టాలీవుడ్ లో ప్రతిభగల నటుడిగా అజయ్ కి మంచి పేరుంది. విభిన్నమైన చిత్రాల్లో విలక్షణ పాత్రలతో తనకంటూ ఓ ప్రత్యేక గుర్తింపును సంపాదించుకున్న నటుడాయన. తాజాగా అజయ్ ప్రధాన పాత్రలో నటించిన మర్డర్ మిస్టరీ క్రైమ్ థ్రిల్లర్‌ ‘చక్రవ్యూహం’. ‘ది ట్రాప్’ అనేది ఉపశీర్షిక. చెట్కూరి మధుసూధన్ దర్శకత్వంలో సహస్ర క్రియేషన్స్ బ్యానర్‌పై నిర్మాత శ్రీమతి సావిత్రి నిర్మించిన ఈ సినిమా ఈ శుక్రవారం 2, జూన్ 2023న ప్రేక్షకుల ముందుకొచ్చింది. చిత్రం విడుదలకు ముందే మంచి బజ్ ని క్రియేట్ చేసింది. మర్డర్ మిస్టరీ క్రైమ్ థ్రిల్లర్‌ గా తెరకెక్కిన ఈ ‘చక్రవ్యూహం” చిత్రం ఫస్ట్ లుక్‌ని స్వర్గీయ సూపర్ స్టార్ కృష్ణ విడుదల చేయడంతో ఈ సినిమాపై ప్రేక్షకుల్లో మరింత ఆసక్తి కలిగింది. ఆయన విడుదల చేసిన ఫస్ట్ లుక్ కు ప్రేక్షకులనుండి అద్భుతమైన రెస్పాన్స్ వచ్చింది. సాయి ధరమ్ తేజ్ హీరోగా నటించిన ‘విరూపాక్ష’ సినిమాలో తన విలక్షణమైన నటనతో అందరినీ ఆకట్టుకున్న అజయ్ ఈ సినిమాలో పవర్ ఫుల్ పోలీస్ పాత్రలో నటించడంతో సహజంగానే ప్రతీ ఒక్కరిలోనూ ఏదో చూడబోతున్నామన్న క్యూరియాసిటీ కలిగింది. విడుదలకు ముందు ఈ చిత్రానికి సంబంధించి 1:05 నిడివి ఉన్న చిత్ర టీజర్ మొదటినుండి చివరివరకు ఆసక్తికరంగా సాగింది. అద్భుతమైన విజువల్స్ తో అదిరిపోయే బాక్ గ్రౌండ్ స్కోర్ తో అందర్నీ విశేషంగా అలరించింది. మెగాస్టార్ చిరంజీవి ‘వాల్తేరు వీరయ్య’, నందమూరి బాలయ్య ‘వీర సింహా రెడ్డి’ వంటి మాస్ కమర్షియల్ హిట్ సినిమాల తరువాత మైత్రి మూవీ డిస్ట్రీబ్యూషన్ చేస్తున్న సినిమా కావడంతో ఈ “చక్రవ్యూహం”పై అందరిలోనూ అంచనాలు మరింత రెట్టింపయ్యాయి. మరి ఈ సినిమా ఎలా ఉంది? అంచనాలను అందుకుందా? లేదా? టాలీవుడ్ లో తన విలక్షణమైన నటనతో అందరినీ ఆకట్టుకున్న అజయ్ కి ఈ ‘చక్రవ్యూహం’ ఎలాంటి విజయాన్ని అందించిందో తెలుసుకుందాం…
కథ : వివేక్ (సంజయ్), ఊర్వశి పరదేశి (సిరి). వీరిద్దరూ ఒకర్ని ఒకరు ఇష్టపడి పెళ్లి చేసుకున్న జంట. ఎంతో అన్యోన్యంగా, హ్యాపీగా సాగుతున్న వీరి జీవితంలో ఎవరూ ఊహించని విధంగా సిరి హత్య గావించబడుతుంది. ఆ తరువాత ఆమెకు సంబంధించిన వారందరూ వరుసగా హత్యలకు గురవుతుంటారు. ఇలా ఎన్నో ట్విస్ట్ ల మధ్య ఆసక్తికరమైన పరిస్థితుల్లో ఎవరు ఎవరిని ఎందుకు చంపారో అర్థం కాకుండా ఉంటుంది. సస్పెన్స్ ప్రధానంగా సాగే ఈ కథలో సంజయ్ స్నేహితుడు సుదేశ్ (శరత్) పాత్రేమిటి? అతను ఎందుకు హత్య గావించబడ్డాడు? అలాగే సంజయ్ దగ్గర పని చేస్తున్న మేనేజర్ మరియు సంజయ్ ను ఇష్టపడ్డ ప్రగ్య నయన్ ( శిల్ప) పాత్రలేమిటి? ఈ హత్యలవెనుక ఉన్న అసలు మర్మాన్ని పోలీసులు ఎలా ఛేదించారనేదే తెలుసుకోవాలంటే ‘చక్ర వ్యూహ్యం’ సినిమా చూడాల్సిందే…
ఎవరెలా చేశారంటే… సంజయ్ పాత్రలో నటించిన వివేక్ ఇటు భర్త గా, ఇటు సైకో గా తన హావ భావాలతో మెచ్యూర్డ్ నటన కనబరిచాడు. పాత్రలో పరకాయప్రవేశం చేసాడని చెప్పొచ్చు. ప్రతీ ఫ్రేమ్ లోనూ మెరుగైన నటనను ప్రదర్శించాడు.సంజయ్ భార్య గా నటించిన సిరి పాత్రలో ఊర్వశి పరదేశి తన పాత్రలో ఒదిగిపోయింది. పోలీస్ ఇన్వెస్టిగేషన్ పాత్రలో సత్య గా నటించిన అజయ్ నటన ఈ చిత్రానికే హైలెట్ గా నిలిచింది. అతడి సహ పోలీస్ పాత్రలో నటించిన దుర్గ (జ్ఞానేశ్వరి) కూడా చక్కగా నటించింది. హీరో ఫ్రెండ్స్ గా నటించిన రాజ్ తిరందసు (రవి), కిరీటి తో పాటు, హీరోయిన్ కు తల్లిగా నటించిన ప్రియ, తండ్రులుగా నటించిన రాజీవ్ కనకాల ( శ్రీధర్ ), శ్రీకాంత్ అయ్యాంగార్ ( శ్రీనివాస్ ), హీరోయిన్ తాతగా నటించిన శుభలేఖ సుధాకర్ ( జగన్నాధం ) పాత్రలు చిన్నవే అయినా.. ఉన్నంతలో ఆయా పాత్రల పరిధిమేరకు నటించి ప్రేక్షకులను మెప్పించారు.
సాంకేతిక నిపుణుల పనితీరు … డైరెక్టర్ మధుసూధన్ కిది తొలి సినిమా అయినప్పటికీ ఆద్యంతం ప్రేక్షకులు సస్పెన్స్ కు గురయ్యేలా చక్కటి కథ, స్క్రీన్ ప్లే తో తీసిన తీరు ప్రేక్షకులకు ఆకట్టుకుంటుంది. అనుక్షణం ప్రతిసన్నివేశంలోను ఆ సస్పెన్స్ ను అలాగే కొనసాగించి దర్శకుడిగా మంచి ప్రతిభను కనపరచాడు. కథకు తగ్గ నటీనటులను ఎంపిక చేసుకోవడంలో కూడా సక్సెస్ అయ్యాడని చెప్పొచ్చు. జి. వి అజయ్ కెమెరా పనితనం మెచ్చుకోవాలి. సస్పెన్స్ తో సాగే ప్రతి సన్నివేశాన్ని తన కెమెరాలో చక్కగా బంధించి తన కెమెరా పనితనాన్ని చాటారు. జెస్విన్ ప్రభు ఎడిటింగ్ పనితీరు ఓకే. భరత్ మంచిరాజు బ్యాక్ గ్రౌండ్ మ్యూజిక్ ప్రేక్షకులను ఆకట్టుకుంది. బేబీ అన్వి సమర్పణలో సహస్ర క్రియేషన్స్ బ్యానర్‌పై శ్రీమతి. సావిత్రి నిర్మించిన నిర్మాణ విలువలు సినిమా స్థాయి కి తగ్గట్టు ఉండి సినిమాపై వారికున్న టేస్ట్ ను తెలిపింది. మొత్తంగా చూస్తే సస్పెన్స్ తో సాగే ఉత్కంఠ భరితమైన కథనాన్ని ప్రేక్షకులు మెచ్చేలా తీర్చి దిద్దిన వైనం స్పష్టంగా కనిపించింది. సినిమా చూసే ప్రేక్షకులందరికీ ఈ సినిమా కచ్చితంగా నచ్చుతుంది.
(చిత్రం : చక్రవ్యూహం, రేటింగ్ : 3/5, విడుదల : 2 జూన్-2023 , తారాగణం: అజయ్, జ్ఞానేశ్వరి, వివేక్ త్రివేది, ఊర్వశి పరదేశి, ప్రజ్ఞా నయన్, శుభలేఖ సుధాకర్, రాజీవ్ కనకాల, ప్రియ, శ్రీకాంత్ అయ్యంగార్, కిరీటి, రాజ్ తిరందాసు, రవితేజ, మోహన్ తదితరులు. రచన & దర్శకత్వం: చెట్కూరి మధుసూధన్, నిర్మాత: సహస్ర క్రియేషన్స్, సహ నిర్మాతలు: వెంకటేష్ & అనూష, డాప్: జి వి అజయ్ కుమార్, ఎడిటర్: జెస్విన్ ప్రభు, సంగీతం: భరత్ మంచిరాజు, ఎగ్జిక్యూటివ్ నిర్మాతలు: జాస్తి అజయ్, చిలుక మహేష్, డి.ఐ : లైట్ లైన్ స్టూడియో, పి.ఆర్.ఓ : మేఘా శ్యామ్-ధీరజ్-ప్రసాద్)