టిఆర్ఎస్ పై కాంగ్రెస్ నేత రేవంత్ రెడ్డి సంచలన వ్యాఖ్యలు చేశారు. కారు డ్రైవర్ ను మారిస్తే ఇబ్బంది పడతారని చెబుతున్న కేటిఆర్ అసలు నిజం తెలుసుకోవాలన్నారు. కారు డ్రైవర్ ను మార్చాలని చూస్తున్నది మీ బావ హరీష్ అంటూ రేవంత్ ఘాటు వ్యాఖ్యలు చేశారు.
ఏ క్షణమైన టిఆర్ఎస్ కుండ పగిలే అవకాశం ఉందన్నారు. అక్టోబర్ 25 వ తేదిన కొత్త ప్రభాకర్ రెడ్డి తూంకుంట నర్సారెడ్డిని తన కారులో ఎక్కించుకొని రాత్రి 9 గంటలకు మినిష్టర్ క్వార్టర్స్ కు వచ్చారన్నారు. అర్దరాత్రి 3 గంటల వరకు హరీష్ రావు ఇంట్లో రహస్య చర్చలు జరిపారన్నారు. మరుసటి రోజు ఉదయమే నర్సారెడ్డి రాహుల్ గాంధీ సమక్షంలో కాంగ్రెస్ లో చేరారన్నారు.
దీన్ని బట్టి చూస్తే టిఆర్ఎస్ లో లుకలుకలు ప్రారంభమయ్యాయని చాలా స్పష్టంగా తెలుస్తుందన్నారు. మామ అల్లుళ్ల మధ్య ఏం జరిగిందో చెప్పాల్సిన అవసరముందన్నారు. మరి వీళ్ల మధ్య ఉప్పు నిప్పయ్యిందా లేక తుఫాన్ వచ్చే ముందు ఉండే ప్రశాంతత ఉందా లేక విచ్చిన్నమయ్యే శక్తి ఉందా చెప్పాల్సిన అవసరముందన్నారు. “అసలు లొల్లి మీ ఇంట్ల పెట్టుకొని కాంగ్రెస్ ను అంటున్నరేందయ్యా.. ముందు మీరు సక్కగ చూసుకోండి. కారు డ్రైవర్ ను మేము మార్చాలని చూస్తలేము… కేటిఆర్… మీ బావ డ్రైవర్ ను మారుద్దామని చూస్తుండు.. చూసుకో.. ఊకనే మాట్లాడకు.. ” అంటూ రేవంత్ కేటిఆర్ కు కౌంటర్ ఇచ్చారు.
మాది సీల్డ్ కవర్ సీఎం అయితే మీది చీఫ్ లిక్కర్ సీఎం అంటూ రేవంత్ వ్యంగ్యాస్త్రాలు సంధించారు. తెలంగాణ అసెంబ్లీ రద్దు నాటికి, నేటికి తెలంగాణలో రాజకీయ పరిస్థితులు మారాయని ప్రస్తుత పరిస్థితులను చూసి కేసీఆర్ కు ఒణుకుతుందన్నారు. వాళ్లు వాళ్లు పుల్లలు పెట్టుకొని బయటోళ్లను అంటే ఏం సక్కదనం అంటూ రేవంత్ టిఆర్ఎస్ ను విమర్శించారు. గురువారం రేవంత్ బర్త్ డే. బర్త్ డే రోజు కూడా రేవంత్ టిఆర్ఎస్ ను వదలలేద్దంటూ పార్టీ నేతలు చర్చించుకున్నారు