రాబోయే మున్సిపల్ ఎన్నికల ముందే విజయవాడ మేయర్ పీఠం చుట్టూ నడుస్తున్న రాజకీయం చూస్తుంటే, ఒక కుర్చీకి వంద మంది పోటీ పడే సీన్ గుర్తొస్తోంది. బెజవాడ కార్పొరేషన్ను దక్కించుకోవడానికి అధికార కూటమిలో తలపండిన నేతల వారసులు, యువ నాయకులు క్యూ కడుతుంటే.. ఇప్పుడు అనూహ్యంగా మాజీ ఎమ్మెల్యే జలీల్ఖాన్ కూడా ఈ రేసులోకి ఎంట్రీ ఇచ్చి సరికొత్త ట్విస్ట్ ఇచ్చారు. మేయర్ సీటు ముస్లింలకే ఇవ్వాలని, ఒకవేళ మహిళా రిజర్వేషన్ వస్తే గనుక తన కుమార్తెకు ఆ సీటు రాసివ్వాలని జలీల్ఖాన్ డిమాండ్ చేయడం బెజవాడ పాలిటిక్స్లో నవ్వులు పూయిస్తోంది.
నిజానికి బెజవాడ మేయర్ సీటుపై చాలా కాలంగా కొందరు కీలక నేతల వారసులు గట్టిగా కన్నేశారు. సెంట్రల్ ఎమ్మెల్యే బొండా ఉమా కొడుకు సిద్దార్థ్ తండ్రి అండతో నగరంలో పట్టు పెంచుకుంటూ ఎలాగైనా మేయర్ కుర్చీపై కూర్చోవాలని ఈ యువ నేత గ్రౌండ్ వర్క్ చేసుకుంటున్నారు. బెజవాడ రాజకీయాల్లో దశాబ్దాల చరిత్ర ఉన్న దేవినేని కుటుంబ వారసత్వాన్ని మున్సిపల్ పీఠం ద్వారా చాటాలని దేవినేని చందు గట్టి పట్టుదలతో ఉన్నారు. తనకంటూ ప్రత్యేక ఫాలోయింగ్ ఉన్న వంగవీటి రాధా కూడా ఈ సారి మేయర్ రేసులో కీలకంగా మారే అవకాశం ఉందనే టాక్ నడుస్తోంది.
ఇంత మంది ముగ్గురు ఉద్ధండులు ఇప్పటికే సీటు కోసం చంద్రబాబు చుట్టూ తిరుగుతుంటే.. ఇప్పుడు జలీల్ఖాన్ వచ్చి “మాకు ఇస్తే పోటీనే ఉండదు.. మా అమ్మాయికి ఇచ్చేయండి” అనడం చూసి మిగతా ఆశావహులు నోరెళ్లబెడుతున్నారు. గతంలో ‘బీకాంలో ఫిజిక్స్’ చదివానని చెప్పి అంతర్జాతీయ స్థాయిలో ఫేమస్ అయిన జలీల్ఖాన్.. ఇప్పుడు బెజవాడ మేయర్ రిజర్వేషన్ల ఈక్వేషన్లపై తనదైన శైలిలో ‘ఫిజిక్స్’ ఫార్ములాలు అప్లై చేస్తున్నారంటూ సొంత పార్టీలోనే సెటైర్లు పేలుతున్నాయి. ఒక వైపు బొండా, దేవినేని, వంగవీటి లాంటి భారీ పొలిటికల్ బ్యాక్గ్రౌండ్ ఉన్న ఫ్యామిలీలు సీటు కోసం కాచుకుని కూర్చుంటే.. జలీల్ఖాన్ లీగ్ లోకి రావడం కూటమి పెద్దలకు పెద్ద తలనొప్పిగా మారింది. ఈ మ్యూజికల్ చైర్ ఆటలో ఆఖరికి ఆ మేయర్ కుర్చీ ఎవరికి దక్కుతుందో, ఎవరి ‘ఫిజిక్స్’ వర్కౌట్ అవుతుందో చూడాలి మరి.