రచన- దర్శకత్వం : గుణశేఖర్
తారాగణం : భూమికా చావ్లా, సారా అర్జున్, నాసర్, రోహిత్, విఘ్నేష్ గవిరెడ్డి, లిఖిత యలమంచలి, అడ్డాల పృధ్వీరాజ్, కల్ప లత, సాయి శ్రీనికా వర్గీ, నవీనా రెడ్డి, లిఖిత్ నాయుడు
సంగీతం: కాల భైరవ, ఛాయాగ్రహణం : ప్రవీణ్ కె పోతన్
నిర్మాత : రాగిణీగుణ
విడుదల తేదీ : ఫిబ్రవరి 6, 2026
Euphoria Movie Review: మృగరాజు, ఒక్కడు, సైనికుడు, వరుడు, రుద్రమదేవి వంటి భారీ సినిమాలు తీసిన దర్శకుడు గుణశేఖర్ ఒక తక్కువ బడ్జెట్ సినిమా ‘యుఫోరియా’ ని ప్రేక్షకుల ముందుకు తెచ్చారు. తన జోన్ కాని బోల్డ్ సబ్జెక్ట్ తో ప్రయోగాత్మకంగా ప్రయత్నించారు. భూమికా చావ్లా ని ప్రధాన పాత్రగా చూపితూ నేటి టీనేజర్లు పాల్పడుతున్న అనైతిక చర్యల్ని చిత్రించా దల్చారు. ఒక సీనియర్ దర్శకుడి నుంచి ఇది ఆహ్వానించదగ్గ పరిణామమే. అయితే దీని ఫలితాలెలా వచ్చాయి? ఇదీ గుణశేఖర్ అదృష్టాన్ని తేల్చే అంశం. దీన్ని పరిశీలిద్దాం!
కథేమిటి?
.చైత్ర (సారా అర్జున్) ఓ స్కూల్ స్టూడెంట్. ఆమెకి రిచ్ పేరెంట్స్ వుంటారు. ఓ రోజు ఫ్రెండ్స్ పార్టీకి పిలిచారని పేరెంట్స్ కి చెప్పి వెళ్తుంది. ఆ పబ్ లో వికాస్ (విఘ్నేష్) తన ఫ్రెండ్స్ తో ఉంటాడు. ఇతను వేరే పబ్లిక్ స్కూల్ స్టూడెంట్. అక్కడ ఇతను చిత్రని చూసి ఎట్రాక్ట్ అవుతాడు. ఆమెతో మాటలు కలిపి ఫ్రెండ్ బర్త్ డే పార్టీకి వెళ్దామని ఒప్పించి కారెక్కించుకుని కుని బయల్దేరతాడు. కారులో వికాస్ ఫ్రెండ్స్ కూడా వుంటారు. వెళ్తూ వికాస్ చైత్రకి మత్తు ఇంజెక్షన్ ఇస్తాడు. ఆ తర్వాత అందరూ కలిసి ఆమెని రేప్ చేస్తారు.
చైత్ర జరిగింది పేరెంట్స్ కి చెప్తుంది. పేరెంట్స్ ఆ కుర్రాళ్లపై కేసు పెడతారు. పోలీస్ కమిషనర్ జయదేవ్(గౌతమ్ మీనన్) ఆ కుర్రాళ్ళు మైనర్లు కావడంతో వాళ్ళ పేర్లు రివీల్ చేయకుండా పేరెంట్స్ పేర్లు వెల్లడిస్తాడు. వాళ్ళంతా పొలిటికల్ లీడర్స్ సహా పలుకుబడి వున్న వ్యక్తులు. అందులో వికాస్ పేరేంట్స్ వింధ్య (భూమిక), వివేక్ చక్రవర్తి (రోహిత్) లు కూడా వుంటారు. . వింధ్య వికాస్ పబ్లిక్ స్కూల్ ప్రిన్సిపల్, వివేక్ రియల్ ఎస్టేట్ బిగ్ షాట్. వింధ్య . తన కొడుకు ఇలాంటి పనిచేశాడని తెలిసి ప్రిన్సిపల్గా రాజీనామా చేస్తుంది. కొడుకు తప్పు చేశాడని అతడి మీద సాక్ష్యాధారాలు కూడా పోలీసులకి ఇస్తుంది. దీంతో ఈ ఐదుగురు కుర్రాళ్లకి 20ఏళ్లు జైలు శిక్ష పడుతుంది. జైల్లో వికాస్ ఏం చేశాడు? నగరంలోమాద్రక ద్రవ్యాల రవాణాకి, అతడికీ ఉన్న సంబంధం ఏంటి? వికాస్ తల్లి వింధ్య ఎందుకు తాగుడికి బానిస అయ్యింది? ఆమె తననే శిక్షించాలని ఎందుకు కోర్ట్ కి ఎక్కింది? ఈ ప్రశ్నలకి సమాధానమే మిగతా కథ.
ఎలావుంది కథ?
ఇంకా మైనర్ పిల్లలుగా ఉండగానే నేటితరం యువత, ఎలా వ్యసనాలకి బానిసలై నేరస్తులవుతున్నారో చూపించే కథ. బిజీ పేరంట్స్ నిఘా లేకపోవడంతో, పైగా ఒంటరి తనం ఫీలవడంతో బయట నెగెటివ్ గా సోష లైజ్ అవుతూ అమాయకుల పాలిట దుర్మా ర్గులవు తున్నారని చెప్పే కథ. తప్పంతా పెద్దలదే అని సందేశమిచ్చే కథ.
అయితే కథతో వచ్చిన ఇబ్బంది ఏమిటంటే ఈ కథ ఇంటర్వెల్ దగ్గరే ముగిసిపోవడం. ముగిసిపోయిన కథకి వేరే పాయింటు జోడించి సెకండాఫ్ కథ చెప్పబోవడం. ఈ ప్రయత్నం బెడిసికొట్టడం. ఫస్టాఫ్ లో స్కూల్ స్టూడెంట్స్ కలిసి పార్టీకి వెళ్లడంతో ప్రారంభమయ్యే కథ, అక్కడ చైత్రని ట్రాప్ చేసి రేప్ చేయడం, అందులో వికాస్ తల్లి స్కూల్ ప్రిన్సిపాల్ కావడం వంటి మలుపులతో, ఇంకా ఆమే పూనుకుని కొడుకు సహా అందర్నీ చట్టానికి పట్టించి శిక్షలు పడేలా చూడడంతో ఫస్టాఫ్ కే అయిపొయింది కథ.
సెకండాఫ్ లో జైల్లో వున్నా కొడుకుని సంస్కరించాలని అతడి తల్లి వింధ్య ప్రయత్నించడం కథగా చేసి పొడిగించారు.దీంతో ఫస్టాఫ్ కీ, సెకండాఫ్ కీ పొంతన కుదరక సెకండాఫ్ పూర్తిగా ఫిఫలమైంది. కథని ఇలా చేయడాన్ని సెకండాఫ్ సిండ్రోం అంటారు. ఇలా వచ్చిన సినిమాలన్నీ ఫ్లాపయ్యాయి.
ఫస్టాఫ్ వరకూ కొత్త పంథాలో ఆసక్తి రేపుతూ పరిగెడుతుంది కథ. కొన్ని షాకింగ్ సీన్లు వుంటాయి. వివరంగా సాగే పోలీస్ ఇన్వెస్టిగేషన్ రియలిస్టిక్ గా వున్నా కొన్ని అసహజాలతో వుంటుంది. పైగా డాక్యుమెంటరీ లా వుండేసరికి సినిమా కవసరమైన డ్రామా కొరవడి డ్రైగా మారుతుంది. అయినా ఇంటర్వెల్ సీనుతో మ్గిసే ఫస్టాఫ్ తో కథ అయిపోవడం దగ్గరే వచ్చింది సమస్య!
దీంతో సెకండాఫ్ ని జైల్లో వున్నా కొడుకుని సంస్కరించే వింధ్య కథని తెచ్చి అతికించారు. దీంతో ఎమోషనల్ కనెక్ట్ లేక ఆమె ఏం చేస్తోందో అంతుపట్టని గందరగోళానికి దారి తీస్తుంది. దీనికి మళ్ళీ జైల్లో డ్రగ్ ట్రాఫికింగ్ కథ కలిపి ఇంకా గజిబిజి చేశారు. ఇక రేప్ చేసి వచ్చిన వాళ్లని జైల్లో ఎలా ట్రీట్ చేస్తారనే సీన్లు కూడా కలిపారు. ఇలా కథ కానీ కథతో సెకండాఫ్ బరువుగా, బారుగా సాగి- క్లయిమాక్స్ సీనులో ఎమోషనల్ కంటెంట్ ఇచ్చారు. ఇది బావున్నా ఈ కథ ఇలాకాడు చెప్పాల్సింది! గుణశేఖర్ ప్రయోగం పేరుతొ చేసిన ఈ ప్రయత్నం సెకండాఫ్ సిండ్రోం అనే సుడి గుండంలో పడిందని తెలుసుకోక పోవడం చాలా విచారకరం!
ఎవరెలా చేశారు?
చైత్ర పాత్రలో సారా అర్జున్ మంచి సానుభూతిని రాబట్టుకుంటుంది. ఈమె సంఘర్షణ అర్ధవంతగా, బలంగా వుంటుంది. రేప్ బధితురాలిగా మైనర్ బాలిక బాధని గుండెల్ని తడిమేలా నటించింది. వికాస్ గా విఘ్నేష్ కూడా బాగా చేశాడు. పెడదారి పట్టిన ఈ తరం కుర్రాడిగా, ఖైదీగా, మారిన కుర్రాడిగా విభిన్న షేడ్స్ లో నటనతో తనని నిరూపించుకున్నాడు. భూమిక నటించిన వింధ్య పాత్రకి సరైన జస్టిఫికేషన్ లేకపోవడంతో ఆమె పడ్డ కష్టం వృధా పోయింది. చివరికి కోర్టు సీను కూడా పేలవంగా వుండడం దర్శకుడి వైఫల్యమే. పోలీస్ కమిషనర్గా గౌతమ్ మీనన్ ఫర్వాలేదనిపిస్తాడు. ఇతర పాత్రల్లో యువ, సీనియర్ నటులందరూ ఓకే.
సాంకేతికంగా చూస్తే, కాల భైరవ సంగీతం కథకి తగ్గట్టు ట్రెండీగా ఉంది. పాటలు బావున్నా కథ బాగా లేకపోవడంతో వచ్చి బోరు కొట్టిస్తాయి. ప్రవీణ్ కే పోతన్ కెమెరా వర్క్ డీసెంట్ గా వుంది. కానీ ప్రవీణ్ పూడి ఎడిటింగ్ లోపాలు చాలా వున్నాయి. సన్నివేశాలకి కంటిన్యుటీ సమస్య వుంది. కథే అలా వున్నప్పుడు తనేం చేయగలదు. మిగతా నిర్మాణ విలువలు మాత్రం క్వాలిటీతో వున్నాయి.
చివరికేమిటి?
ఈ సినిమా ఇంటర్వెల్లోనే కథ ముగిసిపోయిందని సీనియర్ దర్శకుడు గుణశేఖర్ తెలుసుకోకపోవడం చాలా విచారకరం. ఇంటర్వెల్లో అయిపోయిన కథ లోంచి కథ ఎలా లాగుతారు సెకండాఫ్ కి? అలా లాగితే ఏమౌతుంది? ఇది అర్ధంగాకే భూమికా చావ్లా పాత్ర మందు బాటిల్ పట్టినట్టుంది. ఇంటర్వెల్లో కథ అయిపోయిందంటే ఆ సినిమా సెకండాఫ్ సిండ్రోంలో పడినట్టే- ఏం చేసీ ఇక బతికించలేరు. బతికిపోవడానికి ఈ సినిమా చూస్తున్న ప్రేక్షకులకీ మార్గం లేదు
ఫ్లాపయిన సెకండాఫ్ సిండ్రోముల లిస్టులో కొన్ని…సవ్యసాచి, దర్బార్, నిను వీడని నీడను నేనే, సైజ్ జీరో, 24 కిస్సెస్, నర్తనశాల, పడి పడి లేచే మనసు, ఉగ్రం, ఊర్వశివో రాక్షసివో, ధమ్, దొంగోడు. కాటమ రాయుడు, మిస్సింగ్, ‘వి’, జో అచ్యుతానంద, నూటొక్క జిల్లాల అందగాడు, రంగుల రాట్నం…ఇలా సాగుతూనే వుంటుంది లిస్టు. సారీ గుణశేఖర్ జీ, ఈ లిస్టులో మీరు చేరిపోయారు!
రేటింగ్: 2.25 /5
