నడివి మాత్రమే ఉంటుందట.
ప్రస్తుతం రాజవౌళి తెరకెక్కిస్తోన్న ‘ట్రిపుల్ ఆర్’ ప్రాజెక్టులో బిజీగావున్న చరణ్ అది పూర్తికాగానే ‘ఆచార్య’ బోర్డ్పైకి వస్తాడన్నది తాజా టాక్. సో, ట్రిపుల్ ఆర్ మేకోవర్లోనే చరణ్ ఉండే అవకాశం ఉందంటున్నారు. సినిమాను వేగంగా పూర్తి చేయాలన్న చిరు ప్రతిపాదన తు.ఛ తప్పకుండా అమలైతే సినిమా ఆగస్టు రెండోవారంలో థియేటర్లకు వచ్చే అవకాశం ఉంది. ట్రిపుర్ ఆర్ సినిమా విడుదల ఎప్పుడన్నది ఇంకా క్లారిటీ రాకపోవడంతో సంక్రాంతి తరువాత థియేటర్లకు వచ్చే పెద్ద చిత్రం ఇదే కావొచ్చు!