ఉత్తరాంధ్ర రాజకీయాల్లో నిన్నటి దాకా వైఎస్సార్ కాంగ్రెస్ పార్టీలో చక్రం తిప్పిన విజయనగరం జడ్పీ చైర్మన్ మజ్జి శ్రీనివాసరావు అలియాస్ చిన్న శ్రీను టక్కున ప్లేట్ ఫిరాయించి పచ్చ కండువా కప్పేసుకున్నాడు. కుమార్తె సిరి సహస్రకు గ్రేటర్ విశాఖ (GVMC) మేయర్ పీఠం దక్కించుకోవడమే పరమావధిగా ఈయన సరికొత్త పొలిటికల్ గేమ్ ఆడినట్లు అందరూ అనుకుంటున్నారు. అయితే, చిన్న శ్రీను చేసిన ఈ క్రేజీ పొలిటికల్ మూవ్ విశాఖ కంటే ఎక్కువగా విజయనగరం జిల్లా గజపతినగరం నియోజకవర్గంలో పెను భూకంపం సృష్టిస్తోంది.
ముఖ్యంగా ప్రస్తుతం కూటమి ప్రభుత్వంలో మంత్రిగా ఉంటూ గజపతినగరం ఎమ్మెల్యేగా చలామణి అవుతున్న కొండపల్లి శ్రీనివాస్ సీటు కిందకు ఇప్పుడు మెల్లగా నీళ్లు చేరుతున్నాయనే టాక్ పొలిటికల్ సర్కిల్స్ లో నడుస్తోంది. నిజానికి గజపతినగరం నియోజకవర్గంలో చిన్న శ్రీనుకు భారీ ఎత్తున సొంత కేడర్, బలమైన అనుచరవర్గం ఉంది. మొన్నటి దాకా ఇక్కడ వైసీపీ తరఫున బొత్స అప్పలనర్సయ్య ఉన్నప్పటికీ, బ్యాక్గ్రౌండ్లో చక్రం తిప్పింది మాత్రం చిన్న శ్రీనునే.
ఇప్పుడు ఆయనే నేరుగా తన అనుచర గణంతో సహా సైకిల్ ఎక్కేయడంతో, గజపతినగరంలో మంత్రి కొండపల్లి శ్రీనివాస్ ఆధిపత్యానికి పెద్ద బ్రేక్ పడినట్లయింది. ఇప్పటివరకు నియోజకవర్గంలో తానే సుప్రీం అనుకుంటూ పట్టు బిగిస్తున్న మంత్రి గారికి, ఇప్పుడు సొంత పార్టీలోనే అంతకంటే బలమైన లోకల్ లీడర్ వచ్చి కూర్చోవడంతో ఏం చేయాలో పాలుపోని పరిస్థితి ఏర్పడింది. నియోజకవర్గంలో చిన్న శ్రీను మాట చెల్లుతుందా, లేక మంత్రి కొండపల్లి మాట నడుస్తుందా అనే ‘ఈగో వార్’ ఇప్పుడే మొదలైందని స్థానిక తమ్ముళ్లు గుసగుసలాడుకుంటున్నారు.
పైగా చిన్న శ్రీను కేవలం విశాఖ మేయర్ సీటుతోనే ఆగిపోయే రకం కాదని జిల్లా రాజకీయాలు తెలిసిన వాళ్లు పెదవి విరుస్తున్నారు. భవిష్యత్తులో గజపతినగరం అసెంబ్లీ నియోజకవర్గంపై ఆయన కన్నేసినా ఆశ్చర్యపోవాల్సిన అవసరం లేదు. ఒకవేళ వచ్చే ఎన్నికల నాటికి లేదా లోకల్ బాడీ ఎన్నికల్లో చిన్న శ్రీను తన అనుచరులకు ప్రాధాన్యత ఇవ్వాలని పట్టుబడితే.. మంత్రి కొండపల్లి శ్రీనివాస్ కి ఇబ్బందులు తప్పవని స్పష్టమవుతోంది. నిన్నటి దాకా ప్రత్యర్థిగా ఉన్న నేత, నేడు పార్టీలోకి వచ్చి నెత్తిన కూర్చోవడంతో మంత్రి గారి పరిస్థితి “ముంగిట పాము” చందంగా మారింది. కూతురి కోసం చిన్న శ్రీను వేసిన స్కెచ్, వైజాగ్ లో వర్కవుట్ అయ్యే సంగతి దేవుడెరుగు కానీ, విజయనగరంలో మాత్రం మంత్రి కొండపల్లి శ్రీనివాస్ కి పక్కలో బల్లెంలా మారిందనడంలో ఎలాంటి సందేహం లేదు.