ఏపీలో స్థానిక సంస్థల ఎన్నికల నగారా మోగకముందే సీట్ల సర్దుబాటు, మేయర్ పీఠాల పంపకాలపై కూటమిలో ముసలం పుడుతోంది. విజయవాడ మేయర్ స్థానం జనసేనకు ఇచ్చి, గుంటూరు టీడీపీ ఉంచుకోవాలా లేదా వైస్-వర్సా చేయాలా అనే దానిపై పవన్ కళ్యాణ్ ప్రతిపాదనలు, పెమ్మసాని, కేశినేని చిన్నిల అభ్యంతరాల చుట్టూనే రాజకీయం తిరుగుతోంది. నిన్నటి కేబినెట్ మీటింగ్ తర్వాత చంద్రబాబు, పవన్ మధ్య జరిగిన అంతర్గత చర్చల గాసిప్స్ కూడా ఈ రెండు పార్టీల చుట్టూనే నడిచాయి. కానీ, ఈ మొత్తం ఎపిసోడ్లో కూటమిలో ఉన్న బీజేపీ నేతల గోల ఎక్కడా వినిపించకపోవడం గమనార్హం.
సాధారణంగా మున్సిపల్, కార్పొరేషన్ ఎన్నికల్లో స్థానిక క్యాడర్ బలం, ఓటు బ్యాంక్ అత్యంత కీలకం. అసెంబ్లీ ఎన్నికల్లో టీడీపీ, జనసేన వేవ్తో పాటు మోదీ ఇమేజ్ కలిసి వచ్చి బీజేపీ కొన్ని స్థానాల్లో గెలిచినప్పటికీ, క్షేత్రస్థాయిలో ఒంటరిగా మున్సిపల్ డివిజన్లను గెలిపించుకునే అంత సీన్ ఆ పార్టీకి కొన్ని జిల్లాల్లో లేదనేది బహిరంగ రహస్యం. ముఖ్యంగా విజయవాడ, గుంటూరు వంటి నగరాల్లో టీడీపీ, జనసేన సామాజిక సమీకరణాలు, క్యాడర్ బలం ముందు బీజేపీ చాలా బలహీనంగా ఉందనే వాదన ఉంది. అందుకే సీట్ల పంపకాల చర్చల్లో కూడా కమలనాథులను ఇరు పార్టీలు పెద్దగా పరిగణనలోకి తీసుకోవడం లేదనే టాక్ నడుస్తోంది.
కేంద్రంలో అధికారంలో ఉండటం వల్ల రాష్ట్ర బీజేపీ నేతలు కొన్ని విషయాల్లో పెత్తనం చెలాయిస్తున్నప్పటికీ, స్థానిక ఎన్నికల విషయానికి వచ్చేసరికి సీన్ రివర్స్ అవుతోంది. కార్పొరేటర్ సీట్ల కోసం చంద్రబాబును గానీ, పవన్ కళ్యాణ్ను గానీ గట్టిగా డిమాండ్ చేసే పరిస్థితిలో స్థానిక బీజేపీ నాయకత్వం లేదు. ఒకవేళ పొత్తులో భాగంగా గౌరవప్రదంగా కొన్ని డివిజన్లు కేటాయించినా, వాటిని గెలిపించుకోవడానికి కూడా టీడీపీ, జనసేన క్యాడర్ మద్దతుపైనే కమలం అభ్యర్థులు పూర్తిగా ఆధారపడాల్సి ఉంటుంది. దీంతో, క్షేత్రస్థాయిలో బీజేపీ పాత్ర కేవలం నామమాత్రమేనని, ఆ పార్టీ కామెడీ పీస్లా మారిపోయిందని ప్రత్యర్థి పార్టీలు సైతం ఎద్దేవా చేస్తున్నాయి.
అసెంబ్లీ ఎన్నికల్లో పొందిన మైలేజ్ను స్థానిక ఎన్నికల్లో కూడా కొనసాగించాలని బీజేపీ ఆశపడుతున్నా, ప్రాక్టికల్ పొలిటికల్ ఈక్వేషన్స్ అందుకు భిన్నంగా ఉన్నాయి. మరి ఈ “సైలెంట్” మోడ్ నుంచి బీజేపీ నేతలు బయటకు వచ్చి, తమకు కూడా మేయర్ లేదా డిప్యూటీ మేయర్ రేసులో వాటా కావాలని చంద్రబాబు, పవన్ ముందర పట్టుబడతారా..? లేక పెద్దన్నలు ఇచ్చే నాలుగైదు డివిజన్ సీట్లతోనే సర్దుకుపోతారా అనేది వేచి చూడాలి.