టిఆర్ఎస్ అధినేత కేసిఆర్ వనపర్తి సభలోనూ పరుషమైన మాటలతో విరుచుకుపడ్డారు. వనపర్తిలోనూ నల్లగొండ సభ, నిజామాబాద్ సభ మాదిరిగానే కేసిఆర్ ఎపి సిఎం చంద్రబాబును ప్రధానంగా టార్గెట్ చేశారు. చంద్రబాబుపై మరింత డోసు పెంచి పచ్చిగా మాట్లాడారు. పరుషమైన భాషలో ఎగతాళి చేస్తూ మాట్లాడారు. చంద్రబాబు అమరావతి నుంచి స్పందించిన ప్రతి మాటకు వనపర్తి సభలోనూ కేసిఆర్ రిప్లై ఇచ్చారు.
చంద్రబాబుతో పొత్తా.. ఛీ.. ఛీ అంటూ అసహ్యించుకున్నారు. చంద్రబాబు అడుగు పెడితే పచ్చని చెట్టు కూడా భస్మమైతది అని ఎతేష్కం చేశారు. అంత దరిద్రమైన పాదం చంద్రబాబుది అన్నారు. బాబుది ఐరన్ లెగ్ అన్నారు. మా బతుకేదో మేము బతుకుతున్నం. నీతో పొత్తా? నీతో పొత్తు లేకుంటే మహా కూటమి వచ్చిందా? అని ప్రశ్నించారు. మహా కూటమా? మహా కూటమి సంగతేందో తేలుస్తాం. నీతోటి దోస్తాన్ మాకెందుకు? అని విరుచుకుపడ్డారు.
నరేంద్ర మోదీ కేసిఆర్ ఒకటైనరు అని చంద్రబాబు మాట్లాడడాన్ని కేసిఆర్ మళ్లీ ఖండించారు. అంతేకాదు ఇక కేసిఆర్ కు కంట్లో నలుసులా, చెవిలో జొర్రీగలా, కాళ్లల్ల కట్టె పెట్టినట్లుగా ఉండే రేవంత్ రెడ్డి మీద కూడా కేసిఆర్ వనపర్తి సభలో విమర్శలు గుప్పించారు. వాడు, బుడ్డర్ ఖాన్ అంటూ రేవంత్ ను ఉద్దేశించి అన్నారు. అయితే చంద్రబాబు పేరు తీసుకుని విమర్శలు చేసిన కేసిఆర్ ఆ సభలో రేవంత్ రెడ్డి పేరును మాత్రం ఉచ్చరించకుండానే పరోక్షంగా కామెంట్స్ చేశారు.
చంద్రబాబు, రేవంత్ గురించి కేసిఆర్ ఏం మాట్లాడారో కింద చదవండి.
చంద్రబాబు నాయుడూ నీతో పొత్తా.. ఛీ ఛీ.. నీతో పొత్తు పెట్టుకుంటమా? నీది దరిద్రపు పాదం.
నీ అడుగు పెట్టిన చోట పచ్చని చెట్టు కూడా భస్మమైపోతది. అంతటి ఐరన్ లెగ్ నీది.
నువ్వు ఓటుకు నోటు దొంగతనం చేసింది నిజం కాదా? దొరికిన దొంగవు కాదా?
నువ్వు పంపితివి కదా? ఒక బుడ్డర్ ఖాన్ గాడు వాడు అడ్డంగా దొరికె కదా? అది అబద్ధమా? నిజం కాదా?
ఆ దొంగతనంలో నీ పాత్ర లేదా? నీ వాయిస్ రికార్డు కాలేదా? నిన్ను ఎవరు వేధిస్తున్నరు బిడ్డా?
తెలుగు పేరుతోనేే కదా మా కొంప ముంచుతున్నది. తెలుగు తల్లి, తెలుగు భాష పేరుతో మమ్మల్ని 60 ఏండ్లు దోచుకున్నరు కదా? ఇంకా నీతోటి సోపతి చేస్తమా? మా బతుకేదో మేం బతుకుతున్నం.
రేవంత్ ఎన్ని మాట్లాడినా ఇంతకాలం సైలెన్స్ …
రేవంత్ రెడ్డి నాలుగున్నరేళ్ల కాలంలో టిఆర్ఎస్ సర్కారును ఉతికి ఆరేశారు. సందు దొరికితే కేసిఆర్ ఫ్యామిలీని టార్గెట్ చేసి మాట్లాడారు. కేసిఆర్ కుటుంబసభ్యులను కూడా వివాదంలోకి లాగారు. మై హోం రామేశ్వరరావు అనే వ్యాపారవేత్తను సైతం విమర్శించారు. తుదకు కేసిఆర్ కుటుంబసభ్యులను వ్యక్తిగతంగా విమర్శలు చేశారు. కేటిఆర్ కొడుకు ను చిట్టి నాయుడు అంటూ సంబోధించారు.
ఇవన్నీ మాట్లాడినా కేసిఆర్ కానీ, కేటిఆర్ కానీ ఏనాడూ రేవంత్ రెడ్డికి కౌంటర్ ఇవ్వలేదు. వాళ్లు పట్టించుకోనట్లే వ్యవహరించారు. కొన్నిసార్లు రేవంత్ కు ఎంపి బాల్క సుమన్ చేత కౌంటర్ ఇప్పించారు. కానీ బహిరంగ చర్చకు సిద్ధమా అంటూ బాల్క సుమన్ ఒక దశలో రేవంత్ కు సవాల్ చేశారు. ఆ సవాల్ ను రేవంత్ స్వీకరించడంతో బాల్క సుమన్ ఇరకాటంలో పడ్డారు. తర్వాత దాన్నుంచి తేరుకోవడానికి బాల్క సుమన్ కు చాలా కాలమే పట్టింది. దొంగతో నేను చర్చ చేయను.. ఉత్తమ్ కుమార్ రెడ్డి, జానారెడ్డి వస్తేనే చర్చ చేస్తా అంటూ బాల్క సుమన్ తప్పించుకునే ప్రయత్నం చేశారు.
అయితే ఎన్నికల వేళ, అది కూడా వనపర్తిలో సభ కావడంతో రేవంత్ రెడ్డిని ఉద్దేశించి కేసిఆర్ వాడు, వీడు అంటూ పరుషంగా మాట్లాడినట్లు తెలుస్తోంది. వనపర్తిలో రేవంత్ కు బాగానే పట్టు ఉంది. ఆయన అక్కడే చదువుకున్నారు. అందుకోసమే రేవంత్ రెడ్డిని చీఫ్ గెస్ట్ గా పిలిచి స్థానిక మాజీ ఎమ్మెల్యే చిన్నారెడ్డి సభ కూడా ఏర్పాటు చేసుకున్నారు. చిన్నవాడైనా రేవంత్ ను చిన్నారెడ్డి సభకు ఆహ్వానించాడంటే రేవంత్ కు వనపర్తిలో బలమెంతో చెప్పాల్సిన అవసరం లేదు.
ఈ పరిస్థితుల్లోనే రేవంత్ కు బలమైన చోటే దెబ్బ కొట్టాలన్న ఉద్దేశంతో కేసిఆర్ కరుకుగా మాట్లాడినట్లు తెలుస్తోంది. బుడ్డర్ ఖాన్ గాడు అంటూ రేవంత్ పేరు తీసుకోకుండానే కామెంట్స్ చేశారు. చంద్రబాబు పేరు తీసుకుని ఏక కాలంలో అటు బాబును, ఇటు రేవంత్ ను కలిపి కడిగి పారేశారు కేసిఆర్.
కేసిఆర్ మాటలకు రేవంత్ ఏరకంగా స్పందిస్తారో చూడాలి. ఎందుకంటే గత నాలుగేళ్లుగా ఎప్పుడు మాట్లాడినా పట్టించుకోనట్లు ఉన్నారు కేసిఆర్ ఫ్యామిలీ. చాలారోజుల తర్వాత రేవంత్ ను కేసిఆర్ విమర్శించడం చర్చనీయాంశమైంది.
ఇది కూడా చదవండి
కెసియార్ మూడో కన్ను మీద సోషల్ మీడియా సెటైర్