ఆంధ్రప్రదేశ్‌లో మున్సిపల్, స్థానిక సంస్థల ఎన్నికల నామినేషన్ల పర్వం ముగుస్తున్న తరుణంలో అధికార కూటమిలో సీట్ల పంపకాల చిచ్చు ఒక్కసారిగా బట్టబయలైంది. ఎన్టీఆర్ జిల్లా తిరువూరు నగర పంచాయతీ ఎన్నికల్లో టీడీపీ, జనసేన పార్టీల మధ్య టికెట్ల కేటాయింపు తీవ్ర ఉద్రిక్తతకు దారితీసింది. మిత్రధర్మంలో భాగంగా తిరువూరు చైర్మన్ స్థానాన్ని జనసేనకు కేటాయిస్తూ ముఖ్యమంత్రి చంద్రబాబు నాయుడు తీసుకున్న నిర్ణయంపై స్థానిక టీడీపీ ఎమ్మెల్యే కొలికపూడి శ్రీనివాసరావు బహిరంగంగానే తిరుగుబాటు బావుటా ఎగరవేయడం ఇప్పుడు రాష్ట్ర రాజకీయాల్లో హాట్ టాపిక్‌గా మారింది.
పార్టీ అధినేత ఆదేశాలనే ధిక్కరిస్తూ కొలికపూడి తన సొంత అభ్యర్థిని బరిలోకి దించుతుండటంతో, అసలు సొంత పార్టీ ఎమ్మెల్యేలను కంట్రోల్ చేయడంలో టీడీపీ లీడర్‌షిప్ విఫలమైందా అనే చర్చ జోరందుకుంది. ఈ అంతర్గత పోరులో భాగంగా, జనసేనకు కేటాయించిన సీటును దక్కించుకునేందుకు ఎమ్మెల్యే కొలికపూడి శ్రీనివాసరావు పక్కా ప్లాన్ సిద్ధం చేశారు. చంద్రబాబు నిర్ణయాన్ని పక్కనబెట్టి, తన వర్గానికి చెందిన అభ్యర్థి పెనుబల్లి శ్రావణిని టీడీపీ తరఫున తిరువూరు చైర్మన్ అభ్యర్థిగా ఆదివారం నామినేషన్ వేయించడానికి రంగం సిద్ధం చేశారు.
ఈ మేరకు నామినేషన్ ర్యాలీకి అందరికీ ఆహ్వానం పలుకుతూ ఆయన సోషల్ మీడియాలో పెట్టిన అధికారిక పోస్ట్ ఇప్పుడు కూటమి శ్రేణులను తీవ్ర గందరగోళంలోకి నెట్టింది. సార్వత్రిక ఎన్నికల సమయం నుంచే కొలికపూడి శ్రీనివాసరావు దూకుడు రాజకీయాలు చేస్తుండటం, స్థానిక జనసేన నేతలతో ఆయనకు సఖ్యత లేకపోవడం ఈ తాజా వివాదానికి ప్రధాన కారణంగా కనిపిస్తోంది. ఇప్పుడు నేరుగా చంద్రబాబు సీట్ల సర్దుబాటు నిర్ణయాన్నే సవాల్ చేస్తూ సొంత నామినేషన్లకు పిలుపునివ్వడం, తిరువూరులో జనసేన క్యాడర్‌ను తీవ్ర అసంతృప్తికి గురిచేస్తోంది.
రేపు నామినేషన్ల గడువు ముగియనుండటంతో, తిరువూరులో కొలికపూడి వర్గం నామినేషన్ వేస్తే గనుక పొత్తు బంధం దెబ్బతినే ప్రమాదం ఉందని అధిష్ఠానం ఆందోళన చెందుతోంది. మరి కొద్ది గంటల్లోనే చంద్రబాబు లేదా లోకేష్ రంగంలోకి దిగి కొలికపూడిని లైన్‌లోకి తెస్తారా, లేక తిరువూరులో కూటమి మధ్య ఫ్రెండ్లీ కాంటెస్ట్ తప్పదా అనేది ఉత్కంఠ రేపుతోంది.