రాజకీయాలకు పెట్టింది పేరైన నెల్లూరు జిల్లాలో ఇప్పుడు సరికొత్త రాజ్యాంగం నడుస్తోంది. ఒకప్పుడు జిల్లా రాజకీయాలను శాసించిన, మైకుల ముందు సింహాల్లా గర్జించిన సీనియర్ నేతలకు ఇప్పుడు జిల్లాలో పత్తా లేకుండా పోయింది. ప్రస్తుతం సింహపురి రాజకీయాల్లో వార్డు మెంబర్ సీటు కావాలన్నా, మున్సిపల్ చైర్మన్ పీఠం దక్కాలన్నా, జెడ్పీ చైర్మన్ కావాలన్నా.. చివరకు నెల్లూరు మేయర్ సీటు వైపు కన్నెత్తి చూడాలన్నా ఒక్కటే రూట్.. అదే మేడం వేమిరెడ్డి ప్రశాంతి రెడ్డి రూట్.
జిల్లాలో ఇప్పుడు ఏ చిన్న టికెట్ దక్కాలన్నా మేడం గారి దీవెనలు, ఆశీస్సులు వంద శాతం ఉండి తీరాల్సిందేనని జిల్లా తమ్ముళ్లు చెవులు కొరుక్కుంటున్నారు. జిల్లాలో దశాబ్దాలుగా పార్టీని నమ్ముకుని, ప్రతిపక్షంలో ఉన్నప్పుడు వందలాది కేసులు భరించి నిలబడిన సీనియర్ నేత సోమిరెడ్డి చంద్రమోహన్ రెడ్డి పరిస్థితి ఇప్పుడు జిల్లాలో ఉండీ లేనట్టు తయారైందనే టాక్ వినిపిస్తోంది. ఒకప్పుడు జిల్లా అంతటా హల్చల్ చేసిన పెద్దాయనకు ఇప్పుడు స్వంత నియోజకవర్గం దాటి బయటకు వచ్చే స్కోప్ కూడా తగ్గించేశారని ఇన్ సైడ్ టాక్.
ఎంత సీనియారిటీ ఉన్నా, ఎంత అనుభవం ఉన్నా.. ప్రస్తుత మేడం సామ్రాజ్యంలో సోమిరెడ్డి లాంటి పాత తమ్ముళ్లకు ప్రాధాన్యత కేవలం నామమాత్రంగానే మిగిలిపోయిందని, వారంతా సైడ్ సీటుకే పరిమితం అయ్యారని నెల్లూరు వేదికగా సెటైర్లు పేలుతున్నాయి. ఇక దశాబ్దాల రాజకీయ చరిత్ర, సొంత ముద్ర ఉన్న సీనియర్ నేత ఆనం రామనారాయణ రెడ్డి పరిస్థితి మరీ విచిత్రంగా మారింది. ఏ అంశం మీదనైనా తనదైన శైలిలో కౌంటర్లు ఇచ్చే ఆనం కూడా నెల్లూరు జిల్లాలో జరుగుతున్న ఈ ఏకఛత్రాధిపత్యాన్ని చూసి నేనేం చేయలేను బాబోయ్ అన్నట్టు మిన్నకుండిపోవాల్సి వస్తోంది.
అటు కోటీశ్వరుడైన మాజీ మంత్రి నారాయణ కథ సరేసరి. జిల్లా రాజకీయాల్లో ఈ పెత్తనాన్ని చూసి తట్టుకోలేకనో ఏమో.. ఆయన జిల్లాకు వీలైనంత దూరంగా ఉంటూ, అమరావతి లోని తన సామ్రాజ్యానికే పూర్తిగా పరిమితం అయిపోయారు. జిల్లాలో చక్రం తిప్పాల్సిన నారాయణ.. ఇప్పుడు రాజధాని దాటి రావడం లేదంటే ఇక్కడి పొలిటికల్ హీట్ ఏ స్థాయిలో ఉందో అర్థం చేసుకోవచ్చు. రాబోయే లోకల్ బాడీ ఎన్నికల కోసం నెల్లూరు జిల్లాలో ఇప్పటి నుంచే స్కెచ్‌లు మొదలయ్యాయి. అయితే ఇక్కడ విశేషం ఏంటంటే.. ఏ నియోజకవర్గంలో ఏ లీడర్ పోటీ చేయాలనేది స్థానిక ఎమ్మెల్యేలు కాదు, వేమిరెడ్డి ప్రశాంతి రెడ్డి డిసైడ్ చేస్తారట.
మేయర్ అభ్యర్థి నుంచి వార్డు మెంబర్ వరకు ప్రతి ఒక్కరూ మేడం అపాయింట్‌మెంట్ కోసం లైన్ కడుతున్నారు. దశాబ్దాలుగా జిల్లాను ఏలిన సింహపురి సింహాలంతా ఇప్పుడు తోకలు ముడిచి సైలెంట్ అయిపోగా.. మొత్తం నెల్లూరు పగ్గాలు వేమిరెడ్డి ప్రశాంతి రెడ్డి చేతుల్లోనే నడుస్తుండటం ఏపీ రాజకీయాల్లోనే హాట్ టాపిక్‌గా మారింది. మరి ఈ మేడం పెత్తనంపై రాబోయే రోజుల్లో పాత క్యాడర్ ఎలాంటి రియాక్షన్ ఇస్తుందో చూడాలి.