ఆంధ్రప్రదేశ్‌లో స్థానిక సంస్థల ఎన్నికల సన్నద్ధత వేళ రాజధాని జిల్లాలైన విజయవాడ, గుంటూరు మున్సిపల్ కార్పొరేషన్ల మేయర్ పీఠాల చుట్టూ తిరుగుతున్న రాజకీయం అత్యంత ఆసక్తికరంగా మారింది. ఒకే కూటమిలో ఉన్న ఇద్దరు పవర్‌ఫుల్ ఎంపీల పనితీరు, వారి వ్యూహాత్మక చతురతపై ఇప్పుడు తమ్ముళ్లలో సరికొత్త పోలిక మొదలైంది. విజయవాడ ఎంపీ కేశినేని శివనాథ్ తన పరిధిలోని మేయర్ సీటును జనసేన ఖాతాలోకి వెళ్లకుండా పట్టుబట్టి కాపాడుకోలేకపోయారనే అసంతృప్తి క్యాడర్‌లో వ్యక్తమవుతుండగా, గుంటూరు ఎంపీ పెమ్మసాని చంద్రశేఖర్ మాత్రం తన మార్క్ స్కెచ్‌తో గుంటూరు మేయర్ సీటు చేజారకుండా పక్కాగా జాగ్రత్తపడ్డారనే విశ్లేషణలు పొలిటికల్ సర్కిల్స్‌లో జోరందుకున్నాయి.
విజయవాడ రాజకీయాలను పరిశీలిస్తే, కూటమి పొత్తుల సమీకరణాల్లో భాగంగా ప్రతిష్టాత్మకమైన బెజవాడ మేయర్ పీఠం జనసేన వైపు మొగ్గు చూపుతోందనే వార్తలు దశాబ్దాలుగా పార్టీని నమ్ముకున్న పాత తరం నేతలను తీవ్ర ఆవేదనకు గురిచేస్తున్నాయి. వంగవీటి రాధాకృష్ణ జనసేనలోకి రావడం, మేయర్ అభ్యర్థిగా ఆయన పేరు తెరపైకి రావడంతో నగర టీడీపీ శ్రేణులు రగిలిపోతున్నాయి. సీనియర్ల త్యాగాలను కాపాడటంలోనూ, జనసేన డిమాండ్లను తిప్పికొట్టి మేయర్ స్థానాన్ని టీడీపీ వద్దే ఉంచుకోవడంలోనూ ఎంపీ కేశినేని చిన్నీ ఆశించిన స్థాయిలో పట్టుబట్టలేకపోయారని, అధిష్ఠానం వద్ద బెజవాడ తమ్ముళ్ల వాయిస్‌ను గట్టిగా వినిపించడంలో విఫలమయ్యారనే టాక్ నడుస్తోంది.
దీనికి పూర్తి భిన్నంగా గుంటూరు ఎంపీ, కేంద్ర మంత్రి పెమ్మసాని చంద్రశేఖర్ వ్యవహరించిన తీరుపై ప్రశంసలు కురుస్తున్నాయి. గుంటూరు కార్పొరేషన్‌లో ఏకంగా 35 శాతం సీట్లతో పాటు తెనాలి, పొన్నూరు మున్సిపాలిటీల్లో కీలక స్థానాలు కావాలని జనసేన జిల్లా నేత కిలారి రోశయ్య బహిరంగంగానే పెద్ద స్కెచ్ వేశారు. ఈ డిమాండ్లతో టీడీపీకి గుంటూరులో ఏమీ మిగల్చరా అనే కంగారు కార్యకర్తల్లో మొదలైనప్పటికీ, పెమ్మసాని మాత్రం అంతర్గత చర్చల్లో చాలా చాకచక్యంగా వ్యవహరించినట్లు తెలుస్తోంది. జనసేనకు తగిన ప్రాధాన్యత ఇస్తూనే, గుంటూరు కార్పొరేషన్ మేయర్ పీఠంపై తెలుగుదేశం జెండానే ఎగిరేలా, ఆ సీటు చేజారిపోకుండా అధిష్ఠానం వద్ద ముందే పక్కాగా లైన్ క్లియర్ చేసుకుని పెమ్మసాని తన పొలిటికల్ వెయిట్‌ను నిరూపించుకున్నారనే అనాలసిస్ నడుస్తోంది.