ఉత్తరాంధ్ర రాజకీయాల్లో భీష్ముడిగా, ఏ పార్టీ అధికారంలో ఉన్నా కింగ్ లాగా చక్రం తిప్పే సీనియర్ నేత బొత్స సత్యనారాయణ గరివిడిలో నిర్వహించిన కార్యకర్తల భేటీలో వెక్కి వెక్కి ఏడ్చారు. మీడియా ముందు ఎంత గంభీరంగా “రాజకీయాల్లో మనుషులు వస్తుంటారు.. పోతుంటారు.. పార్టీ శాశ్వతం” అని లెక్చర్లు దంచినా.. లోపల జరిగిన డ్యామేజ్ ఎంత పెద్దదో ఆయన కళ్లల్లో వచ్చిన నీళ్లే సాక్ష్యంగా నిలిచాయి. ఎందుకంటే, పార్టీ మారింది ఎవరో కాదు.. దశాబ్దాలుగా జిల్లాలో బొత్సకు కుడి భుజంలా, వైఎస్సార్ కాంగ్రెస్ పార్టీకి అసలైన గెలుపు గుర్రంలా ఉన్న సొంత మేనల్లుడు, జెడ్పీ చైర్మన్ మజ్జి శ్రీనివాసరావు అలియాస్ చిన్న శ్రీను.
చిన్న శ్రీను టక్కున సైకిల్ ఎక్కేయడంతో, మేనమామ బొత్స సామ్రాజ్యానికి పునాదులే కదిలిపోయాయనే టాక్ నడుస్తోంది. అసలు చిన్న శ్రీను.. మేనమామ బొత్సకు ఎందుకు అంత బలం అనే విషయానికి వస్తే, విజయనగరం జిల్లా రాజకీయాల్లో బొత్స కేవలం ఒక ముఖం మాత్రమే, కానీ క్షేత్రస్థాయిలో కేడర్ను నడిపించడం, నిధులు సమకూర్చడం, ఎన్నికల మేనేజ్మెంట్ మొత్తం చూసుకునే పక్కా ‘ఆపరేటర్’ చిన్న శ్రీను. బొత్స కేవలం ఆర్డర్లు వేస్తే.. గ్రౌండ్ లో దూసుకెళ్లి పని పూర్తి చేసే ఏకైక నమ్మకస్థుడు ఆయనే.
భీమిలి నియోజకవర్గ వైసీపీ సమన్వయకర్తగా, జిల్లా పార్టీ అధ్యక్షుడిగా చిన్న శ్రీనుకు ఉన్న లోకల్ కేడర్, కాపు సామాజిక వర్గంలో ఉన్న పట్టు అంతా ఇంతా కాదు. ఇప్పుడు ఆ అసలైన ఇంజనే పచ్చ గూటికి చేరిపోవడంతో, విజయనగరంలో మేనమామ బొత్స ఒంటరివాడైపోయాడు. ఈ దెబ్బతో జిల్లాలో వైసీపీ ఖాళీ అవ్వడం ఖాయమని ముందే పసిగట్టడం వల్లే గరివిడి మీటింగ్లో బొత్సకు కన్నీళ్లు ఆగలేదని నెటిజన్లు సెటైర్లు వేస్తున్నారు. పైగా చిన్న శ్రీను ఒక్కడే వెళ్లలేదు, తన కుమార్తె సిరి సహస్రకు గ్రేటర్ విశాఖ మేయర్ పీఠం దక్కించుకునేలా చంద్రబాబుతో పక్కా డీల్ కుదుర్చుకుని మరీ వెళ్లాడు.
సొంత మేనల్లుడే తన పొగబెట్టే రాజకీయాలు తట్టుకోలేక, భవిష్యత్తు చూసుకుని పార్టీ మారడంతో.. బొత్సకు ఇటు రాజకీయంగానూ, అటు కుటుంబపరంగానూ కోలుకోలేని షాక్ తగిలింది. “కూతురి భవిష్యత్తు కోసం మేనల్లుడు భలే ప్లాన్ చేసుకున్నాడు కానీ, జిల్లాలో మేనమామ పరువును మాత్రం గంగలో కలిపేశాడు” అంటూ స్థానిక తమ్ముళ్లు గట్టిగానే నవ్వుకుంటున్నారు. ఏదేమైనా ఎప్పుడూ గంభీరంగా ఉండే బొత్స సత్యనారాయణను ఇలా కంటతడి పెట్టించాడంటే.. చిన్న శ్రీను వేసిన స్కెచ్ మామూలుగా లేదు భయ్యా అనే టాక్ నడుస్తోంది.